SAAM LABU 111 - Ngawm Bible

Topa Thangphatnak La

¹ Topa cu thangphat un! Mipi tei tawhdun khawmnakah ka lungmu venghawngin Topa cu thangphat tung.

² Topa i thil bawl mite, itih zahin thasiahhuai him? Mah a thil bawlmi hum a lungdamtu in, a sullam thei haw hi.

³ A bawl mite cu upat tak hi haw hi, sunloihnak tuah dim hi; A diknak cu kumkhua in kho hi.

⁴ Topa in nalamdang thasiahhuai a bawl mite cu phawkngiltik ma hi. Amah cu hehpihnak neitu hi.

⁵ Amah a lautute cu eih tuk an pia hi; A thutep cu phawkngil awng ma hi.

⁶ A thil tihtheih dan cu a mihing tei lakah langtikin, miphun dang tei leingam cu amu lakah pia hi.

⁷ A thil bawlmi hempoh cu mi muantak hi haw in dik khawng hi. A thutiamte cu muantak hi.

⁸ Kumkhua in, a kho mi hi haw in, Thutak le dikcang zetin piakmi hi.

⁹ A mihing tei lakah patnak hengtikin, amuh tuah kumkhua ca in thutepnak bawl hi. A thiangthomi le huham nei zetmi hi.

¹⁰ Pathian kihcaknak cu cihnak a patnak hi; Mahti bangin a bawltute cu theihtupnak phazet nei haw. Amah cu kumkhua in thangphat hi tahen.