SAAM LABU 107 - Ngawm Bible

Bu Nganak ( Saam 107-150 ) Pathian i Phatdan Thangphatnak

¹ Topa i lakah lungdamnak thu hilh un, Itahim titale amah cu pha hi. A itnak cu kumkhua in kho hi.

² Topa cu thangphat ten nung, a patsa miten, Na ngal tei khut sung pen nohte panin,

³ nisuahnak, nitumnak, saklam le hanglam a ummi ngamdang pen nohte cu puitulleh hi.

⁴ Mi khenkhatte cu phillawnah, lam pai in vakvai haw; a umnak haw tuk khuapi zuan thei hihim haw ma hi.

⁵ A ngil haw kialin, a dang haw dumin; lung-amin, lungbing haw hi.

⁶ A haksatnak haw lak pen Topa cu samin, a cimkhamnak haw pen luattik hi.

⁷ Puitulin, lampi pha ah hawhpih hi, a umnak haw tuk khuapi heng ing.

⁸ A khel awng ngawl mi a itnak le, a ca haw in nalamdang thasiahhuai a bawl mite hangin Topa cu thangphat haw hen.

⁹ Dangdumte a dangdumnak haw phatikin, Ngilkialte cu thilpha tuah dimtik hi.

¹⁰ Mi khenkhat cu lungsiatnak le khuathim sungah um haw. Thawngta hi haw in thik taicin khih co haw hi.

¹¹ Cungnungbel Pathian thupiakmi deih haw ngawlin a thuhilhmi a el haw hangin hi.

¹² A nadehnak haw hangin cawl leita in lum haw. Mahnaven kuamah bawmtu le phongtu nei haw ma.

¹³ A haksatnak haw sung pen Topa cu sam haw in, cim le khamnak haw pen luattik hi.

¹⁴ A lungsiatnak haw le khuathim sung pen suaktikin, a thik taicinte cu sukeh khawng hi.

¹⁵ A thekdun awng ngawlmi a itnak le amu ca in nalamdang a bawlmi hangin Topa cu thangphat haw hen.

¹⁶ Daal tuah bawlmi kongkate cu sukeh khawngin, thik tuah bawlmi a zawlte cu sep ek khawng hi.

¹⁷ Mi khenkhat cu a sual haw hang silin; a phatngawlnak haw hangin natnak thuak haw hi.

¹⁸ An hei zoleh nuam ngawltohin, thihnak kongka bulah heng haw hi.

¹⁹ A haksatnak sung haw pen Topa cu sam haw in, a cim le khamnak haw sung pen luattik hi.

²⁰ A awnkamin damtik hi; thihnak khuk sung pen suah hi.

²¹ A thekdun awng ngawl mi a ihnak le amuh tei ca in nalamdang a bawlmi hangin Topa cu thangphat haw hen.

²² Biakpiaknak pia in, a lakah lungdamnak pia haw hen; lungdamnak la tuah a thil bawl mite cu phuang haw hen.

²³ Mi khenkhat cu tuipi humah timbaw tuah khualzin haw. Tui hum khualzinnak tuah pumcawmnak zei haw

²⁴ Topa i thil bawlte mu haw; Tui humah nalamdang a bawl mite cu!

²⁵ Thu a piak ten huihpi cu thum dudum hi. Tuipi hum a tuicawkte tho to in

²⁶ Lawngte cu humlamah septo in, tuipi sungah nimtik hi. Mahtibang hun can lauhuaizet a hen ten, mihing tei ngalphatnak cu pai khawng hi.

²⁷ Zukham misil bangin lum haw hi. Thiamnak a neih haw mite cu thawnthong khawng hi.

²⁸ A haksatnak haw sung pen Topa cu sam haw in a cim le khamnak haw sung pen luattik hi.

²⁹ Huihsiapi cu mengtikin, tuicawk cu daitik hi.

³⁰ Lungdaihnak a um hangin a lung haw dam hi; A hawh nuamnak haw khua ah himdamno in henpih hi.

³¹ A khel awng ngawlmi a ihnak le amu ca in nalamdang a bawl hangin Topa cu thangphat haw hen.

³² Mipi khopnakah a thawmngeng zia cu tangau pih haw tuk a, Upa tei tawhdun khawmnak munah thangphat haw hen.

³³ Topa in nguntuite cu hul hilhialin kotikin, ciktuite vang kangtik khawng hi.

³⁴ Ngampha cu ngamko le ngamphulin cangtik hi. Mahlai ummi tei phatngawlnak hangin

³⁵ Phillawn cu tuikhuk umnakin bawlin, leiko mun cu ciktui in dimtik hi.

³⁶ Ngilkialte mahlai munah umtikin, a umnak haw tuk khuapi dingtik hi.

³⁷ Lo ah anci pawi haw in huanah sabit phut haw; a let tampi in cawmleh haw hi.

³⁸ Topa in, a mihingte cu muicu pia in, canau tampi nei haw; A nganhing haw vang kiamsuk awng ma hi.

³⁹ Pathian i mihingte cu bawlsiatnak le haksatnak a phunkim tuah zotsakmi le sihpekmi a hih haw ten,

⁴⁰ a bawlsiatute cu Topa in nemsukin, lampi um ngawl phillawn ngamkhingah vakvaitik hi.

⁴¹ Mahnaven mi nuncimte cu a haksatnak haw pepanin; A innkua haw cu tuuhon bangin, pungtik hi.

⁴² Mahmi cu midik ten amuh haw ten lungdam haw hi; Mahnaven mipha ngawlte cu awn ngawlin dap khipkhep haw hi.

⁴³ Micip ten hi thil hi ngaisung pha haw hen; Topa i ihnak cangkim cu thei ciang haw hen.