SAAM LABU 106 - Ngawm Bible

Topa i Phatnak

¹ Topa cu thangphat un! Topa i lakah lungdam thu hilh un, Itahim titale amah cu pha hi. A ihnak cu kumkhua in kho hi.

² Thasiahhuai a bawl mite hi, Cangkimin, akua in hilh thei tuk him? Amah thangphatnak cu akua kaw a son ceng tuk hi.

³ A thupiakmi a zuitu le thudik a bawl lelengtu cu mi muicute haw hi.

⁴ Na mihingte na bop ten, Topa aw, kei hei phawk zalin, amuhte na pat ten kei vang telhcih zalin hi.

⁵ Na ten mite mi neinung a hih haw tuk hun cu kei mutik zal bokin hi; Na miphun i lungdamnakah kei telhtik bok inna, nangmata a hih haw hangin a nunnopnak haw cu kei cotik bok zalin hi.

⁶ A pu le a pa uhte bangin ohte vang sual zo hung; thilpha ngawlte bawlin misual ngangai hung hi.

⁷ A pu le pa tei Izipt ngam a um haw lai in, Pathian i nalamdang bawl mite theithei haw ma hi A itnak langtik leleng naven cin, phawkngil lelem haw. Tuipi san a hen haw ten, Cungnungbel Topa cu langpang haw hi.

⁸ Mahnaven a tepsa bangin hup leleng laih hi; A ngil mi a huham langtik nuamin,

⁹ Tuipisan cu thu a piak ten kangin; Leiko hum a hawhpih bangin a mihingte hawhpih hi.

¹⁰ A huatu tei lak pepanin, a ngal tei khut pen hup hi.

¹¹ Tui in, a ngal haw cu khuh khawngin, a suakca pa khat hei um haw ma hi.

¹² Mahnung bek ten a thutepmi umin, a lakah thangphatnak lasa haw hi.

¹³ Mahnaven ngeican um ngawlin, a bawlmi hempoh phawkngil lehin, Topa dong masa ngawlin na bawl haw hi.

¹⁴ Phillawnah tisa nopnak tuah dim haw in, Pathian khingkhai haw hi.

¹⁵ Mah hangin a nget haw mi cu na pia hi; Mah a piaknakah tha bo nat vang piacih hi.

¹⁶ Mah munlawnah Moses le Topa i mi thiangtho Aaron cu iksik haw hi.

¹⁷ Mah hangin lei khi in, Dathan cu thon hi. Abiram le a innkuate vui khawng haw hi.

¹⁸ Amuh zuitu tei lakah mei alh caksukin, Mah mipha ngawlte cu kang khawng haw hi.

¹⁹ Horeb ah sui tuah khuizuk bawl haw in, mah khui zuk cu bia haw hi.

²⁰ Pathian sunloihnak huham cu, hampa eitu nganhing tuah ai-awhtik haw hi.

²¹ Amuh pantu cu phawkngil haw in; Izipt ngam a nalamdang bawltu Pathian cu!

²² Izipt ngam a nalamdang bawltu le Tuipisan a thil thasiah huai bawltu cu!

²³ Mah hangin Pathian, ama mihingte cu siatsuah tum hi; Mahnaven a tenmi a sila Moses cu Pathian mai ah dingin, amuhte siatik tuk ngawlin Pathian thinuknak cu nemtik hi.

²⁴ Ngampha le ngamnop cu imah simsial haw ma hi; Pathian i thutepnak cu sang haw ma hi.

²⁵ Amuhte cu a puanbuk sung haw pen phun li haw hi. Topa i thu cu ngai nuam haw ma hi.

²⁶ Mah hangin tamsiatnak tuah ngallinnak pia hi. Phillawn ngamkhingah thi tuk uh ci.

²⁷ Na cano uhte cu umngawltu tei lakah khenkhek tung a, Miphun dang tei ngamah thi haw tuk ti hi.

²⁸ Pathian i mihing ten Peor i Baal biaknakah tel bok haw in hi. Nunnak nei ngawl, pathian dang lakah a piak haw mi, biakpiaknak tui le an ei bok haw hi.

²⁹ Mah hangin Pathian thinuktikin, A taksa hawah natsia heng hi. A cimkhamnak haw pen luattik hi.

³⁰ Mahnaven Finehas dingin misualte dantat hi; pulhnat cu cawl hi.

³¹ Mahti bangin Finehas i dehnak cu tuni tian phawk leleng haw hi. Kumkhua in ngaisung leleng haw tuk hi.

³² Meribah ciktui ah Topa a thinuktik haw; Amuh tei hangin Moses cu haksatnak tawk hi.

³³ Moses a thin a uktik leita haw hangin A ot tuk ngawl cawmin awn hi.

³⁴ Pathian thei ngawlte that khawng tukin Topa in thupia naven that haw ma hi.

³⁵ Pathian thei ngawlte tuah huaidunin A leihum daan haw cu zui haw hi.

³⁶ Pathian i mihing ten milim bia in, Amuhte awktu thangin suak hi.

³⁷ A canu le a capate cu pathian dang biaknak tukin pia haw hi.

³⁸ Sual nei ngawl thisan, Kanaan ngam pathian dang zuk biaknak tukin canu a capa tei thisan luangtik haw in hi. Mah thisan hangin mah ngam cu niintik haw hi.

³⁹ Mahti bangin a bawl haw hangin, Amuhte cu mi nawngkai hi haw in, Pathian mai ah mi suaksual na hi haw hi.

⁴⁰ Mah hangin Topa cu a mihing tei humah a thinuk hi. A tensa mitei humah a thin nop ma hi.

⁴¹ Leihum tei khut sungah zamin, a ngal haw ten uk haw hi.

⁴² Amuh huatu ten bawlsia haw in, a khutnuai ah thuak li haw hi.

⁴³ Vei izong lawlawm kaw Topa in, a pat tuk? Mahti thathahin sualnak sungah tum dedeuh haw hi.

⁴⁴ Mahnaven a aunak haw cu Topa in ngai hi. A haksatnak haw cu thei hi.

⁴⁵ Amuh tei ca ngaisungin, a thutep khotik hi. A ihnak a ngeng hangin a lungmu niamkhiat hi.

⁴⁶ A mihing thawngkhiatu tei lungmu sungah hehpihnak umtik hi.

⁴⁷ Topa, kohtei Pathian aw, pan zalin, miphun dadang tei lak pepan suah zalin hi. Na min thiangtho thangphat tuk ung a, lungdamin pahcawi tuk ung hi.

⁴⁸ Topa cu thangphat nung; Israel i Pathian cu! Tu le kumkhua in thangphat un! Mi hempohin “Amen” ti khawng haw hen. Topa cu thangphat un.