SAAM LABU 119 - Ngawm Bible

Topa i Daan

¹ A nunnakah sonsiatnak a um ngawlmi le Topa i daan bangin a nungtute cu mi muicute haw hi.

² A lungmu venghawng tuah Topa i thu a ngaitu le a thupiakmite a zuitu cu mi muicute haw hi.

³ Hihi, thil sual i mah bawl ngawlin, Topa i lampi ah hawh haw hi.

⁴ Na daante cu pia zo ci a, cangkim zetin zui thei leng nuam sing!

⁵ Topa na thupiakte pa khatno hei pelh ngawlin, zui tuk cu ka tupbelmi hi.

⁶ Na thukhamte zui tukin ka zuamzet tale zakca in um tuk mang!

⁷ Lungthiangin nang thangphat tung. Na thukhennak dikzia ka theih hangin

⁸ Na daante cu zui tung hi, kei hawhsan zal pahsun.

Topa i Daan Zui Theihnak

⁹ Itin kaw khangno in ziaza thiangtho a neih theih tuk? Na thupiakmi zuinak bek tuah nei thei tuk hi.

¹⁰ Ka lungmu venghawngin nangma na dek tukin pia ing. Na thupiakte palcat tuk ngawlin kei cingkhawi in hi.

¹¹ Na humah ka sual ngawlnak tukin, ka lungmu sungah na daan cu koih zo ing.

¹² Topa aw, nang thangphat ing; Na daante hilh zalin hi.

¹³ Na thukham piakmite cu nging zetin lo leleng tung.

¹⁴ Sumpai tampi neih sangin, na thupiakmi zui cu nop ti saw ing.

¹⁵ Na thu hilhhawlnak cu cung tung. Na thuzilhmite pha zetin ngaisung tung.

¹⁶ Na daan piakmi ah lungdamnak nei ing. Na thupiakmite cu phawkngil tuk mang.

Topa i Daan Ah Lungdamnak

¹⁷ Lungdamin, na thu ka zui theihnak tukin, kei na sila humah pha zalin hi.

¹⁸ Na daan sungah thasiahhuai thudik ka muh theihnak tukin, ka mit cu vaktik zalin hi.

¹⁹ Leihumah ngei ngawlno sung bek um ing. Ka lak pen na thukham cu sel zal pahsun.

²⁰ Na thukhennak ka theih nuam hangin, ngakhelin ka lungmu na leleng hi.

²¹ Mi pualthaute cu liat ci, na thupiakmi a palcattute cu tamsiat co haw hi.

²² Na thukhamte ka zui zo toh hangin ka hum a, zotsaknak le thangsiatnak; a neihmi haw pen luattikin hi.

²³ Hotute tawkdun khawmin, a suam li haw hei in, kei na sila in, na daan cu cung leleng tung.

²⁴ Na thuzilh mite cu lungdamnak piatu hi in, ngaihsutnak pha pia tuk hi.

Topa i Daan Zui Nuamnak

²⁵ Ka sun hangin leivul bual ing. Na thutepsa bangin ka tha umlehtik zalin hi.

²⁶ Ka bawlmi hempoh phuang ing a nangin thei ci; Na thupiakmite zilh zalin hi.

²⁷ Na daan zui thei tukin zilh inna, na thuzilhmi thasiahhuai cu cung tung hi.

²⁸ Ka thasia leita a hih ten, na thutepsa bangin tha neitikleh zalin hi.

²⁹ Lampeng ka zui tuk ngawlnakin cingkhawi in; na phat hangin na daan cu zilhin hi.

³⁰ Na thu zuitu hi tukin ngaisung cat zo ing; Na thukhamte ka mai ah koih zo ing.

³¹ Topa aw, na thuzilh mite cu zui zo ing; Mualpho in koih zal pahsun.

³² Nangmah in theihtupnak na piak tuk hangin, na thupiakmi cu thatho zetin zui tung.

Theihtupnak Tuk Thungetnak

³³ Topa aw, na thupiakmi a sullam hilh inna, Ituk hei ten zui leleng tung.

³⁴ Na daante cu ciangno in zilh inna, zui tung hi. Ka lungmu venghawngin zui tung hi.

³⁵ Na thukham i lampi ah pui in; itahim titale mahlai ah lungdamnak ngah ing.

³⁶ Hauhnak sangin na thupiakmi a zui nuamtu hi sawtikin hi.

³⁷ Imah ngawlmi a zei litu ka hih tuk uh ngawlnakin, cingkhawi zalin hi. Na thutepsa bangin ka humah pha zalin hi.

