ROM Khua Khristian Tei Lakah Paul i Laikuat (Paul’s Letter to the Romans) 10 - Ngawm Bible

¹ U le naute, ka phunpih ten nunpatnak ngah zal hawleh tih cu ka lungmu hempoh tuah ka deihmi hi. Izah tianin him amu ca tukin thu ka nget.

² Pathian ca in tangzet haw hi tih cu a theihpihtu ing hi, mahnaven a tannak haw man ma hi.

³ Pathian in Amah le mihing laklawhah itih bangin lemdunnak lampi bawl hum tih khi thei haw ma hi; amuhno in amu zei copmi lampi bawl haw; mah hangin Pathian in mihing tuah lemdunnak a bawlmi lampi sungah tum nuam haw ma hi.

⁴ Khrih in Daan cu a botik zo hangin kua hei hihen atu pepan amah a umtu hempoh cu Pathian tuah lemdunnak ngah haw hi.

Mi Hempoh Ca Nunpatnak

⁵ Moses in Pathian tuah lemdunnak cu Daan zuinak bekin hi tin nganin, “Kua hei hihen Daan i thupiakmi a zuitu cu nung tuk,” ti hi.

⁶ Mahnaven Lai Thiangtho in upnak hangin Pathian le mihing tei laklawhah lemnak thu ah hi tin ti hi. “Akua kaw vancungah a kai tuk? tin mah le mah dotdun tuk kha ma hi,” (A tihnuammi cu Khrih cu van pen tolhsuk tuk tihnak hi.)

⁷ “Leinuai ah akua kaw a tolh tuk, tih hei in dong pahsun?” (mahtin a tihmi cu Khrih cu thihnak pen kaih suah tul tuk tihnak hi)

⁸ A hilhmi ngangai cu, “Pathian i phuanmi thu cu na elah um, na mukah umin, na lungmu ah vangin um,” ti hi. Mahmi cu ka phuan uhmi upnak i thu hi.

⁹ Jesuh cu Topa hi tin na muk uh tuah phuangin, Pathian in thihnak pen tho lehtik, tin na lungmu in, na um tatak tale nunpat hi tuk ci.

¹⁰ Upnak hangin Pathian tuah lemdunnak co hung hi; a phuannak uh hangin patnak ngah hung hi.

¹¹ Lai Thiangtho in, “Amah a umtu hempoh cu thasia awng haw tukma,” ti hi.

¹² Hi bangin a umtu hempoh cu a tih ten akua na bangin tel khawng hi, itahim titale Judah mi le Gentail mitei laklawhah deidat dunnak umleh ma toh hi. Pathian cu mi hempoh tei Topa, hi a, Ama min samtu hempoh tei lakah thupha muicu tampi in pia hi.

¹³ Lai Thiangtho in, “Kua hei hihen, Topa i min a samtu hempohin nunpatnak ngah haw tuk hi,” a tihmi khi kim hi.

¹⁴ A thu umngawltu ten itin a min sam thei haw tuk him? A thu le la a thei hawta ngawlin itin um thei haw tuk him? A thu cu phuan ahimata, itin him a theih zawh haw tuk?

¹⁵ Kamtai hahmi a umma tale itin kaw a phuan theih haw tuk? Lai Thiangtho in, “Thuthangpha a phuangtu tei ke khi itih zahin mawi him?” tin ti hi.

¹⁶ Mahnaven mi hempoh ten Thuthangpha cu pom haw ma hi. Isaiah hei in, “Topa akua kaw thuthang ka phuan uhmi a sang,” ti hi.

¹⁷ Mah hangin upnak cu thuthangpha theihnak pen hengin, mah Thuthangpha cu Khrih ka phuannak uh pen heng hi.

¹⁸ Mahnaven ka thudot nuammi cu: “Thuthangpha phuanmi hi thei awng ma ngangai haw maw?” tihmi hi. Thei haw hi; itahim titale Lai Thiangtho in: “A ot nging haw cu leihum khua hempoh ah thang hi, A ot haw cu lei tawpnak tianin heng hi,” a tihmi khi a man hi.

¹⁹ Pa khat dong nuam laih ing: “Israel miten za ma maw? Moses amah loli hi thudotnak a dontu masabel hi,” tin don hi. “Ka hinnam iksiknak neitiktu tukin, misil phunte mang tung,” tin ti.

²⁰ Hi sangin ngalpha sesemin Isaiah in awnin, “Kei a zei ngawltu ten tawk haw, ka thu a dong ngawltu tei lakah lang ing.”

²¹ Mahnaven Israel tei thu ah: “Thungai ngawl le mi dodaltu Israel tei lakah sun nilui in ka khut zak ing,” tin ti hi.