PIANPATNAK 10 - Ngawm Bible

Noah Casuante

¹ Tuihautung nung, Noah i capa Shem, Ham le Jafet tei hinmi casuante cu a nuailam bangin na hi haw hi.

² Jafet i capate cu Gomer, Magog, Madai, Javan, Tubal, Meshek le Tiras hi.

³ Gomer i capate cu Ashkenaz, Rifath le Togarmah hi.

⁴ Javan i capate cu Elishah; Spain, Cyprus le Dodamin mite na hi haw hi.

⁵ Amuh cu tuipi mawk le tuikulh hum a ummi, hinnam tei cikhaihtu haw hi. Jafet i casuante hi haw a, amu hinnam le awn tek mangin ngam dadangah um haw hi.

⁶ Ham i capate cu Kush, Izipt, Libya le Kanaan hi.

⁷ Kush i capate cu Seba, Havilah, Sabtah, Raamah le Sabteka hi. Raamah i capate cu Sheba le Dedan haw hi.

⁸ Kush i capa pa khat cu Nimrod hi, amah cu leihumah a masabel mi nehtu minthang hi.

⁹ Topa i bopnakin amah cu sakap minthangin cang a, miten, “Nimrod bangin Topa in sakap minthangin, bawl tahen,” timek haw hi.

¹⁰ Nimrod i ukmi ngam masabelte cu Babilonia ngamsung a ummi Babilon, Erek le Akkad ngam thum hi.

¹¹ Mahlai ngam pen Assiria ngamah hawhin, Nineveh Rehoboth Ir, Kalah,

¹² Nineveh le Kalah khuapi laklawh a ummi Reson khuapi toh hi.

¹³ Izipt cu Lydia mi, Anam mi, Lehab mi, Naftuh mi,

¹⁴ Patrus mi, Kasluh mi le Kaftor mitei pa hi. Filistin mite cu Kaftor i cikhaihmi na hi haw hi.

¹⁵ Kanaan cu a capa upabel Sidon le a nau Heth le

¹⁶ Jebus mi, Amor mi, Girgash mi,

¹⁷ Hiv mi le Arka mi, Sin mi,

¹⁸ Arvad mi, Zemar mi le Hamath mitei pa hi. Mah nungten Kanaan i casuante cu pungzai haw in,

¹⁹ a ngam haw cu Gerar lamah Sidon pen Gaza tian, mahten Sodom, Gomorrah, Admah le Zeboiim lamah Lasha tian zal hi.

²⁰ A hite hi, Ham i casuante haw a, ngam dadangah amu hinnam le awn tek mangin um haw hi.

²¹ Jafet i u Shem cu ca dang vang nei in, Hebru mi hempoh cikhaihtu hi.

²² Shem i capate cu Elam, Asshur, Arpakshad, Lud le Aram hi.

²³ Aram i capate cu Uz, Hul, Gether, le Meshek hi.

²⁴ Arpakshad cu Shelah i pa hi, Shelah cu Eber i pa hi.

²⁵ Eber in capa pa nih nei hi. Pa khat cu Peleg tin sam haw hi, itahim titale Peleg khan laihin leihum mihingte cu khenkhek khawng haw hi. A nau pa i min cu Joktan hi.

²⁶ Joktan i cate cu Almodad, Shelef, Hazarmaveth, Jerah,

²⁷ Hadoram, Uzal, Diklah,

²⁸ Obal, Abimael, Sheba,

²⁹ Ofir, Havilah le Jobab hi. Hite hi a venghawng haw in Joktan i capate hi haw hi.

³⁰ A umnak haw ngam cu Mesha pen Sefar lamah nisuahnak lam mualhum ngam tian hi.

³¹ A hum a, hinnamte cu Shem i casuante hi haw a, ngam dadangah amu hinnam le awn tek mangin um haw hi.

³² Hite hi Noah i casuante na hi haw a, amu hinnam tekin, hinnam tampi suak haw hi. Tuihautung nungten leihum hinnam hempoh cu Noah capa tei cikhaihmi haw hi.