³⁸ Nangmah a kihcatu tei lak a na thutepnak cu, kei na sila lakah kimtikin hi.

³⁹ Ka lauzet mi nautatnak pen luattik zalin; na thupiakmite cu thasiahhuai hi.

⁴⁰ Na thukhamte cu sunsak ing. A dikmi na hih hangin nungtik zalin hi.

Topa i Daan Thukham Muannak

⁴¹ Topa aw, kei na ihnak a ngeng dan cu langtik zal inna, na thutepsa bangin kei pan zalin hi.

⁴² Kei a nautattute cu don thei tung. Itahim titale na awnkam cu muang ing.

⁴³ A man mi na thu a phuang ngamtu hitikin; itahim titale na thukhennak cu ka muansan mi hi.

⁴⁴ Na daante cu kumkhua, catngawlin zui leleng tung.

⁴⁵ Na thupiakmite ka zui hangin, a cangkimmi zalennak sungah nung tung hi.

⁴⁶ Na thupiakmi cu kumpi tei lakah than tung, zahcak pih tuk mang.

⁴⁷ Ka lungsi zetmi na thukhamte zui cu, ka lungdamnak hi.

⁴⁸ Na thukhamte cu, ka sunsakmi le ka deihmite hi. Na thupiakmite cu ka thin le lung tuah cung tung hi.

Topa i Daan Ah Lungkimnak

⁴⁹ Na sila, keima lak a na thutepmi cu phawkngil pahsun. Muansannak neitik zo ci.

⁵⁰ Ka apthong hunlaih hei in keimah zemtu hi. Itahim titale na thutepmi in nunnak pia hi.

⁵¹ Mi pualthau ten zawnsak haw. Mahnaven na daan piakmi pen pial awng mang.

⁵² Nunglam a na piakmi na thute cu cing leleng ing. Topa aw, ka ca in hehnemtu ci.

⁵³ Mipha ngawl ten na daan a palcat haw ka muh ten, ka thinukzet ing.

⁵⁴ Khual ka zinnak ka innah na thukhamte cu ka lasak mite hi.

⁵⁵ Topa aw, zanlam hei in nangmah ngaisung ing. Na daan cu zui zo ing.

⁵⁶ Na thupiakmi zui cu ka lungdamnak hi.

Topa i Daan Letkhimnak

⁵⁷ Topa aw, ka deihmi cu nangmah bek hi ci. Na daan zui tukin thutiam zo ing.

⁵⁸ Ka lungmu ngangai in ngen ing; na thutepsa bangin, Ka humah hehpihnak nei zalin hi.

⁵⁹ Ka nunnak i zui mi lampi cu ka zo kikleh ten, na thupiakmi zui tukin thutiam ing.

⁶⁰ Ka khing ngit ngawlin na thutiam zui tukin manlang zetin tho ing.

⁶¹ Mipha ngawlte in, a khau haw tuah khoh zetin ken haw. Mahnaven na thupiakmi cu phawk ngil mang.

⁶² Zanngil ten ka hihbuhnak pen na thukhen dikmi thangphat tukin khang ing.

⁶³ Na daan a zuitu le na nadektu hempoh tei ngualcampih ing.

⁶⁴ Topa aw, leihum buppi hi a kho mi na ihnak tuah dim hi. Na thukhamte cu kei hu zilh zalin hi.

Topa i Daan A Manneih Dan

⁶⁵ Topa aw, na thutepmi cu kimtik ci. Kei na sila lakah pha ci.

⁶⁶ Cihnak le thu ngaihsut thiamnak pia zalin hi. Itahim titale na thupiakmi muang zo ing.

⁶⁷ Daan na tat laih ngawlin thil sual bawlmek ing. Mahnaven atu-in, na thu zui ing.

⁶⁸ Na phatdan le mi na hehpih zia cu, Na thupiakmite kei zilh zalin hi.

⁶⁹ Mi ultung ten ka thu cu zol thu ngehin son haw; Mahnaven ka lungmu venghawngin, na daan cu zui ing.

⁷⁰ Hiti bang mihing ten theihtupnak nei haw ma hi. Mahnaven na dan sungah lungdamnak nei ing.

⁷¹ Daan na tatnak cu ka ca in pha hi. Itahim titale na thupiakmi theitik ci.

⁷² Kei na piakmi na daan cu leihum buppi sui le ngun hempoh sangin, ka ca in sunglawi saw hi.

Topa i Daan A Lamcam Zia

⁷³ Nangmah in semsuahin, himdamno in cingkhawi ci. Na daante ka cunnak tukin ngaihsut thiamnak hu pia zalin hi.

