PIANPATNAK 2 - Ngawm Bible

¹ Mah hangin lei le van le a sungah a ummi hempoh cu Pathian in bawl khawng hi.

² Ni salih ni a hen ten Pathian in, a nadeh cu cengin cawl hi.

³ Pathian in ni salih ni thupha pia in, ni sunglawi in bawl hi. Itahim titale pianpatnak nadeh hempoh pen a colh hangin hi.

⁴ Lei le van a bawlnak thu le la cu mahti bangin na hi, hi. Topa Pathian in lei le van a bawl ceng ten,

Eden Huan

⁵ leihumah thingkung le hampa umma hi; a poto tukin anci hei umma hi; itahim titale Pathian in nguah zutik ma laih hi. Leingam dektu tukin mihing hei umma laih hi.

⁶ Nguahzu ma laih naven leisung pen tui putin, lei cu nawngtik khawng hi.

⁷ Topa Pathian in, leivul cu la in, mi bawl hi. A naal sungah nunnak haihawh mut tumin, nunnak nei mihingin suak hi.

⁸ Topa Pathian in, nisuahnak lam a ummi Eden ah huan bawlin mah huanah, a bawlmi mihing cu umtik hi.

⁹ A mawi zetmi le eihpha thingkung namkim cu mah huan sungah potikin, huan laizangah nunnak thingkung le a sia le pha khen theihnak thingkung vang umtik hi.

¹⁰ Eden huan sung nawngtik tukin ngun pa khat luang a, a pualam a hen ten pa li in luangkhek haw hi.

¹¹ Mah ngun pa khatnak i min cu Pishon hi a, sui umnak Havilah ngam kimkotin, a luangmi hi.

¹² Havilah ngam a ummi sui cu pha in; thingnai manpha le Oniks suangval sante um hi.

¹³ A pa nihnak ngun cu Gihon hi a, Kush ngam kimkotin, a luangmi hi.

¹⁴ A pa thumnak ngun cu Tigris ngun hi a, Assiria ngam nisuahnak lamah a luangmi hi. A pa linak ngun cu Eufrates hi.

¹⁵ Topa Pathian in, mi pa cu huan dektu tuk le cingkhawitu tukin Eden huanah koih hi.

¹⁶ Pathian in, a lakah, “Huan sung a, ummi thingngah hempoh ei thei ci;

¹⁷ Mahnaven, sia le pha khen theihnak thingngah cu ei viang pahsun; na ei tale na eih ni mamahin thicop tuk ci,” tin hilh hi.

¹⁸ Topa Pathian in, “Mihing hi amahno bek a um tuk cu pha ma hi; a bawmtu tukin ngualcam bawlsak tung,” tin ti hi.

¹⁹ Mah hangin, Pathian in lei cu la in, ngamsa phunkim le vano phunkim bawlin, itin sam tuk nentim tin mahpa i lakah hawhpih hi. Mahpa cu minsatikin, mah a sakmi min bangin a min haw in suakta hi.

²⁰ Mahmi pa in, nganhing hihen, inn ngulh ngan le van a lengmi vano hempoh hihen a min haw sa khawng hi. Mahnaven ama ca tukin a khawthu mi, bawmtu tuk ngualcam umma laih hi.

²¹ Topa Pathian in, mahpa cu hihbuh cizettikin, a hihbuh sungah a naknguh pa khat laksakin, a taksa tuah hubinleh hi.

²² Mipa i sung pen a lakmi naknguh tuah numei bawlin, mipa i lakah hawhpih hi.

²³ Mipa in, “Tu hah maw keimah bang mihing, Ka nguh tuah bawlmi nguh, ka taksa tuah bawlmi taksa, mipa sung pen lakmi a hih hangin, Numei tin sam hihen,” tin ti hi.

²⁴ Mah hangin pano in, a nu le pa zamsanin, a zi tuah khawmdun haw a, amuh cu pumkhatah suak haw hi.

²⁵ Mipa le numei cu a pa nih haw thacangin, um haw naven zahcak thiam viang haw ma hi.