SAAM LABU 103 - Ngawm Bible

Pathian i Itnak

¹ Maw ka nunnak, Topa cu thangphatin hi. A sung a ummi hempohin, a min thiangtho cu thangphat un.

² Maw ka nunnak, Topa cu thangphatin, A phatnak hempoh phawkngil pahsun.

³ Amah in ka sualnak hempoh zahin, ka natnak hempoh damtik hi.

⁴ A thukmi khan pen suahin; itnak le hehpihnak tuah kei muicu pia hi.

⁵ Ka nunnak cu thilpha tuah dimtikin, Muvanlai bangin cak le tangzangin um ing.

⁶ Topa in bawlsiat a thuaktu tei lamtangin thu khen hi; A man mi bangin bawlsak hi.

⁷ A tuptah mi cu Moses lakah hilhin, thil a tih theih daan cu Israel lakah langtik hi.

⁸ Topa in hehpihnak le hehpihnak nei hi; A thinduai in itnak tuah dim hi.

⁹ Miliat leleng tukma hi, Kumkhua in, a thinuk bok tukma hi.

¹⁰ A thuak tuk uh zahin thuak tuk phal ma hi, A sualnak uh le a mawhnak uh zahin dantat ma hi.

¹¹ Itahim titale van cu leihum sangin a sang saw bangin, Amah a kihcatu tei ca in, a itnak cu sangzet hi.

¹² Nisuahnak cu nitumnak pen, a khawlazet bangin, A sualnak uhte cu eimu lak pen, khawlazetah koih hi.

¹³ Pa in, a cate cu, a hehpihzet bangin, mah bangin Topa in, amah a kihcatute cu hehpih hi.

¹⁴ Itahim titale amah in, a taksa uh semsuah daan cu thei in, leivul a hihlam uh thei leleng hi.

¹⁵ Mihing i nunnak cu hampa bang hi; Khangto in hampa lak a, pak bangin pak hi.

¹⁶ Huihin mutin paithongta hi, Kuamah in muleh haw ma toh hi.

¹⁷ Mahnaven amah a upattu tei ca in, Topa i itnak cu, kumkhua in kho in,

¹⁸ A thutepnak bangin a nungtu le A thutep bangin a zui lelengtu ca in A phatnak cu khang tawntungin kipkho hi.

¹⁹ Topa in, a kumpi khunnak cu vancungah koihin, amah cu ihempoh i humah kumpi hi.

²⁰ Maw vancungmite, noh mi ngil le thil ti theite, A awn ngai in, a thukham a zui tute, Topa cu thangphat un.

²¹ Maw van ngalkapte ama deihmi a bawlsak tute le ama na a dektute, Topa cu thangphat un.

²² Topa i semsuah mite, a uk sung khua hempoh a ummite, Topa cu thangphat un, Maw ka nunnak, Topa cu thangphatin hi.