SAAM LABU 102 - Ngawm Bible

Haksatnak Thuaktu i Thungetnak

¹ Maw Topa ka thu ngetnak ngai inna, bopnak ngenin ka aunak cu thei zalin hi.

² Haksatnak ka tawh ten, ka lak pen ngelh pahsun. Keimah thei inna, ka sam ten manlang zetin donin hi.

³ Ka nunnak cu meikhu bangin pai hi; Ka taksa cu meikang bangin kang hi.

⁴ Kei cu vatvawk haw in hampa bangin thim ing; An hei ei nap lehma toh ing.

⁵ Nase zetin tau lawluang ing. Ka nguh le ka vun bek tang.

⁶ Phillawn a, nga man vano bang hi ing hi; Taisan zo mi khualop a, simbu bang ing.

⁷ Hihbu thei ngawlin hak ing; Innkuul hum a vano lungleng bang ing.

⁸ Thalengin ka ngal ten kei zawnsak haw; Cekpan bawlnakin kei a mangtu ten ka min cu mi tamsiatnakin mang haw hi.

⁹ Na thinuknak le na thin pulhangnak hangin, Ka an cu vut hi.

¹⁰ Ka inmi vang ka hitui tuah tokhel khawng hi. Nangmah in kei cu cawi in vawk tul ci.

¹¹ Ka nunnak cu taaklam a nilim bang hi; Hamko bangin thim ing.

¹² Mahnaven maw Topa, nang cu kumkhua in kumpi hi ci. Khang khat nung khang khat nang cu thei leleng haw tuk hi.

¹³ Tho tuk ci a Zion cu hehpih tuk ci; Zion hehpihnak hunpha cu hengta hi. Tu hun hi hun lemcangbel hi.

¹⁴ Na sila ten Zion khuapi a sia ceng toh vangin mahel leng haw hi. Hehpih zetin, a leivul tianin lainazet haw hi.

¹⁵ Minam hempohin Topa cu lau haw tuk hi. Leihum kumpi hempohin, a huham cu kihca haw tuk hi.

¹⁶ Topa in Zion khuapi a tundinleh ten, ama thawm ngengnak cu langtik tuk hi.

¹⁷ A taisan zo mi a mihing tei aw cu thei tuk a, a thungetnak haw cu ngai tuk hi.

¹⁸ A hing tuk laihmite hei in Topa a thangphat theihnak haw tukin Topa i bawl mite cu khangleh tei ca lai in ngan un.

¹⁹ Topa in, a sangmi a mun thiangtho pen zo hi; Vancung pen leihum cu zo hi.

²⁰ Thawngta mitei taunak thei tukin le, thi tukin thukhen sa mite luattik hi.

²¹ Ngam hempoh pen, mihingte hung khawmin, Pathian a biak haw hi.

²² A min cu Zion ah than haw tuk a, Jerusalem pen thangphat haw tuk hi.

²³ Ka khanno laihin Topa in ka thakiamtik hi. Ka nunnak comtik hi.

²⁴ Maw ka Pathian ka tek lai ngawlin, ka nunnak la hih pahsun. Topa aw, nang cu kumkhua in, a nungmi hi ci.

²⁵ Tanglaihin leipi piangtik ci a, na khutzung tuah vante hi semsuah ci.

²⁶ A venghawng haw in pai khawng haw tuk hi. Mahnaven nang cu kumkhua in kho tuk hi. Puan bangin thek tuk ci a, pai lalthong khawng haw tuk hi.

²⁷ Mahnaven nang cu nangmah leleng ci; Na nunnak cu bo tih ni nei ma hi.

²⁸ Ka cate uh ngamlum zetin um haw tuk a, a casuante cu nangma hupnak nuai ah kumkhua in um haw tuk hi.