ROM Khua Khristian Tei Lakah Paul i Laikuat (Paul’s Letter to the Romans) 1 - Ngawm Bible

¹ Pathian in, a Thuthangpha phuangtu tukin a tiikmi le a tenmi, Khrih Jesuh i sal, nungzuitu keimah Paul in laikuat ing hi.

² Lai Thiangtho sung a ngat bangin mah Thuthangpha cu Pathian in, a profet tei lakah a tepsami hi.

³ Mah Thuthangpha cu a Capa Topa Jesuh Khrih i thu hi. Mihing a hihnak lam pen David casuan sung pen a suakmi hi.

⁴ Pathian a hihnak le a thianthohnak lamah, thihnak pen thawhtik a hihnak hangin Pathian Capa a hihnak cu a nase zetmi huham tuah langtik zo hi.

⁵ Khrih Amah hangin mite sangin a thu a zui theihnak haw tukin Pathian in nungzuitu hihnak covo keimah pia hi.

⁶ Noh Rom khua a ummite vangin, Jesuh Khrih ta hi tukin Pathian i sammi ah a tel mite hi bok uh ci.

⁷ Mah hangin Rom khua a um Pathian i ihmi le ama mihingte hi tukin a sammi na venghawng uh lakah hi laikuat hi ngan ing. Pa Pathian le Topa Jesuh Khrih in hehpihnak le lemdaihnak cu nohte pia tahen.

Lungdam Thungetnak

⁸ Jesuh Khrih i hangin leihum buppi ah na upnak uh thangkeh khawng hangin na venghawng uh i ca in ka lungdamnak thu Pathian nelah hilh masa ing.

⁹ Ama Capa i Thuthangpha cu ka lungmu hempoh tuah hilhin, a na ka deh mite cu man hi tin Pathian in theihpih hi. Thu ka nget sial ten nangmuhte phawkngil awng mang tih cu Pathian in thei hi.

¹⁰ Pathian in lem a titale vei khat beek nangmu lakah zinleh thei tukin Pathian ama lakah ngen leleng ing.

¹¹ Itahim titale nangmuh thazaang khotiktu tukin Pathian i Hawvang laksawng na co theihnak tukin nangmuh tei lakah zin nuamzet ing.

¹² Mahtin ka tih ten keima upnakin nangmu upnak tha khotikin, nangmu upnakin keima upnak tha khotik bok tuk ka tihnak hi.

¹³ U le naute hihi cing leleng un, vei tampi nangmu lakah zin tukin hantiam li zo naveng zin suak thei tuk ngawlin a khaktu um leleng hi. Gentail mitei lakah thinthekmi ka umtik theih bangin nangmu lakah vangin thinthekmi a um thei ahin tih deihzet ing.

¹⁴ Itahim titale mi hempoh lakah deh tuk leiba nei ing hi; micip le misil lakah hihen, laithiam le thiam ngawlmi lakah hihen leiba nei ing.

¹⁵ Mah hangin Rom khua a um nangmu lakah vang Thuthangpha phuang tuk cu ngakhel mahtak ing.

Thuthangpha i Huham

¹⁶ Thuthangpha cu zahcak pih hihim mang hi. Itahim titale Pathian i huham hangin umtu hempoh ten nunpatnak ngah haw hi. A masa in Judah mitei ca hi, mahten Gentail mitei ca hei hi bok hi.

¹⁷ Itahim titale Pathian in Amah le mihing tei laklawhah itin lemnak bawl him tih khi langtikin; mahmi cu a patnak pen a tawpnak tian upnak hangin hi. Lai Thiangtho vangin “Upnak hangin Pathian tuah a lemdunmi cu nung haw tuk,” ti hi.

Mihing Sualnak

¹⁸ Pathian i thinuknak cu vanhum pen mihing tei sualnak le phat ngawlnak hempoh humah lang hi; mahmi mihing tei phat ngawlnakte cu thutak theih theihnak tuk a khaktute na hi haw hi.

¹⁹ Pathian i dantat tawk haw hi, itahim titale Pathian in, a theihciangtik zo bangin mihing tei Pathian theih theihnak cu ciang zetin lang zo hi.

²⁰ Pathian in hi leipi a bawl pepan muh theih ngawlmi a nundan hihen, kumkhua in, a neihmi huham le Pathian a hihnak hihen ciang zetin muh theihmi hi. Pathian i thil bawlmi hum pen muh theih hi. Mah hangin kuamah in pha thei haw tukma hi.

²¹ Pathian cu thei leng haw hi; mahnaven maizahnak le upatnak pia haw ma hi; a humah lungdam thu hei hilh haw ma hi. A ngaihsutnak haw cu imah ngawl cang khawngin, a lungmu hawmhol pi haw cu khuathimnak tuah dim hi.

²² Cip ung tin ticop li haw naven misil hi haw hi.

²³ Kumkhua nungmi Pathian bia saw ngawlin a thi theimi mihing, vano, ngamsa le a bokvak ngamsate bangin bawlmi milimte saw khi bia haw hi.

²⁴ Mah hangin mahtih bang mihing ten a lungmu sung haw a, a bawl nuam haw thil nawngkai ningdelhhuai nate bawl tukin Pathian in kham nuam ngawlin hahzau hi. Zahcakhuai nupa sualnak bawl haw hi.

²⁵ Pathian i thutak le thuman cu zolthu in thek haw hi; Siamtu Pathian ai-in, a semsuah copmi tei na dekin, bia saw haw hi. Siamtu saw khi kumkhua in biak tukmi hi! A men.

²⁶ Hitih bangin thil a bawlnak haw hangin Pathian in mihingte cu a zahcakhuai mi amu tisa nopnak sungah hengtik hi. Numeite hei in numei a hihnak na khi a danbang mang ngawlin, daantin hei nei ngawlin numei le numei sual haw hi.

²⁷ Mahti bang bok lengin pano vangin numei tuah phialdunnak zamin, tisa deihnak hangin pano le pano sual haw hi. Pano ten pa khat le pa khat mahtih bang zahcakhuai thil sual a bawlnak haw hangin a thaman haw cu amu humah heng hi.

²⁸ Hitih bang mihing ten Pathian thudik cu a lungmu sung hawah thei nuam ngai ngawlin lungmu nawngkainak sungah Pathian in hengtik hi. Mah hangin bawl tuk ngawl nate khi bawl haw hi.

²⁹ Amuhte cu siatnak, phatngawlnak a phunkim le hampumnak, suaksualnak namkim tuah dim haw hi. Iksiknak, mithahnak, dodunnak, mizolnak le huatdunnak, awklawlnak tuah dim haw hi. Kam tamin,

³⁰ pa khat le pa khat sonsiadun haw hi. Pathian i mitkem tukin nungin, ultung le pualthau in, mah le mah pahcawi copin, phatngawlnak bawl tuk cu lampi a phunkim zei in, nu le pa tei thu ngai nuam haw ma hi.

³¹ A sia le pha khen theihnak lungmu nei ngawlin le a thutiamte zuileh ngawlin midang ca hehpihnak le deihsaknak imah nei haw ma hi.

³² Hitih bangin a nungcate cu thi tak hi tin, Pathian i daan piakmi um tihvang thei haw hi. Mah i humah hitih bang thilpha ngawlte amuh loli in, a bawl haw bek sial ngawlin midang tei bawl ten vangin lungkimpih haw hi.