ROM Khua Khristian Tei Lakah Paul i Laikuat (Paul’s Letter to the Romans) 13 - Ngawm Bible

Acozah Lakah A Dehvo Uh

¹ Ngam uktu bawi tei thu ngai un; itahim titale Pathian lungkim ngawlin kuamah thuneitu in um theihmi kha ma hi; mahten tu a thuneitute hi Pathian i koih mite haw hi.

² Kua hei hihen thuneitute a dodaltu cu Pathian i lungkimnak tuah a koihmi khi do hi. Mahti bangin a dotu cu amah lala i humah thukhennak heng tuk hi.

³ Uktu bawite hi thilpha bawltu ten lau tuk imah umma hi; phatngawlnak a bawltu bek ten a lau haw tuk hi. Thuneitu bawite khi lau ngawlin, na um bang ahin nuam a cim maw? Na nuam tale a phami bawl inna, pahcawi co tuk hi.

⁴ Itahim titale nangma phatnak bawltu tukin Pathian i sila haw hi. Mahnaven thilpha ngawl na bawl tale thuneitu cu lau in hi. Itahim titale mi bawlsia thei ngangai mi hi. Amah cu Pathian sila a hih bangin thilpha ngawl a bawltu tei humah Pathian i dantatnak a hengtiktu hi.

⁵ Mah hangin thuneitu bawi tei thu khi ngai un; Pathian i dantatnak bek hi ngawlin a sia le pha khen theihnak le na ngaihsutnak uh i ca vangin hi.

⁶ Mah hangin hi siah na piak uh cu; thuneitu bawi ten a dehvo haw a deh suak haw ten Pathian i ca in dek haw hi.

⁷ Mah hangin na piak tuk uhmi cu pia un; bulpak ngahmi sung pen piak tukmi siah le na piak tukmi hei hihen pia unna, maizah takmi ahi haw tale upat maizahnak pia khawng un hi.

Pa khat le Pa khat Humah A Dehvo Uh

⁸ Pa khat le pa khat itdun un, itnak sial ngawl leiba pahsun. Itnak a neitu cu Daan zuitu hi.

⁹ Thukham piakmi, “Nupa sualnak bawl pahsun; mithat pahsun; nguca pahsun; midang neihmi nate hawza pahsun,” tihte le a dang thukhamte hempoh cu, “Nangmah le nangmah na ih bangin, na inn nelte vang it in hi,” tihmi thukham sungah kim khawng hi.

¹⁰ Mi pa kha khat na it tale ama ca in, a pha ngawlmi bawl awng tukma ci. Mah hangin Daan a kimno in zui thei tihmi cu itdun tuk tihnak hi.

¹¹ Hihi cu na bawl kul hihim uhmi hi, itahim titale na hihbuhnak uh pen na khatlawhnak tuk uh hun heng zo hi tih thei uh ci. Nunpat a hihnak tuk uh huncan cu a masa a, up pattung uh laih sangin atu-in nai saw zo hi.

¹² Zan bo awn tohin, sun heng awndiak toh hi. Khuathim sung a, nadehte cu zam toh unna, khuavak sungah ngaldo tukin hiamnam la nung hi.

¹³ Sun khuavak a ummite bang bokin a ziaza uh cu mawitik nung inna, mi tuah nunsualnak le zukham silnakte umleh ma toh hen; nupa sual bawlnak le zoh mawi ngawlin nun cu umleh ma toh hen; hauhdunnak le iksiknak hei umleh ma toh hen.

¹⁴ A Topa uh Jesuh Khrih khi ngaldonak thuam bangin silh unna tisa sual nuamnak le nopsaknak hun khi tawp toh un hi.