SAAM LABU 105 - Ngawm Bible

Pathian le A Mihingte

¹ Topa i lakah lungdam thu hilh unna, a min cu au pih un. A thil bawlmi cu miphun hempoh lakah hilh un!

² A lakah lasa unna, na lamdang a bawl mite cu phuang un.

³ Amata a hih uh hangin na lungdam un. Topa i nadektu hempoh na tha uh tui un.

⁴ Bopnak ngenin Topa i lakah hawh un; A mitmuhin um leleng un.

^5-6 Noh a sila Abraham i canaute, noh a ten mi Jakob i canaute, a nase zetmi le thasiahhuai A thil bawlmi le a thukhennakte cu cing leleng un.

⁷ Topa amah cu a Pathian uh hi; A thupiakmi cu leihum pumpi ca in hi.

⁸ A thutepmi cu kumkhua in zui tuk a, a thutep cu khang thawng khat tian zui tuk hi.

⁹ Abraham lak a thutep le Isaak lak a thutepmite cu kimtik tuk hi.

¹⁰ Topa in Israel lakah, kumkhua phatin thutepnak bawl hi; Jakob lakah kumkhua ca in thutepnak bawl hi.

¹¹ “Kanaan ngam nohte pia tung; Nangmuta hi tuk,” ti hi.

¹² Pathian i mihingte cu mi demno haw hi; Ngam sungah mi vakvaite haw hi.

¹³ Ngam khat pen ngamdangah thawn haw; Miphun khat lak pen phundang tei lakah thawn haw hi.

¹⁴ Mahnaven Topa in kuamah bawlsia tukma hi. Amuhte himdam tukin kumpi tampi liat hi.

¹⁵ “Ka ten mi ka silate tawngkha pahsuh un; Ka profette siatsuah pahsuh un,” tin Topa in ti hi.

¹⁶ Topa in, a an haw hempoh a laak khawng ten a ngamsung hawah paam tungtik hi.

¹⁷ Sal a zuakmi Josef cu a mai ah hah ham hi.

¹⁸ A ke cu thik taicin tuah keenin, a ngawngah thikkual khaih haw;

¹⁹ A thu hilhsa mi a kim laklawh cu; Topa i thu in midik a hih cu langtik hi.

²⁰ Izipt ngam kumpi pan Josef cu thawng pen hah hi. Minam tampi tei kumpi Josef cu suakcatik hi.

²¹ A ngam uknak hotubelin koih hi; A ngamsung hempoh uktu bawi in bawl hi.

²² Kumpipa i khutnuai bawi tei humah thuneihnak pia hi. A thudotmi tei hum hei ah thunei thei hi.

²³ Jakob cu Izipt ngamah hawhin, mah ngamah um hi.

²⁴ Topa in, a mihingte pungzaitikin, Amuh bawlsiatute sangin ngil sawtik hi.

²⁵ A mihingte hua tukin le a sila tei humah mipha ngawl hi tukin, Izipt mitei lungmu cu linglettik hi.

²⁶ A ten mi a sila Moses le Aaron hah hi.

²⁷ Pathian i nalamdangte bawl haw in, Izipt ngamah thil thasiahhuai bawl haw hi.

²⁸ A ngamsung hawah khuathim hengtik hi; Mahnaven Izipt miten a thupiakmi zui haw ma hi.

²⁹ A ngunpi haw thisanin cangtik khawngin, a ngasa haw thitik khawng hi.

³⁰ A ngam haw cu simphuk tuah dim khawng hi. A kumpipa haw i inn tianin dim hi.

³¹ Pathian in thupia in, a ngam haw cu tho le thosi tuah dim hi.

³² A ngamsung hawah nguah ai-in ngialzutikin khuapheleptik hi.

³³ Sabit kung le thei kungte siatsuahin, thingkungte ektuah khawng hi.

³⁴ Amah in thupia in khaaute cu; sialcelh ngawl hung haw hi.

³⁵ Ngam sung a thingceh le hampate ei khawng haw in; anpo hempoh ei khawng haw hi.

³⁶ Izipt mi innkua hempoh Capa upabel that khawng hi.

³⁷ Israel mite cu tulpih hi. Amuh ten a sui le ngun keng haw a, a venghawng haw in, tha ngil le midammi ngeh haw hi.

³⁸ Israel mite a tul haw ten, Izipt mite cu lungdam haw hi; Itahim titale a lauzet mite hi haw hi.

³⁹ Pathian in, a mihing tei humah meinimtik hi; Zanin vaknak piatu tukin meivaktik hi.

⁴⁰ A lakah ngen haw in vaniim pia hi; Vancung pen an pia in, khamzet ei haw hi.

⁴¹ Suangpi hongin tui puttik hi; Phillawnah lui bangin luang hi.

⁴² A sila Abraham nelah a thutep thiangtho cu cing leleng hi.

⁴³ A mihingte cu lungdam zetin tulpih hi. A tensa mite cu lasa le au thahin puitul hi.

⁴⁴ Miphun dang tei ngam cu a mihingte pia hi; A bun sa haw mi lo cu cotik hi.

⁴⁵ A mihing ten a daante zui in, a thukhamte a zui khawng tukin bawl hi. Topa cu thangphat un.