PIANPATNAK 7 - Ngawm Bible

Tuihautung

¹ Noah lakah Topa in, “Na innkua hawng uhin timbaw sungah tum un; leihummi hempoh lak pen nangmah pa khat bek hi thumanmi hi ci.

² Ngamsa thiang eihpha namkimin, nam khatah kop salih ten hunpihin; mahnaven a thiangtho ngawlmi ngamsa cu nam khatah a nu le pa kop khat ten bek la in hi.

³ Vano vang a namkimin, nam khatah kop salih tenin la in hi. Hi cu leihumah cihah lehtu hi haw tuk hi.

⁴ Ni salih nungten leihumah sun sawm li le zan sawm li sung nguahzutik tung a, ka bawlsa a nungmi hempoh siatsuah khawng tung,” tin ti hi.

⁵ Topa i thupiakmi bangkekin Noah in bawl khawng hi.

⁶ Tuihautung a pat ten Noah cu kum za luk hi.

⁷ Noah cu a zi, a capate le a zi haw tuah tuihau tungnak pen himdam tukin timbaw sungah tum haw hi.

⁸ Ngamsa le vano a thiang hihen, a thiang ngawl hihen a namkimin, a nu le pa, pa khat ten,

⁹ Pathian i thupiaknak bangin Noah tuah timbaw sungah tum haw hi.

¹⁰ Ni salih nungten leihumah tuihau tung hi.

¹¹ Noah cu kum za luk a kim nung, ha nihnak ni sawm le salih ni-in, leinuai a, tuipi cu mun hempoh pen put cengcung haw a, van tukvelh hempoh hongin, nguah cu a leihin, leihsuk hi.

¹² Leihumah sun sawm li le zan sawm li sung cawl ngawlin nguahzu hi.

¹³ Mah ni-in, Noah le a zi, a capa pa thum Shem, Ham, Jafet le a zi haw cu timbaw sungah tum haw hi.

¹⁴ Amuhte tuah langkhatin inn ngulh nganhing hihen, ngamsa hihen, a vak thei mi hempoh le vano namkim khum tum haw hi.

¹⁵ Nganhing a namkim, a nu le pa tenin, Noah tuah timbaw sungah Pathian i thupiakmi bangin tum haw hi.

¹⁶ Noah a tum ceng ten Topa in kong cu khak hi.

¹⁷ Ni sawm li sung tuihau a tun nungten tui cu tam dedeuhin, a timbaw haw cu tui in langtotik hi.

¹⁸ Tui cu thuk dedeuhin, tui humah timbaw cu langto hi.

¹⁹ Tui cu thuk dedeuhin, mual a sangbel vang khuh khawng hi.

²⁰ Mah hum pen tui cu muallek humah pi sawm nih le pi nga tingto hi.

²¹ Leihumah a nungmi hempoh mihing hihen, ngamsa le vano hihen, nganhing lungsivai tianin thi khawng haw hi.

²² Leihumah nunnak nei hempoh thi khawng haw hi.

²³ Leihumah a vak thei mi hempoh, mihing, ngamsa le vano a neubel tianin, Topa in thitik khawng hi. Siatsuah ngawlmi cu Noah le amah tuah timbaw sungah a ummi bek hi haw hi.

²⁴ Tui cu leihumah ni za le sawm nga sung kiam ngawlin um hi.