SAAM LABU 109 - Ngawm Bible

Haksatnak A Thuaktu i Phuciaknak

¹ Pathian, nangmah thangphat ing; mengdenin um pahsun.

² Mipha ngawlte le mi zoltu ten kei do li haw; Ka thula sonin zol thu son haw hi

³ Awnmawi ngawlzet mangin keimah son haw; Thula imah um ngawlin langpang li haw.

⁴ Amuhte cu it ing, amu ca in thungen na veng, amuh ten keimah cu do leleng haw hi.

⁵ Phatnak cu siatnak tuah lul haw in, itnak cu huatnak tuah lul haw hi.

⁶ Ka ngal pa i thuson tukin thukhentu mipha ngawl tengin koihin hi. Itahim titale mihing tei bopnak cu man nei ma hi. A ngalpa leng cu sual nawntu in koihin hi.

⁷ A thu a son haw ten mikhial hi tin thukhen hi zal tahen. A thu ngetnak vang cu khelhnakin ngaihsut hihen.

⁸ A san com henna, a nadeh cu midangin co hen,

⁹ A cate cu pa nei ngawl mi ca-ngah hi hawta henna, a zi cu meivongin cang hen.

¹⁰ A cate cu inn nei ngawl, khutdawh ngenin cang haw henna, a umnak haw deu sesuak pen hawlvawk pepel hi haw tahen!

¹¹ Sum a coihtu ten, a neihmi hempoh sut khawngta henna, mikhual ten a lawhmi hempoh cu lasak khawng haw hen.

¹² A humah kuamah in hehpihnak nei haw ma hen; A cate cu ca-ngahin kuamah in cingkhawi haw ma hen.

¹³ A cihah hempoh thi khawng hawta henna, a min cu san khat nungten phawhngilh hihen.

¹⁴ Topa in, a pu le pa tei phatngawlnak cu cing leleng henna, a nu i sualnak cu ituk mahten zah ma hen.

¹⁵ Topa in, a khelhnak haw cu thei leleng hen; Mahnaven amuhte cu phawhngilh khawng hi haw hen.

¹⁶ Mahpa cu mi hehpihnak nei hihim ma hi; Mi ca-ngah, mi tingsam le bawmtu nei ngawlte bawlsia in that hi.

¹⁷ Midang tamsiat tuk a nuamzet hangin, amah tamsiat co tahen. Midang muicu piak tuk cu a nuam hihim ngawl hangin; kuamah in muicu pia haw pahsuh hen.

¹⁸ Tamsiatnak cu ama ca in nikcen puansilh bang hi. A mitam awnkamte cu tui bangin a pumpi sungah hei hihen, Situi bangin a nguh sungah hei hihen tum tahen.

¹⁹ Puan bangin amah khuhtu in cang henna, taikhap bangin a elkimah vial leleng hen.

²⁰ Sia zetin kei a sontu ka ngal tei humah a hen bangin Topa in dantat tahen.

²¹ Mahnaven, Topa ka Pathian, ka hum a na tepnak bangin, nangmah in kei cu bawmin, na mi ihnak a pha hangin kei cu hupin hi.

²² Kei cu mi ca-ngah le mi tingsam ing. Ka lungmu ngil sung tianin kahnak thuak ing.

²³ Taaklam nilim bang a pai thong tukmi ing. Lungsivaite bangin vawkthong hi poh ing.

²⁴ An ka eih ngawl hangin ka khuk can hi; Ka pumpi cu nguh le vun bek hi toh hi.

²⁵ Miten keimah amuh haw ten nuihsan haw, zawnsakin lu pei san haw hi.

²⁶ Maw Topa ka Pathian, kei hu bawm zalin! A khomi itnak na neih hangin bawm zalin hi

²⁷ Nangmah bek keimah pantu na hihnak ka ngalte theitik zalin

²⁸ Amuh ten keimah a tamsia hawta hei in, nangin muicu pia tuk ci. Keimah a bawlsiatute cu sung haw tahen. kei na sila hi ka lungdam hi.

²⁹ Ka ngalte cu mualphonakin khuhcih henna, a zahcaknak haw cu angki cualpi bangin silh haw hen.

³⁰ Topa i lakah nging zetin lungdamnak thu hilh tung. Mi zapi mai ah amah cu thangphat tung.

³¹ Itahim titale mi ca-ngah nuncimte panin, Amuh thattu tei khut sung pepan hi.