⁷⁴ Nang a kihcatu ten kei amuh haw ten lungdam haw tuk hi; Itahim titale na thutiamnak muang ing.

⁷⁵ Topa aw, na thukhennak cu dikcangzet hi tih cu thei ing; Muantak na hih hangin dantat ci, tihvang thei ing.

⁷⁶ Kei na sila, na tepsa bangin a khohmi na ihnakin, kei hehnem zal hen.

⁷⁷ Kei hehpih inna, nung tung. Itahim titale na daan sungah ka lungdam hi.

⁷⁸ Mi pualthau ten sual a not haw hangin a zak haw ca hen; Kei in ka lungmu sungah na daante cu ngaisung pha tung.

⁷⁹ Na thupiakmi a theitu le, nang a kihcatute cu ka lakah hung haw hen.

⁸⁰ Zakca mualpho in ka um bok tuk ngawlnakin, Na thutep cu cangkim zetin zui thei zal nang ngei!

Suahcaknak Ca Thungetnak

⁸¹ Topa aw, na patnak ka ngahnak hangin tamsawl zo ing. Na thu cu muang sih bok ing.

⁸² Na thutepmi zohnakin ka mit cawl khawng zo. “Ituk ten kaw na bop tuk?” tin dong ngawlin um thei sih mang.

⁸³ A vawksa haw mi sabit thawl bangin, nemcuam ngawlmi ing. Mahnaven na thupiakmi cu phawkngil ma laih ing.

⁸⁴ Itik tian kaw ka ngah hih tuk? Kei a bawlsiatute hi ituk ten kaw na bawlsiat bok tuk?

⁸⁵ Na daan a zui ngawltu mi ultung ten, keimah awk tukin khuk tampi co haw hi.

⁸⁶ Na thupiakte cu muantakzet ngeh hi. Mi ultungte ten zolthu ngeh tuah bawlsia li haw. Kei hu bawm zalin hi.

⁸⁷ Atu-in that thei awndiak haw toh hi. Mahnaven na thupiakmite cu zulzaupih mang.

⁸⁸ A kho mi na ihnak hangin ka humah pha zalin hi. na daante cu zui thei tung.

Topa i Daan Upnak

⁸⁹ Topa aw, na thu cu kumkhua in kho tuk hi. Vancung pen a kho zo mi thu hi.

⁹⁰ Muantak na hihnak cu khang tawntungin kipkho hi; Leipi cu nangmah in koih ci, na koihnak bangin kho hi.

⁹¹ Ihempoh hi na sila hi. Mah hangin na thupiaknak bangin tuni tian kho hi.

⁹² Na daante hi ka lungdam lelengnak ahi ngawl ahin, ka nuncimnak hangin thi zo tuk toh ing.

⁹³ Na thupiakmite cu zulzaupih tuk mang. Mah mite cu mangin keimah nunnak pia ci.

⁹⁴ Kei cu nangmata ing. Kei hu pan zalin hi. Na thupiakmi zui tuk bek hi ka tuptah mi hi.

⁹⁵ Mipha ngawl ten that tukin pang haw. Mahnaven na daan cu ka lungmu sungah vong tung.

⁹⁶ A cangkim mi imah umma, tih thei zo ing; Mahnaven na thukham cu tawpnak nei ma hi.

Topa i Daan Deih Awh

⁹⁷ Aw, na daante ka deih dan cu! Thalengin mahbek ngaisung ing!

⁹⁸ Na thukham cu ka lakah caam leleng hi; Ka ngal hempoh sangin kei ciptik deuh ci.

⁹⁹ Keimah a zilhtu hempoh sangin thei saw ing; Na thuzilh mite ka ngaihsut hangin hi.

¹⁰⁰ Putekte sangin cip deuh ing; Na thupiakmi ka zui hangin hi.

¹⁰¹ Ziaza pha ngawl cu pial zo ing; Na thuzui ka nuam hangin hi.

¹⁰² Na thuzilh mite zulzaupih mang; A zilhtu nangmah na hih hangin hi.

¹⁰³ Na thupiakmite a hum daan cu! Khuaihum sangin hum saw.

¹⁰⁴ Na thukham pen cihnak ngah ing hi; Nuncan pha ngawl hempoh hua ing.

Topa i Daan Pen Vaknak

¹⁰⁵ Na thu cu keimah lampuitu mei inn hi a, ka lampi ca in vaaknak hi.

