SAAM LABU 10 - Ngawm Bible

Dikcang Tukin Thungetnak

¹ Topa aw, itakaw khawlapi ah na um leleng? Ita, ka haksat hun uhten ngelh cim?

² Mipha ngawlte cu tuangkhawng le ultungzet haw in, mi ca-ngahte zawnsakin bawlsia haw hi. Amu siah sa mi thangin awkdun cop zal tahen.

³ Mipha ngawl ten a ngaihsutnak pha ngawl khi ultun pihzet haw hi. Mi hampumin Topa cu tamin lawl hi.

⁴ Mipha ngawlin Topa cu imah simsial ma hi. Pualthau in, “Pathian ka kulnak umma,” ti hi. A ngaihsutnak hempoh ah, Pathian tel ma hi.

⁵ A thil bawlmi hempoh ah lawhting hi; Pathian i thukhennak cu a theihbat mi hi ma hi. A ngalte cu nuihcip bek hi.

⁶ A lungmu sungno in, “Hansam awng tuk mang; Ituk mahten haksatnak tawk tuk mang,” ti hi.

⁷ A kam cu tamsiatnak, zolthu sonnak le mitawhnak tuah bekin dim hi; Midang tei huat tukmi le awn pha ngawlte awn tukin a lei cu manlangzet hi.

⁸ Khua hempoh ah ngelh hi; Mahlai mun pen mi pangin misual ngawlte vang that hi. Zotnak tuk nei ngawlte zonimin pang kuh hi.

⁹ Kiosa bangin a ngelhnak mun pen mi pang hi; a thah tuk mite pang hi. Mi ca-ngahte pangin, a thang tuah awkin thiakvawkta hi.

¹⁰ Imah tithei ngawlte cu thahnak thuak haw hi; Mi ngil ten hual niknek haw hi.

¹¹ Mipha ngawl ten, “Pathian in mihing cu imah simsial ma hi. A mitsingin mu tukma hi,” ti hi.

¹² Topa aw, hung inna, kei hu panin; Maw Pathian aw, mi haksate phawkngil pahsun.

¹³ Itin kaw mipha ngawlin Pathian zawnsakin, “Pathian in kei bawlsia tukma,” a tih theih?

¹⁴ Mahnaven nangin mu leng ci; A thuaknak haw le a lungsiatnak haw cu mu ci. Amuh bawm tukin na zuancum awng ma ci. Imah tithei ngawltu in, na lakah a nunnak pia hi; Pa nei ngawlte bawmtu cu nangmah ci.

¹⁵ Misual le mi ngilo tei tha ngilnakte siatsuah khawngin, Sualnak a bawlleh haw tuk ngawl tianin dantatin hi.

¹⁶ Topa cu kumkhua in kumpi hi. Mah hangin Pathian thei ngawlte cu, a ngamsung pen paithong haw tuk hi.

¹⁷ Topa aw, lungnem tei thungetnak cu thei ci; a lungmu haw ngiltik ci.

¹⁸ Mihingin thinsuk launak a piantik ngawlnak tukin, Mi haksa le nu le pa nei ngawl mi ca-ngah tei, aunak cu theihpih inna, a muhte panin thu khen zalin hi.