ROM Khua Khristian Tei Lakah Paul i Laikuat (Paul’s Letter to the Romans) 3 - Ngawm Bible

¹ Mahti bang ahi tale Judah mite hi Gentail tei humah a cuangcungnak haw um maw? Vuncep a tannak haw khi i poh a man neih cuangnak um maw?

² A phunkimin, a cuangcungnak haw cu um hi. Amasabelin Pathian in, a Thuthangpha cu Judah mite cingkhawitik hi.

³ Mahnaven Judah mi khenkhat muantak ngawlin a um haw ahin i cang kam ni?

⁴ Pathian vangin amu humah muantak ngawl hi bok ni maw? Mahtin hi ma hi! Mi hempoh zolthu sontu ngeh ahi haw hei in, Pathian cu a manmi le muantakmi hi tuk hi, Lai Thiangtho in: “Na ot ten na otmi man hi tih langtiknak tukin le thukhen ten na neh theihnak tukin,” ti hi.

⁵ Mahnaven thilpha ngawl a bawl uhmi in Pathian i thudik a hihnak cu cangcian zetin, a langtik tale itin tuk kaw? Pathian in nun a hilh ten sual hi tin tituk hung maw? (Mihing daan in hilh ing hi.)

⁶ Ti hihim pahsun! Pathian cu man hi; a man ma tale itin kaw leihum thu a khen theih tuk?

⁷ Mahnaven ka thutak ngawlnakin Pathian sunloihnak saw ah na dekin, a thutak khi langciangtik saw ahi tale itin tuk him? Itakaw keimah lehlam misual tin mawhsiatnak ka co?

⁸ Itin kaw, “A phami lang tukin a pha ngawl bawl tuk hung,” tin, a tih uh ngawl? Mi khenkhat ten mahtih bangkekin hilh ci tin nawnin zawnsak haw hi. Mahti bang mihingte cu mawhsiat tak a hih haw hangin mawhsiat hi haw tuk hi.

Midik Kuamah Um Ma

⁹ Mah ahi tale Judah mi a hihnak uhah Gentail mite sangin a phat cuangnak uh umma maw? Um hihim ma! Ciang zetin ka langtik zo bangin Judah mi hihen, Gentail mi hihen, a venghawng uhin sualnak i huham nuai ah um khawng hung hi.

¹⁰ Lai Thiangtho in, “A dikcangmi kuamah umma hi, pa khatno hei umma hi.

¹¹ A cipmi pa khat hei umma hi; Pathian biatu hei umma hi.

¹² A venghawng haw in Pathian lak pen lam pial khawngin, lampi dang zui khawng zo toh haw hi. Kuamah thuman a bawltu um haw ma hi, pa khatno hei umma hi.

¹³ A awnkam haw cu thihpih takmi mizolnak ngeh hi. A lei haw pen a lauhuaimi zolthu sonnak tul hi. A muk haw pen thihsi, ngul ngu bang tul hi.

¹⁴ A ot haw tale tamsiatnak ngehin dim hi.

¹⁵ Mi siatsuah tuk le mi thah tuk lamah zuan ngangzet haw hi.

¹⁶ A hawhnak haw hempoh ah siatlalnakin zui hi.

¹⁷ Lemdaihnak lampi thei awng haw ma hi;

¹⁸ Pathian kihcaknak nei cuang awng haw ma hi,” tin a tih bang khin hi haw hi.

¹⁹ Atu-in Daan sung a thupiakmi hempoh cu Daan i delhcih mitei ca in hi, tih thei hung hi. Mahmi cu kuamah i phaat theih tuk ngawlin le lei buppi hi Pathian i thukhennak nuai ah henpih tukin hi.

²⁰ Itahim titale kuamah in Daan zuinak hangin Pathian mai ah dikcangnak ngah thei ma hi. Daan i nadehnak cu mihing tei sual theihtiknak bek hi.

Pathian In Lemnak Bawl

²¹ Mahnaven atu-in Pathian in Amah le mihing tei laklawhah daan zuinak hangin hi ngawlin lemdunnak lampi langtik zo hi. Mah lampi cu Moses Daan le profet tei tettikhanmi hi naven, Daan tuah i mamah sengdun ma hi.

²² Jesuh Khrih a upnak haw i hu le thawm hangin Pathian in mihing tuah lemnak bawl hi. Khrih a umtu hempoh ca in hi bangin Pathian in bawl hi;

²³ Mah hangin deidat dunnak imah umma toh hi; a venghawng uhin misual hung a, Pathian i sunloihnak co baan ma hung hi.

²⁴ Mahnaven eimuhte a luattiktu Jesuh Khrih i hangin Pathian in, a hehpihnak laksawng cu pia in, amah tuah lemdunnak bawlsak zo hi.

^25-26 Pathian in Jesuh Khrih i thisan hangin, misual ngaihdamnak a um theihnak tukin a tuptahmi hi, mah ngaihdamnak cu amah upnak hangin ngah haw tuk hi. Pathian in hi bang thil a bawlmi hi Ama diknak a langnak tukin hi. Nidang laihin Pathian cu a thinsau in, mihing tei sualnakte kinmawh ngawlin um san thong hi. Mahnaven atu-in ama diknak khi langciang tukin mihing tei sualnak cu mu thong thei lehma toh hi; mahtih bangin a diknak cu langtikin, mahten a umtu hempoh diknak cotik hi.

²⁷ Mah ahi tale i poh tuangkhawn tuk nei hung maw? Um hihim ma hi! I hangin kaw? Daan a zui uh hangin maw? Mah kha ma! A upnak uh hangin hi.

²⁸ Itahim titale Daan i thupiakmi zui hang hi ngawlin upnak bek hangin mihing cu Pathian tuah lemdunnak um hi; tih hi ka thu khupnak hi.

²⁹ Mah ma tale Pathian hi Judah mite bek i Pathian maw? Gentail mitei Pathian bokma maw? Hi zuh hi, Gentail tei Pathian hei hi bok hi.

³⁰ Pathian cu pa khat hi, Judah mite cu a upnak haw hangin Amah tuah lemdun lehtik tuk a, Gentail mite vang a upnak haw hangin Amah tuah lemduntik tuk hi.

³¹ Mah ahi tale hi upnak hangin Daan cu vawkta hung tihnak hi tuk maw? Mahtin kha ma hi, Daan khotik saw hi.