SAAM LABU 104 - Ngawm Bible

Semsuahtu Pathian Thangphatnak

¹ Maw ka nunnak, Topa cu thangphatin, Maw Topa ka Pathian, na thawmngeng dan! Upatnak le sunloihnak cu puan bangin silh ci a,

² Vaknak tuah thuam ci, Vante khi puanbuk bangin phalh ci a

³ Humlam tui humah na inn cu sa ci. Khawnim cu na cipuhlengin mang ci a, huih i ha humah khung ci,

⁴ Huihte cu na kamtai ah mangin, khuaphelep al cu na sila in bawl ci.

⁵ Leipi ponak a zung cu khoh zetin bawl ci a, thawn awng tukma hi.

⁶ Tuipi cu leihumah puan bangin phalh ci a, tui in mualte khuh hi.

⁷ Mahnaven tui cu na liat ten tai haw hi; Na thupiakmi aw a zak haw ten, manlang zetin tai haw hi.

⁸ Mualhum pen dawksukin munlawnah tai haw hi. Amu ca in, na bawlsa mi mun zuan haw hi.

⁹ Leihumah tuihautungleh tuk ngawltohin, a kaltan theih tuk ngawlmi n gituah bawlsak zo ci.

¹⁰ Cikte cu luam sung pen puttik ci. Mual laklawh pen tui luangtik ci.

¹¹ Tui ten ngamsa phunkim tui pia haw in, Hampalak a, laak hei in, a dangdum phatik hi.

¹² Tuimawk a thingkung humah, vano ten bu sa in lasa haw hi.

¹³ Van pen mual humah nguahzutik ci. Leihum cu na muicu in dim hi.

¹⁴ Nganhing tei ca in hampa tawttik ci a Mihing ca in thingkung le hampa potik ci; anci ciingin hi.

¹⁵ A lungnoptiktu tukin sabit, a lungdamtiktu tukin olif situi le a tha ngiltiktu tukin an bawlsak ci.

¹⁶ A phutsami Topa i thingkung, Lebanon a, sidar thingkung pen nguah tampi ngah hi.

¹⁷ Mahlai ah vano namkimin bu bawl haw hi. Mahnaven vaca in cakthing humah a busa hi.

¹⁸ Sathakte cu mualsang humah um haw in, meicante cu lianglakah ngelh haw hi.

¹⁹ Ha sialnak tukin hade bawl ci a, ni vangin tum hun thei hi.

²⁰ Zan bawl ci a, khuathim lakah ngamsa hempoh tul haw hi.

²¹ Pawpino cu an a zei haw laih takin hawkin, Pathian i piakmi an zei haw hi.

²² Ni a suah ten pinleh haw in, amu kua tekah bok haw,

²³ Mihingte cu nadek tukin hawh haw, zanlam tian nadek haw,

²⁴ Maw Topa na bawlmi hi tamzet hi. Cihnak tuah bawl khawng ci. Leihum cu na bawlmi nganhing tuah dim hi.

²⁵ Tuipi thuanthum cu ngeng zetin zalzet bok hi. sialcelh ngawl nganhing a ngeng a neu in, a sungah um haw hi.

²⁶ A humah lawngte hawh haw in, na bawlmi a lauhuai ngamsa, Leviathan cu a sungah um hi.

²⁷ A venghawng haw in n angmah cu muang haw. eih haw hun ten an ngah tukin hi.

²⁸ An pia ci a ei haw hi; Na khutin an pia ci, a von haw vah hi.

²⁹ Langkhat lam na heksan ten a thinsu haw; A haihawh haw na laksak ten thi haw in, A semsuahnak lei ah kikleh haw hi.

³⁰ Mahnaven haihawh na piak ten nung haw hi; eihumah nunnak thak pia ci.

³¹ Topa i sunloihnak huham cu kumkhua in kho zal hen. Topa cu a bawlsa mi humah a lungdam zal hen.

³² Topa in zo in lei cu hing hi. Mualte zenin meikhu tul hi.

³³ Ka nunsung hempoh Topa i lakah lasa tung. a dam sung hempoh Topa thangphatnak lasa tung.

³⁴ Topa cu ka nelah lungdam tahen. Itahim titale ka lungdamtik hi.

³⁵ Misualte cu leihum pen thamthong haw tahen; ipha ngawlte cu umleh haw ma toh hen; Maw ka nunnak, Topa cu thangphat un! Topa cu thangphat un!