RUTH 3 - Ngawm Bible

Ruth In Pasal Tawk

¹ Mah nungten Naomi in Ruth lakah, “Ka canu, pasal nei tukin le inn pa khat na neih theihnak tukin ngaihsutsak tung hi.

² Na theih bangin, a numei nadehpih tuah na nadehnak lo neitu Boaz cu eimu sangngampa hi. Atu-in ngai inna, amah cu tu taklam ten barli cangcilnakah cangcil tuk hi.

³ Mah hangin tuibual inna, namtui noihin, na van a phabel silhin hi, mahten cangcilnakah hawhin, mahnaven a in, a eih laihngawl sung cu mahlai na umlam thei kha ma hen.

⁴ A zaunak tuk phano sialsiah inna, a hihbuh sawng ten a puan hongin, a kebulah zau in hi. Amah in, na bawl tukmi hilh tuk hi.”

⁵ Ruth in, “Na tih bangin bawl paih nang,” tin ti hi.

⁶ Mah hangin Ruth cu cangcilnak munah hawhin, a teknu i hilh bangin bawl khawng hi.

⁷ Boaz cu a in, a eih celh ten nopsa zetin barli cangtel tampi a koihnak hawah zau in hihbu hi. Ruth in ti dedenno Boaz i puan hongin, a kebulh zau bok hi.

⁸ Zan khuanu deuh ten Boaz cu khanglo to lokin, a kebul a zau lengmi numei amuh ten,

⁹ “Nang akua nge cim,” tin dong hi. “Na umlawhnu keimah Ruth ing hi, bawipa,” tin don hi. “Itahim titale na unaupih naino hi ing a, keimah cingkhawitu tuk na hih hangin na puan hu zawnin,” tin Ruth in ti hi.

¹⁰ Boaz in, “Pathian in, na humah thupha pia tahen,” tin ti hi. “Na teknu Naomi hum a, na bawlmi hangin unau itdunnak langtik sesem ci. Mihau hei hihen, ca-ngahte hei hihen, tangval saw deuh tih hei in pasal zei ma ci.

¹¹ Atu-in, imah lau pahsun, numei pha na hihlam vang, khuapih ten thei khawng haw hi.

¹² Na tih bangin na unau ngangai ung. Mahnaven keimah sang a nai saw pa khat umlaih,

¹³ Tu zan cu hilai ah ngiak hih inna, zingten mahmi pa in dehvo la thei tuk maw, la thei tuk ngawl him tih sonciangleh nung. Amah in dehvo a la thei tale pha, a la thei ma tale keimah in dehvo la tung, tin, a nungmi Topa i minin thutiam ing.

¹⁴ Mah hangin a zing khuavak tian a kebulah zau naven, a elah Ruth zau tihmi Boaz in kuamah thei tuk a deih ngawl hangin,

¹⁵ “Na angki hum silhmi dukin, hilai ah phalhin,” tin ti hi. A tih bangin a phalh ten Boaz in barli cang seu luk sungin a ko humah suan hi.

¹⁶ Inn a hen ten a teknu in, “Ka canu iti bang um kam” tin dong hi. Ruth in, Boaz i bawlmi le sonmi thu hempoh hilh khawng hi.

¹⁷ Mahbek sial ngawlin, “Khut thacang pintuk phal ngawlin barli cang seu luk pia in pintik,” ti hi.

¹⁸ Naomi in “Ka canu, thu a ciang laih ngawl sung cu, ngimtano in um poh inna, hi thu cu tu sun ten Boaz in son ciang tuk poh,” ti hi.