SAAM LABU 115 - Ngawm Bible

A Thumanmi Pathian

¹ Maw Pathian aw, nangma lakah, keimu lakah hi ngawlin, nangma lak bekah a kho mi na itnak le muantak na hihnak hangin, sunloihnak cu piak hihen.

² “Ilai ah kaw na Pathian uh cu?” tin itakaw miphun dadang ten a dot haw tuk?

³ Ka Pathian uh cu vancungah umin, a nuam pawpoh bawl hi.

⁴ Amuh tei pathiante cu sui le ngun tuah bawlmi, mihing khut tuah bawl mite hi.

⁵ Kam nei haw naven awn thei haw ma, Mit nei haw naven mu thei haw ma.

⁶ Beng nei haw naven za thei haw ma, Naal nei haw naven a ngim thei haw ma.

⁷ Khut nei haw naven zen thei haw ma. Ke vang nei haw naven hawh thei haw ma. Thawmvang nei thei haw ma hi.

⁸ Hi pathian dang a bawltu le a muangtute cu; A bawl haw mi milim bangin cang khawng haw tahen.

⁹ Maw Israel mite, Topa muang un! Amah cu nangmuh a bawmtu le a huptu hi.

¹⁰ Maw Pathian aw, i thiampite, Topa muang un! Amah cu nangmuh a bawmtu le huptu hi.

¹¹ Maw Pathian aw, a kihcatute, Topa cu muang un! Amah cu nangmuh a bawmtu le huptu hi.

¹² Topa in keimah cu thei lelengin, muicu pia tuk hi. Israel mi le Pathian i thiampite cu Pathian in muicu pia tuk hi.

¹³ Amah a kihcatu a ngeng a neu in, muicu pia tuk hi.

¹⁴ Nangmah le na casuante cu Topa in canu capa pia zal tahen

¹⁵ Lei le van semsuahtu Topa in, muicu buak zal hen.

¹⁶ Vante khi Topa ta hi; Amata ngeh hi khawng hi. Mahnaven leipi cu mihing khutah pia hi.

¹⁷ Topa cu mithi ten thangphat haw ma; Meng diudeunak mun a hengtu ten!

¹⁸ Mahnaven oh a nungmi ten, tu le kumkhua in amah thangphat tuk hung. Topa cu thangphat un!