ROM Khua Khristian Tei Lakah Paul i Laikuat (Paul’s Letter to the Romans) 6 - Ngawm Bible

Sualnakah Thi, Khrih Ah Nung

¹ Mah tale itin ti kam nung? Pathian i hehpihnak khang sesem hen tin sualnak bawl dedeuh tuk laih hung maw?

² Bawl hihim tukma hung. Sualnakah thi ceng zo a hih uh hangin, itin kaw a sungah a umleh theih tuk toh uh?

³ Khrih Jesuh tuah pehzomdunnak sungah phumcih zo a hihnak uh hi, a thihnak sungah vangin phumcih hi zo hung hi tih cu phawkngil zo uh cim?

⁴ Tui sungah a phum uhten amah tuah phumcih hi hung hi, a thihnakah thi bok hung hi; mahti bang bokin Pa i sunloihnak huhamin Khrih cu thihnak pen a thawhtik bang bokin eimuh vang a thakin nung bok tuk hung hi.

⁵ A thihnakah amah tuah a thi langkhatmi a hih uh hangin thihnak pen thawhlehtik a hihnak uhah eimuh vang cu amah tuah tho langkhat bok hung hi.

⁶ Mahmi cu sualnak tuah a dimmi a nun lun uh i cahnak huham cu bo khawng tuk tihnak hi. Sualnak i sila hi lehma toh hung hi.

⁷ Itahim titale mi pa khat cu a thih ten sualnak huhamin, a humah thunei lehma toh hi.

⁸ Khrih tuah a thih langkhat uh hangin, nunah vang amah tuah nung langkhat tuk hung tin um hung hi.

⁹ Khrih cu thihnak pen thawhlehtik a hih zo bangin thileh tukma toh tih cu thei hung hi; thihnakin, a humah thunei ma toh hi.

¹⁰ Mahten a thih zo hangin sualnakin ukleh thei ma toh hi. Atu a nunnak cu Pathian tuah pehzomin nung hi.

¹¹ Mahti bang bokin nangmuh vang sualnak lam pen mithi hung tin ngaisung bok unna, nunnak lam thu ah Khrih Jesuh i hangin Pathian tuah phialdunin nung hung, tin ngaisung un hi.

¹² Tisa nuamnak khi zui tuk ngawlin a thi theimi na taksa uh khi sualnakin ukleh ma toh hen.

¹³ Na pumpi hum uh a, a ummi thil dangte vang cu thilpha ngawl sual bawlnakin mang pahsuh un. Mah sangin thihnak pen nunnakah thawhlehtikmi na hih uh bangin, na ihempoh uh Pathian nelah pia saw unna, na nunnak uh a venghawngin thilpha bawlnakin mang saw un hi.

¹⁴ Sualnak cu nangmuh uktu bawi hi lehma toh hen; itahim titale daan nuai ah umleh ngawltohin, Pathian hehpihnak nuai ah nung zo uh ci.

Dikcangnak i Sal

¹⁵ Mah ahi tale itin tuk kaw? Daan nuai ah um ngawlin Pathian i hehpihnak nuai ah a um uh hangin sual bawl tuk laih hung maw? Bawl hihim tukma hung!

¹⁶ Noh ten mi pa kha khat i lakah a umlawh le a thungai tukin na pia uh tale a thu na ngaih uhmi cu nangmu bawi hi a, nohte cu a sila hi uh ci; mahmi cu ciang zetin thei zo uh ci. Sualnak i thu na zui uh tale sualnak i suahpihmi cu thihnak a hih hangin thihnak thuak tuk uh ci; mahnaven Pathian thu na zui uh tale Pathian thu zui hangin a suahpihmi cu lemdaihnak a hih hangin Pathian tuah lemdunnak co tuk uh ci.

¹⁷ Mahnaven Pathian nelah thangphatnak um tahen! Itahim titale nohte cu sualnak i sila hi awng zo nave uhcin atu-in zilhnak na ngah uhmi sung a thutak khi na lungmu hempoh tuah zui zo uh ci.

¹⁸ Sualnak pen luatin diknak i salin cang zo uh ci.

¹⁹ (Na theih theihnak tukin nisial man mi awn mang ing hi!) Ni dangin, a pha ngawlmi bawlnakin, na pumpi uh cu a ninmi le a pha ngawlmi sila in piadun uh ci. Mahti bang bok lengin atu-in, a thiangthomi bawlnak tukin na pumpi uh cu a venghawngin diknak i sila hi tukin pia un hi.

²⁰ Sualnak i sila na hih laih uhin dikcangnak i ukmi hi ma uh ci.

²¹ Mahnaven sualnak i sila na hihnak uhin, a met na ngah uh neuno beek um maw? Imah ngah ma uh ci. Mah bang thil sual na bawlnak uh hangin atu-in, na ngah uhmi cu zakca in, na umnak uh hi.

²² Mahti bangin thil sual i thaman cu thihnak hi! Mahnaven atu-in sualnak pen luattik hi zo uh ci, Pathian i sila in cang zo uh ci. Na met uhmi cu Pathian nelah nunnak na ap khawng uhmi nunnak thiang hi, mahmi i a suahpihmi cu kumkhua nunnak hi.

²³ Itahim titale sualnak i thaman cu thihnak hi; mahnaven Pathian i laksawng cu a Topa uh Jesuh Khrih tuah a pehzopnak uh hangin kumkhua nunnak hi.