¹⁰⁶ Thu ka tep zo bangin, a dikmi na thuzilhnak cu zui tung.

¹⁰⁷ Topa aw, Ka thuakdan hi na sia leita hi; Ka hum a na tepsa zo bangin kei hu nungtik zalin hi.

¹⁰⁸ Topa aw, ka lungdam thungetnak cu sang zal inna; Na thupiakmi cu zilh zalin hi.

¹⁰⁹ A kul ahi tale ka nunnak pia tukin mansa ing; Na daante phawkngil mang hi.

¹¹⁰ Mipha ngawl ten keimah thangsiah haw; Mahnaven na thupiakmite cu palcat ma laih ing.

¹¹¹ Na thupiak cu kumkhua in keima ta hi haw hi; Ka lungmu noptiktu haw hi.

¹¹² Na thupiakmite cu ka thih ni tianin; zui tukin ngaisung zo ing.

Topa i Daan Ah Himnak

¹¹³ Na lakah lungmu ngai nei ngawlte cu mitkem ing; Mahnaven na daan cu deih ing.

¹¹⁴ Nang cu ka belhnak le ka lumphol ci. Na thutepmi ah muansannak nei ing.

¹¹⁵ Maw misual, ka nel pen tai un; Ka Pathian i thukham cu zui tung.

¹¹⁶ A tepsa bangin, thazaang pia inna, nung tung; Ka muansanmi ah ka thasiatik pahsun.

¹¹⁷ Phong inna, him tung; na thupiakmite cu ngai leleng tung.

¹¹⁸ Na daan a palcattute cu lawl ci; A mizol thiamnak haw cu phukthong hi!

¹¹⁹ Mipha ngawlte cu buak bangin ngaisung ci; Mah hangin na thuzilhnak cu deih ing.

¹²⁰ Nangmah hangin ka thinsu; Na thukhennak hangin can tawtok ing.

Topa i Daan Zui Theihnak

¹²¹ A manmi le a pha mi cu bawl zo ing; Ka ngal tei khut sungah kei zamthong pahsun.

¹²² Bawm tung hi tin na sila kei lakah tiamin; Mi pualthau ten kei nuncimtik haw pahsuh hen.

¹²³ Na nunpatnak ka zohnakin ka mit kha khawng zo! Na tepsa mi luatnak ka zohnakin!

¹²⁴ A kho mi na itnak tuah zo in, na thupiakmite zilhin hi.

¹²⁵ Kei hi na sila ing hi a, na thuzilhmi ka theihzawhnak tukin theihtupnak hu pia in hi.

¹²⁶ Topa aw, na nadeh hun zo. Mihing ten na daan cu palcat pepel haw!

¹²⁷ Na thukham cu sui le leihum sui phabel sangin pha saw hi.

¹²⁸ Mah hangin na thuzilhmi hempoh cu zui ing a, lampi man ngawlte cu hua ing.

Topa i Daan Zui Nuamnak

¹²⁹ Na thuzilh mite cu thasiahhuai hi; Mah hangin ka lungmu venghawngin zui ing.

¹³⁰ Na thu hilhciangmi in vaknak pia hi; Mi lungsil tei lakah cihnak pia hi.

¹³¹ Na thupiakmite ka deih leita hangin; Ka kamka in, ka hai hawh mang.

¹³² Nangmah a ittute na hehpih bangin; Ka lam hek inna, hehpih zalin hi.

¹³³ Na tepsa bangin kei bahtik zal pahsun; Phatngawlnak i uk tuk cu phal zal pahsun.

¹³⁴ Keimah a nemsuktu tei khut pen hup inna, na thupiakmi cu zui tung.

¹³⁵ Na mitmai pha cu ka humah, ni bangin suaktik inna, na daante zilh zalin hi.

¹³⁶ Ka hitui tui bangin luang; Mihingin, na daan a zui haw ngawl hangin hi.

Topa i Daan A Dik Zia

¹³⁷ Topa aw, nang cu a dikcangmi hi ci; Na thupiakmite vang lamcamzet hi.

¹³⁸ Na thuzilh mite cu celin, phazet haw hi.

¹³⁹ Na mihing ten na thukham a poisak haw ngawl hangin, na thinuknak cu meiling bangin sa liklek hi.

¹⁴⁰ Na thukham cu itik zahin muantak him! Na sila in itih zahin kaw ka deih!

¹⁴¹ Mi nau tale nautatmi hi naveng; Na thupiakmite cu zulzaupih mang.

¹⁴² Na diknak cu kumkhua in kho hi. Na daante cu dikcang leleng hi.

