ROM Khua Khristian Tei Lakah Paul i Laikuat (Paul’s Letter to the Romans) 15 - Ngawm Bible

Midang Lungdamtikin

¹ Upnakah ngilcangmi oh ten upnak nawmtam tei bawmngit khi puak bawm tuk hung hi. Eimu nopnak bek ngaisungtu hi tukma hung.

² Mah sangin, a unau pih uhte itin kaw a upnak haw a khantohtik theih tuk uh tih le khoh khahin, a umtik theih tuk uh tih saw khi ngaisung tukmi hung hi.

³ Itahim titale Khrih in ama ca nopnak zei ma hi. Lai Thiangtho in, “Nangmuh a zotsaknak haw cu ka humah heng khawng hi,” tin a tihmi khi kim hi.

⁴ Lai Thiangtho i zilhnak le sosuahnakte hangin muansannak a neihnak tukin Lai Thiangtho sung a ngatmi hempoh cu eimuhte thuzilhtu hi.

⁵ Khrih Jesuh khi zohtehin, nohtei lakah thinkhatno na um theihnak tuk uhin thinsaunak le thapiaknak bulpi Pathian in bawm zal tahen!

⁶ na venghawng uhin lungmu munkhatno in, a Topa uh Jesuh Khrih i Pa le Pathian cu thangphat thei tuk uh ci.

Gentail Tei Ca Thuthangpha

⁷ Khrih in nohte a san bangin, Pathian i sunlawinak tukin nohte vang pa khat le pa khat cosangdun bok un hi.

⁸ Ka hilh nuammi cu himi hihi: Judah tei ai-awhin Khrih cu umlawhin cang hi; mahmi cu Pathian in, a pupa tei lak pen a thutepmi kimtiknak tukin le Pathian cu muantak hi tih langtiknak hi.

⁹ Mah i humah Pathian cu hehpihnak neitu hi tih khi Gentail ten thei in, a thangphatnak haw tukmi hi. Lai Thiangtho sungah, “Gentail tei lakah na min cu phuang tung a, nangmah thangphatnak cu la in sa tung hi,” tin, a tihmi khi kim hi.

¹⁰ Mah i humah, “Gentail mite, Pathian i miphunte tuah lungdam ten un,” tihmi le

¹¹ Mahten, “Gentail mi na venghawng uhin Topa cu thangphat un; mi hempohin amah cu thangphat un,” tihmi le

¹² Profet Isaiah in, “Jesse casuan pa khat heng tuk a, Gentail mite uktu in cang tuk hi. Amuh in amah cu muang haw tuk hi,” tin, a tih bangin hi.

¹³ Hawvang Thiangtho i cahnak thawmin, na muansannak uh cu khang tawto hen na, muansannak bulpi Pathian in, amah na upnak uh thawmin lungdamnak le lemdaihnak phunkim tuah dimtik tahen.

Ngalpha Zetin Paul In Laikuat

¹⁴ U le naute aw, keimah hihimin nohte cu miphazet uh ci, thu thei zetin pa khat le pa khat zilhdun theizet uh ci tih ciang zetin thei ing.

¹⁵ Mahnaven hilai ka kuatmi sungah ka theihtikleh nuammi thu khenkhatah ngalpha zetin ngan ing. Ka ngalphatnak cu Pathian in Gentail tei ca in nadek tukin covo piakmi, Khrih nadektu ka hih hangin hi.

¹⁶ Gentail mite cu Pathian nelah cosan takmi biakpiaknak bang a hihnak haw tukin le Hawvang Thiangtho i thawmin Pathian lakah apmi a hihnak haw tukin Pathian lak pen a hengmi Thuthangpha ka phuan ten thiampi bangin dek ing.

¹⁷ Khrih Jesuh tuah pehzopnak hangin Pathian na ka dehmi ah mitmai phatnak nei ing.

¹⁸ Gentail mite Pathian thu a zuinak haw tukin Khrih in keimah mangin, na dehmi bek hi ngalpha zetin zilh tung hi.

¹⁹ Hitih bang a dehmi hi awnkam le dehnakin hihen, thasiahhuai nalamdang dehnak le a lamdang cahnak huhamin hihen, Pathian Hawvang i cahnakin, a bawlmi hi. Jerusalem pepanin Illirikum tian ka khualzinnakah Khrih i Thuthangpha cu cangkim zetin phuang ing.

²⁰ Ka muibat lelengmi cu Khrih a thei awng ngawlnak munah Thuthangpha phuan khi hi. Itahim titale midang ten a bulphuhnak munah sak bet tuk cu nuam mang hi.

²¹ Lai Thiangtho in, “Ama thu a thei kha ngawl ten mu haw tuk a, a za awng ngawl ten theiciang haw tuk hi,” a tih bangin hi.

Paul In Rom Khua Zin Tum

²² Nangmu lakah zin tum li naveng zinsuak thei ngawlin vei tampi a khaktu nei mek ing.

²³ Mah hangin atu-in hi ngamah nadeh ka celh zo hangin le nangmuh mu tuk hi kum tampi sung ka nuammi a hih bang bokin,

²⁴ tu tum cu nangmuh tawk tukin ngaisung ing. Spain ngam ka hawh ten tawk thah vawk nuam ing a, nangmu lakah huncan dawmlaih ka man ceng ten, mahlai a hawhnak tukah vang na bopleh tuk uh deih ing.

²⁵ Mahnaven atu-in Jerusalem ah hawhin, Pathian i mihingte bawm hih tung hi.

²⁶ Itahim titale Macedonia ngam le Akhaia ngam a ummi pawlpi ten Jerusalem a um, Pathian mitei lak a ca-ngahte bopnak tuk, thatho zetin, a piak haw mi sumpi um hi.

²⁷ Mahtibang a bawl haw mi cu amu ngaihsut thiamnak hang hi. Thu khatah mi a bop haw cu amu dehvo hi bok hi. Judah miten Hawvang lam thupha a co haw mi khi Gentail mite a hoih haw bang bokin Gentail mite vangin neihcalam thupha a co haw mite, Judah mite bopnakah a hoih bok haw tukmi hi.

²⁸ Hi nadeh cengin, amu ca piakmi sumpi kimno in amu khut sungah ka ap celh ten Spain ngam hawh tukin tul tung a, nangmu lakah leng vawk thah tung hi.

²⁹ Nangmu lak ka hen ten Khrih i thupha muicu cangkim cu sel thei tung tih thei ing.

³⁰ U le naute aw, Topa Jesuh Khrih a upnak uh le Hawvang i piakmi itnak tuah sosuah ing. Keima ca in Pathian nelah thu ngetsak leleng bok un.

³¹ Judah ngamah a ummi Khrih umngawltu tei khut pen haksatnak ka tawh ngawlnak tukin le Jerusalem a, ka nadeh tukmi cu Pathian miphun tei lakah co tak hi tukin thungetsak un hi.

³² Pathian lungkimnak a um tale, lungdam zetin nangmu lakah heng thei tung a, colhdamnak hunpha vang ngah tung hi.

³³ Eimu ca in lemdaihnak bulpi Pathian cu nangmu venghawng lakah um tahen. Amen.