SAAM LABU 118 - Ngawm Bible

Nehnak Ca Lungdam Thungetnak

¹ Topa i lakah lungdamnak thu hilh un, Itahim titale amah cu pha hi. A ihnak cu kumkhua in kho hi.

² Israel miten, “A itnak cu kumkhua in kho hi,” ti haw hen.

³ Pathian i thiampi ten, “A itnak cu kumkhua in kho hi,” ti haw hen.

⁴ Amah a kihcatu ten, “A itnak cu kumkhua in kho hi,” ti haw hen.

⁵ Ka haksat laihin Topa cu sam ing; Ka samnak thei in luatnak pia hi.

⁶ Topa cu ka lakah um hi; imah lau tuk mang. Mihing ten ka humah ikaw a bawl theih haw tuk?

⁷ Keimah bawmtu cu Topa amah hi. Ka ngalte a sun haw ka mitin mu tung.

⁸ Mihing muan sangin, Topa muansan pha saw hi.

⁹ Leihum upate muan sangin, Topa muansan pha saw hi.

¹⁰ Ka ngalte cu ka elkimah um khawng haw; Mahnaven Topa i huham tuah siatsuah khawng ing.

¹¹ Ka elkim pan kil khawng haw; Mahnaven Topa i cahnak tuah botik khawng ing.

¹² Khuai bangin ciam li haw; Mahnaven hamcam meikang bangin kang khawng haw hi. Topa i huham tuah siatsuah khawng ing.

¹³ Neh tuk loli in nase zetin do haw; Mahnaven Topa in keimah bawm hi.

¹⁴ Topa in huham neizet le ngil zetin keimah bawl hi; Amah cu keimah pantu hi.

¹⁵ Topa i mihingte a puanbuk haw pen nehnak, lungdamin, a au lih haw cu ngai hem un; “Topa i huhamin neh zo hi.

¹⁶ A huhamin nehnak pia zo hi. A ngal nehnak huham thawmin!” ti haw hi.

¹⁷ Thi tuk mang, dam tung a, Topa i thil bawl mite phuang tung.

¹⁸ Nase zetin keimah dantat zo. Mahnaven thihtik phal ma hi.

¹⁹ Ka ca in Biakinn kongkhah honsak zalin; tum tung a, Topa thangphat tung.

²⁰ Topa i kongkhah cu hihi hi; a dikcang mite bek tum thei haw tuk hi.

²¹ Topa aw, ka aunak thei in, Nehnak kei na piak zo hangin nangmah thangphat ing.

²² Inn satu tei a lawl haw mi suang cu, a nemcuambelmi suangpi in cang zo hi.

²³ Mahmi cu Topa i bawlmi hi; Zoh nop ngangai si mei!

²⁴ Iti bang ni sunglawi kaw Topa in kei a piak? Lungdam thatui in um nung!

²⁵ Kei hupin, Topa, lawhtingtik zalin!

²⁶ Topa i minin, a hungtu cu Pathian in muicu pia zal hen! Topa i Biakinn pen muicu pia ung hi.

²⁷ Topa cu Pathian hi; Oh tei lakah vaknak pia zo hi. Na khut uhah thingkang cawi in puai cu bawl unna, biaklandawh cu kim un.

²⁸ Nang cu ka Pathian hi ci, lungdamnak thu hilh tung, Na thawm ngengnak tang aupih tung.

²⁹ Topa i lakah lungdam thu hilh un, Itahim titale amah cu pha hi; A ihnak cu kumkhua in kho hi.