ROM Khua Khristian Tei Lakah Paul i Laikuat (Paul’s Letter to the Romans) 8 - Ngawm Bible

Hawvang Tuah Nun

¹ Atu-in Khrih Jesuh tuah a pehdun mitei ca in sual thukhennak pen luat zo haw toh hi.

² Itahim titale Khrih Jesuh tuah pehzopnak hangin nunnak a piatu Hawvang daan in sualnak le thihnak daan sung pen luattik zo hi.

³ Mihing hihnak hi a nawmtam leita hangin daan i bawl theih ngawlmi khi Pathian in bawlsak hi. Ama Capa loli pia in, mihing hihnak sung a ummi sualnak khi thukhennak pia hi; mah a Capa cu sualnak bothaltik tukin mihing hihnak tuah hung hi.

⁴ Hitih bangin Pathian in, na a dehnak cu mihing nundanin nung ngawlin Hawvang i deihnakin, a nungmi ohtei sungah daan i deihnak kimtik a hihnak tukin hi.

⁵ Mihing deihnakin a ukmi tei lungmu cu mihing hihnak i deihnakin uk hi. Hawvang i deihnak bangin a nungmi tei lungmu cu Hawvang i deihnakin uk bok hi.

⁶ Mihing hihnak i uk mitei tawh tukmi, cu thihnak hi; Hawvang i uk mitei co tukmi cu nunnak le lemdaihnak hi.

⁷ Mah hangin mi pa khat mihing hihnak i ukmi cu Pathian i ngal hi; itahim titale Pathian i daan zui ma hi; a zui nuam ngawl thong hei hi ngawlin a zui thei ngawl hi.

⁸ Mihing hihnak daan a zuitu ten Pathian lungdamtik thei haw ma hi.

⁹ Mahnaven nohte cu na mihing hihnak uhin nung ma uh ci; Pathian i Hawvang cu nangmu sungah a um tatak tale Hawvang i hilh bangin nung saw tuk uh ci. Kua hei hihen Khrih i Hawvang a nei ngawltu cu Khrih ta hi ma hi.

¹⁰ Khrih nangmu sungah a nung tale Hawvang cu nangmuh tei ca in nunnak hi; itahim titale sualnak i hangin na pumpi uh cu thi tuk naven nohte cu Pathian tuah lemduntikmi hi zo uh ci.

¹¹ Thihnak pen Jesuh a thotiktu Pathian i Hawvang nangmu sungah a nung tale thihnak pen Khrih a tho lehtiktu Pathian in nangmu sungah a Hawvang a umtik hangin a thi thei mi na taksa pumpi uh cu nunnak pia bok tuk hi.

¹² Mah hangin ka u le naute aw, mihing hihnak i deihzawngin, a nung tuk hi ma hung hi.

¹³ Mihing na hihnak uh i deihzawngin, na nung uh tale thi tuk uh ci; mahnaven sualnak na bawl mekmi uhte khi Hawvang i bopnakin, na that uh tale nung tuk uh ci.

¹⁴ Pathian Hawvang i lampui mite cu Pathian i cate haw hi.

¹⁵ Itahim titale Pathian i piakmi Hawvang cu sila in, a bawltu Hawvang kha ma hi; a lau li tukin a bawltu Hawvang hei hi kha ma hi. Mah Hawvangin Pathian i cate in bawlin, Pathian nelah, ka Pa, ka Pa tin, a au theihnak uh thazaang a piatu hei cu Hawvang hi.

¹⁶ Mahtin a au uhten Pathian i Hawvangin eimu hawvang pehzomin Pathian ca a hihnak uh khi ciangtik hi.

¹⁷ Ca a hih uh hangin Pathian in, a mihing tei ca in, a koihsami thupha a cotu tukte hung hi; mahten Pathian in Khrih ca tukin a koihsami vang Khrih tuah co langkhat tuk hung hi. Itahim titale Khrih thuaknak a thuak boktu ahi uh tale, a thawm ngengnak vang co bok tuk hung hi.

Mailam Vangletnak

¹⁸ Atu hun a haksatnak a thuak uhmi hi eimu lakah a langleh tuk laihmi sunlawinak tuah tehkip takin ngaisung hihim mang hi.

¹⁹ Siammi hempohin Pathian i a cate a langtik tuk khi ngakhel mahtak haw hi.

