ROM Khua Khristian Tei Lakah Paul i Laikuat (Paul’s Letter to the Romans) 16 - Ngawm Bible

Bulpak Nuksatnak

¹ Kenkhria khua pawlpi, a nadektu a celnu uh Fibi hi na theih tukin deih ing.

² Pathian umtu tei deh tukmi a hih bangin Topa i minin amah cu cosang unna, bopnak a kul tale bawm un. Amah hi mi tampi ca hei hihen, keima ca hei hihen ngualcam pha le mi nemcuam zetmi hi.

³ Khrih Jesuh nadehnakah, ka nadehpih Priscilla le Aquila nuksat ing.

⁴ Amuh cu keima ca in thih a ngam mite haw hi. Amu humah lungdamnak tampi nei ing. Keimah bek hei hi mang hi, Gentail pawlpi a venghawng haw in amu humah lungdam em haw hi.

⁵ Amu inn a khawmtute vang nuksat ing. Asia ngam sungah Khrih a um masabeltu ka ihmi ka ngualcam Epainetas vang nuksat ing.

⁶ Nangmu ca in nadeh hakzet a dektu Mary vang nuksat ing.

⁷ Ka Judah hin pih le keimah tuah thawngta boktu Andronikas le Junia vang nuksat ing. Amuhte cu nungzuitu tei meltheih zetmi hi haw in, keimah sangin Khristian suak masa zo toh haw hi.

⁸ Topa i pawlkomnak sungah ka ngualcam pha Ampliatas vang nuksat ing.

⁹ Khrih ca nadehnakah a nadehpih uh Urbanas vang nuksat ing; ka ngualcam pha Stachys vang nuksat ing.

¹⁰ Khrih upnakah muantak ngangai Apelles vang nuksat ing. Aritobulas innkua a ummite vang nuksat ing.

¹¹ Ka Judah nampih Heradian le Narcissas innkua a ummi Khristian unaute vang nuksat ing.

¹² Topa i ca nadehnakah na a dektu Tryfena le Tryfosa vang nuksat ing. Topa i ca in, na tamzet a dektu ka ngualcam pha Persis vang nuksat ing.

¹³ Topa i ca nadehnakah pha cuangin, na a dektu Rufus le a capa ngangai bangin pha zetin keimah a zotu Rufus i nu vang nuksat ing.

¹⁴ Asinkhritas le Flegon, Hermes, Patrobasi, Hermes le amu lakah Khristian unau dadang vang nuksat ing.

¹⁵ Filologas le Julia, Nereus le a celnu, Olimpas le amuh tuah a ummi Pathian i mihingte vang nuksat ing.

¹⁶ Pa khat le pa khat itdunnak tuah kawidun unna, nuksatdun un hi. Khrih i pawlpi hempoh ten nangmuh nuksat haw hi.

Dawlbel Thucahnak

¹⁷ U le naute aw, lengkek dunnak a suaktiktu, mi upnak a susiatiktu le na cosan sa uhmi zilhnak a dodaltute khi ngallingta un tin, sosuah ing. Amuhte cu phial pahsuh un.

¹⁸ Mahtibang na a dektute cu a Topa uh Khrih ca nadektu hi haw ma hi; amu pumpi ca nadektute haw hi. A ot naldan le a awnmawi dan haw in, imah thei ngawl mipite cu zol khawng haw hi.

¹⁹ Mi hempoh ten Thuthangpha tihmi thu ah muantak na hih uh lam thei khawng zo haw hi. Mah hangin keimah vang nangmu humah lungdamzet ing. A pha mi thu ah micip hi unna, a pha ngawlmi ah imah thei ngawl bangin um un, tih deih ing.

²⁰ Eimuh tei lemdaihnak bulpi Pathian in nangmu ke nuai ah Satan cu tanpekin, ngawikeh bilhbelh tuk hi. Topa Jesuh Khrih i hehpihnak cu nangmuh tei nelah um tahen.

²¹ Ka nadehpih Timote in nangmuh nuksat hi. Mahtibang bokin, eimu Judah phunpih Lusias, Jason le Sosifater ten nangmuh nuksat haw hi.

²² Hi lai a ngantu keimah Tertius in Khristian nuksatnak kuat bok ing.

²³ Ka zintunnak le a innah vangin pawlpi khawmnak inn neitu, Gaius in nuksat bok hi. Hi khuapi sumkemtu Erastas le a unau uh Quartus ten nuksat bok haw hi.

²⁴ Topa Jesuh Khrih i hehpihnak cu nohtei venghawng humah um zal tahen. Amen.

A Dawltabel Thangphatnak

²⁵ Pathian nelah sunloihnak pia nung. Amah cu Jesuh Khrih i Thuthangpha ka au pihmi le a bosa khang tampi sungah selkuhin um naven atu-in phuansuahin, a ummi thu-ip hangin nangmu upnak sungah khoh zetin, a dingtiktu hi.

²⁶ Atu-in mah thudik cu profet tei laingatnak hangin mi hempoh tei mai ah langtik zo hi; kumkhua a nungmi Pathian i thupiakmi thawmin, mah thu cu akua na bangin umin, a zuinak haw tukin miphun hempoh lakah phuan hi zo hi.

²⁷ Thu hempoh ah a cipmi, amah bek Pathian lakah Jesuh Khrih i hu le thawmin thangphatnak cu a kumkhua in um tahen! Amen.