PIANPATNAK 8 - Ngawm Bible

Tuihautung Bonak

¹ Pathian in, Noah le amah tuah timbaw sung a um ngamsa namkim cu thei leleng hi. Mah hangin leihumah huih theutikin, tui cu kang dedeuh hi.

² Leinuai tuipi pen a putmi tuite le van pen nguah a zuk suknak van tukvelh cu khakdun cawm khawng haw hi. Van nguahtui kangin,

³ tui cu kang dedeuh hi. Ni za le sawm nga nungten tui cu kiam dedeuhin,

⁴ ha salihnak ni sawm le ni salih ni-in, timbaw cu Ararat mualhumah tang hi.

⁵ Tui cu kiam pepelin, ha sawmnak ni khat ni-in, mualkul lang hi.

⁶ Ni sawm li nungten Noah in timbaw tukvelh hongin,

⁷ va-ak pa khat hah hi. Va-ak cu kikleh ngawlin, tui a kang khawng laklawh leng kawkawi hi.

⁸ Mah taktoh cu Noah in, tui kang ngangai maw tih theihnak tukin khulo pa khat hah hi.

⁹ Mahnaven tui in leihum a khuh laih hangin khulo cu a kopnak tuk mu ma hi. Noah in, a khut suahin, khulo cu timbaw sungah laleh hi.

¹⁰ Ni salih a ngah nungten khulo cu hahleh leu hi.

¹¹ Mah ni taklamin khulo cu kiklehin, a mukah olif cehhing a thiakmi cu Noah in mu hi. Tui kang ngangai zo hi tih cu Noah in thei hi.

¹² Noah in ni salih ngaklehin, khulo cu hah leleu hi. Hi a hahmi khulo cu kikleh ma hi.

¹³ Noah i kum za luk le kum khatnak, ha masabel ni khatnakin, leihumah tui cu kang khawng hi. A timbaw khuh hongin, a zoh ten lei cu ko khawngin mu hi.

¹⁴ A ha nihnak, ni sawm nih le ni salih ni-in, lei cu ko ngah khawng hi.

¹⁵ Pathian in Noah lakah,

¹⁶ “Na zi, na capate le a zi haw tuah timbaw sung pen tul toh un hi.

¹⁷ Ngamsa hempoh, vano, inn ngulh ngan le a vak thei mi hempoh tianin pui khawng inna, leihumah ci pungin, pung haw hen,” ti hi.

¹⁸ Mah hangin Noah cu a zi, a capate le a zi haw tuah timbaw sung pen tul haw hi.

¹⁹ Ngamsa hihen, inn ngulh ngan hei hihen, vano le a vak thei mi hempoh tian ahon, ahonin timbaw sung pen tul haw hi.

Noah In Biakpiaknak Bawl

²⁰ Noah in, Topa i ca tukin biaklan dawhin, a thiangmi ngamsa le vano cu nam khat pen pa khat ten la in, biaklandawh humah halkang biakpiaknak bawl hi.

²¹ Noah i piakmi namtui cu Topa in, a theih ten a lungmu sungno in, “Mihing tei bawlmi na hangin leihum cu tamsia tukma toh ing. Mihing cu a neu laih haw pepanin phatngawlnak bebek ngaisung haw tih cu thei ing. Mahnaven tutum bangin ituk hei ten a nungmi siatsuahleh tukma toh ing.

²² Leihum a him sung hempoh cu anci cin hun le ancop hun um tuk hi. A dap le sa, khaal le phalbi, sun le zan um tuk a, boleh tukma toh,” ti hi.