²⁰ Itahim titale siammi na hempoh tei tuptahmi cu a lalthong tukin teksa hi. Mahmi cu amu nuam thu hi ngawlin Pathian i deihnak hi. Mahnaven muansan tuk umlaih hi.

²¹ Ni kha khat ten siammi hempoh hi a lalthong tukmi saltannak pen luattik khawng hi tuk a, Pathian ca tei comi a sunglawi luatnak cu coleh bok haw tuk hi.

²² Tuni hun tianin siammi hempoh ten nauhing tuk tau bangin a tau haw cu thei hung hi.

²³ Siammi bek hi ngawlin Pathian i laksawng masabel Hawvang a cotu le a tep hamtu ohte vang taksa pumpi luatnak tukin le Pathian i ca a hih theihnak tuk ngakin, a sunglam uhin tauli bok hung hi.

²⁴ Itahim titale muansannak bek tuah nunpatmi hung hi. A muansan uhmi khi amu thei uh tale muansannak ngangai hi ma hi. Kua kaw a mitin, a muh theihmi cu a muansan awng?

²⁵ Mahnaven amuh uh ngawlmi muansan ahi uh tale thinsau in ngak lo hung hi.

²⁶ Mahti bangbok lengin oh cu a nawmtammi a hih uh hangin eimuh bawm tukin Hawvang heng hi. Itahim titale, itin kaw thunget tuk tih hei a theih uh ngawl laihin, awnah hei a tul thei ngawlmi a taunak uh cu Hawvangin Pathian nelah ngetsak hi.

²⁷ Eimu lungmu a mutu Pathian in Hawvang i ngaihsutmi cu thei hi; itahim titale Pathian i deihdanin, a mihing tei ca tukin Hawvangin Pathian nelah ngetsak hi.

²⁸ Ihempoh ah Pathian in amah a ittu le ama tuptahnak bangin a sammi tei ca in, a phatnak haw tukin nadek hi tih cu thei hung hi

²⁹ Pathian in, a tensa mite cu a Capa bang tukin a dangno in koih hi; mahten unau tampi lakah a Capa cu pa khatnak a hihnak tukin hi.

³⁰ Mah hangin Pathian i a dangno in, a koihsa mite cu sam vang sam hi. Mahten a sammite cu thiancotikin, a sunlawinak vang cu pia bok hi.

Khrih Jesuh Sung Pen Pathian i Itnak

³¹ Hite hempoh a theih nung uhten ikaw a hilh hih tuk uh? Pathian eimu lamah a tang tale ohte akua in langpang thei tuk him?

³² A dodaltu cu Pathian kha ma hi, a Capa neihcalamno hei khawih ngawlin eimuh venghawng ca in pia zo hi! Ama Capa loli hei a pia tale thil dangte hi a thawnthongin pia tukma maw?

³³ Pathian i tenmi a mihingte cu akua in kaw sual a not theih haw tuk? Pathian amah hei in, a sual haw mai zo hi tin thu than hi!

³⁴ Akua in kaw sual a nawn tuk? Khrih Jesuh in mawhsiat tukma hi; amah cu eimuh tei ca thi in thawhlehtik a hih nungten Pathian i taklamah umin, eimu ca in Pathian nelah ngetsak hi.

³⁵ Mah ahi tale, akua in kaw Khrih i itnak pen a khen thei tuk? Haksatnak, thuaknak, bawlsiatnak le ngilkialnakin hihen, zawngkhal tingsapnak, launak le thihnak ten khen thei haw a ni maw? Khen thei haw tukma hi!

³⁶ Lai Thiangtho sungah. “Nangma hangin thih theih launakah um leleng ung, ngawh tuk koihmi tuu bangin bawl haw hi,” tin um hi.

³⁷ Hiti bang hi napi in, ohte a ittu i hangin hi thil hempoh i humah nehtu hung hi.

³⁸ Itahim titale ama itnak pen imah in khen thei tukma hi, thihnak hihen, nunnak hihen, vancungah a ummi vancungmi, uktu le huham neitu hihen, atu khan le mailam khanah hei hihen,

³⁹ leihum le leinuai ummi hihen khen thei haw tukma hi. A Topa uh Jesuh Khrih hangin Pathian i itnak pen a khen theitu tuk siammi sung hempoh pen imah umma hi.