¹⁴³ Haksatnak le lungapnak tuah dim ing; Mahnaven na thukhamin nun nopnak pia hi.

¹⁴⁴ Na thuzilhnak cu kumkhua in, a manmi hi. Theihtupnak pia inna, nung tung.

Luatnak Tuk Thungetnak

¹⁴⁵ Ka lungmu ngangai tuah sam ing; Topa aw, don inna, na thu zui tung.

¹⁴⁶ Nangmah cu sam ing; Hup inna, na daan zui tung.

¹⁴⁷ Khua a vak laih ngawlin, na bopnak ngenin sam ing. Na thutepnakah muansannak nei ing.

¹⁴⁸ Na thuzilh mite ka ngaihsut hangin Zankhua hihbu ngawlin um ing.

¹⁴⁹ Topa aw, na ihnak a kho hangin, ka thu ngetnak ngai zalin! Na phatnak hangin ka nunnak khawih zalin!

¹⁵⁰ Mi hehpih nei ngawl kei a bawlsiatute le na daan a zui ngawltu ten neh dedeuh haw hi.

¹⁵¹ Mahnaven maw Topa, nang cu ka elah um ci; Na thukham cu kumkhua in kho hi.

¹⁵² Na thuzilhmi cu tanglaih cawngin cung zo ing; kumkhua ca tukin na piakmi hi.

Patnak Tukin Aunak

¹⁵³ Ka haksatnak hi zo inna, panin; Na daan cu zulzaupih awng mang!

¹⁵⁴ Pan inna, kei luattik zalin; Na thutepsa bangin suahcaknak pia in hi.

¹⁵⁵ Mipha ngawlte cu patmi hi haw tukma; Na daan a zui awng haw ngawl hangin hi.

¹⁵⁶ Mahnaven Topa aw, na hehpihnak cu ngeng lawlawl hi. Na thu bangin pan zalin hi.

¹⁵⁷ Ngal le bawlsiatu tampi nei ing; Mahnaven na daan cu zui ngawlin um awng mang!

¹⁵⁸ Mi zawnsaktute ka muh ten ka mitkemzet ing; Na thupiakmite zui awng haw ma!

¹⁵⁹ Maw Topa na thuzilhmi ka deih dan hi zo kekin! Na mi ihnak hangin kei hup zalin hi.

¹⁶⁰ Na daan i a mu ngil cu thutak hi. Na thukhennak cu dikcangin, kumkhua in kho hi.

Topa i Daan Sungah Lungmu Piaknak

¹⁶¹ Mingilzet ten a thu um ngawlin keimah do haw. Mahnaven ka upat mi cu na daan bek hi.

¹⁶² Na thutepnak hangin izahin kaw ka lung a dam; Na manpha khultu bangin hi.

¹⁶³ Zolthu hempoh cu hua in ningdelh ing; Mahnaven na daan cu tha ngai ing.

¹⁶⁴ Na lakah nisialin vei salih lungdamnak thu hilh ing; Na thukhennak a dikcang hangin hi.

¹⁶⁵ Na daan a deihtute cu humhimnak cangkim ngah haw. Imah in bahtik thei ma hi.

¹⁶⁶ Topa aw, na hup tukin ngak ing. Na thupiakmi zui ing.

¹⁶⁷ Na daante cu zui ing; Ka lungmu venghawngin deih ing.

¹⁶⁸ Na thupiakmi le na thuzilhte cu zui ing; Ka bawlmi hempoh mu khawng ci.

Bopnak Tukin Thungetnak

¹⁶⁹ Maw Topa bopnak ngenin, ka aunak cu na lakah heng zal hen; Na thutepnak bangin theihtupnak pia in hi.

¹⁷⁰ Ka thungetnak cu na mai ah heng zal hen; Na thutepnak bangin kei pan zalin hi.

¹⁷¹ Catngawlin nang thangphat tung; Na thu na zilh zo hangin hi.

¹⁷² Na daan cu la in sa tung; Na thupiakmite a dik haw hangin hi.

¹⁷³ Keimah bawm tukin mansa in umin; Na thukham ka zui hangin hi.

¹⁷⁴ Maw Topa na patnak ka ngaihdan cu! Na daan sung bekah lungdamnak nei ing!

¹⁷⁵ Na nuntik hangin, nangmah thangphat leleng tung; Na thuzilhmi in kei hu bawm zal hen.

¹⁷⁶ A paimi tuu bangin vakvai ing; Hung inna, kei na sila hi zei in hi. Na thupiakmi zulzaupih mang hi.