SAAM LABU 114 - Ngawm Bible

Taisan Puai La

¹ Israel mite Izipt ngam pen a tul haw ten. Jakob casuan tei miphun dang tei ngam a taisan haw ten,

² Judah cu Topa i miphun thiangtho ah cangin, Israel cu ama bulta in cang hi.

³ Tuipi sanin, amuhte taivawkta hi; Jordan ngunpi cu luang ngawlin cawl hi.

⁴ Mualsangte cu keel bangin le mualniamte cu tuu bangin hihen dawk haw hi.

⁵ Maw Tuipi, ikaw nang a taitik tu? Maw Jordan, itakaw luang ngawlin, na colh?

⁶ Maw mualsangte, itakaw keel bangin na dawk uh? Maw mualniamte, itakaw tuu bangin munteu in, na dawk lih uh?

⁷ Leipi aw, Jakob i Pathian mai ah Topa a hun ten hingin hi.

⁸ Suangpi cu a man tuikhukin cangtikin, suangval mualtuante cu ciktui in cangtik ci.