OBADIAH 1 - Ngawm Bible

¹ Cungnungbel Topa in, profet Obadiah lakah Edom miphun tei thu a hilhmi hi. Topa in miphun tei lakah a kamtai hahin, “Na tuangtim unna, na venghawng uhin tho in, Edom do un,” a tihmi za ung hi.

Topa In Edom Bawlsia Tuk

² Edom nelah Topa in, “Zo hemin, miphun lakah phun nautabelin bawl tung hi; zotsak nautatmi pa hi tuk ci.

³ Na tuangkhawnnakin nangmah zol ngah zo hi. Suangbuk sungah umin, Mual sangbel humah na um hangin, na lungmuno in, ‘Akua in doksuk thei tuk him?’ tin ti ci.

⁴ Muvanlai bangin vang sangbelah lengin, na bu cu aksi humah na sa hei in, doksuk leleng tung ti hi.

⁵ Zan hunin, ngucate a hun haw ten, a bawlsiat haw mi cu tam tuk naven, a deih haw mi bek laksak haw tuk hi. Sabit ngutute a hung haw ahin, dawm bek zam ngawlin maw a um haw tuk?

⁶ Mahnaven Esau nate a lonsa dan haw hi ngaisung hem un; A kuhno in, a koih haw mi sumte hei pholhsuah sak khawng haw!

⁷ Ni dang laih a, bawmtu ten nangmah zol haw a, na ngamsung pen hawlvawk haw hi. Nangmah tuah ailem zetin, a ummi ten nangmah nehsiah zo haw hi. Na ankuang kilpih na ngualcam ten thangsiah haw; Cihnak a neihmi ilai ah him tin ti haw hi.

⁸ Mah ni ten Edom micipte siatsuah tung a, Esau mual pen a cihnak haw khawih tuk mang hi.

⁹ Teman ngalkapte a thinsu haw tuk a, Edom ngalkap hempoh thah tawk haw tuk hi.

Ita Edom Bawlsiat Tawk

¹⁰ Na unau Jakob casuan tei nelah bawlsia in, na thah hangin zakca in um leleng tuk ci a, kumkhua in lalthongta tuk ci.

¹¹ Ngal ten na kongkhah uh a siatsuah khawng ni ten imah kinmawh ngawlin ding leng thong ci. Jerusalem i neih le siah thiak khawngin aisanin, a semdun khawngtu ngamdangmi bangin mi siasuak hi ci.

¹² Na unau tei bawngsiat ni-in, tuangkhawng li pahsun. Judah siatsuahnak a tawh ni-in, nuihsan sihseh pahsun. Judah siatnak a tawh ni-in, na lungdam pahsun Lungkham zetin, a um ni haw in, nui aw ok pahsun.

¹³ Ka mihingte haksatnak a thuak ni haw in, a kongbiangah tum pahsun. Siat a tawh ni haw in, angzet pahsun. A lup ni haw hei ten a na haw lonsak pahsun.

¹⁴ Taitul a tum mite that tukin lamkak pen pang pahsun. Lungbingin, a um ni haw in, a suakca calam mi khenkhat cu ngal khut sungah pia pahsun.

Pathian Thukhen Tuk

¹⁵ A ngei ngawlin Topa keimah in, miphun hempoh humah ka thukhennak ni nai zo hi. Edom, midang humah na bawl bangin na humah bawlleh bok tung. Na thil bawldan cu na lu humah hengleh tuk hi.

¹⁶ Ka mihing ten ka mual thiangtho hum pen a khazetmi dantatnak hai cawi in, in zo haw hi. Mahnaven a elkim a ummi miphun hempoh ten, mah sangin a kha saw mi hai cu in haw tuk hi. A venghawngin, in haw tuk a, lalthong khawng haw tuk hi.

Israel i Nehnak

¹⁷ Mahnaven Zion mual pen mi khenkhat suakca haw tuk a, mah mual cu thiangtho tuk hi. Jakob i mihing ten a covo haw ngam coleh haw tuk hi.

¹⁸ Jakob innkuate cu mei alhin, cang haw tuk hi. Esau i innkuate cu cangphol kang bangin kang khawng haw tuk hi. Esau i innkuate cu kuamah suakca haw tukma hi. Topa in hilh zo hi.

¹⁹ “Negeb a ummi ten Esau mual cu laleh haw tuk a, Shephelah munlawn a ummi ten Filistin ngam laleh haw tuk hi. Israel miten Efraim le Samaria ngam la leh haw tuk hi. Benjamin hinnam ten Gilead ngam co haw tuk hi.

²⁰ Israel Saklam um saltangte kikleh haw tuk hi. Saklam a, Zarefath tian, Foenisia ngam la leh haw tuk hi. Jerusalem saltangte Sardis a ummi ten Judah hanglam a, ummi Negeb khuapi cu laleh haw tuk hi.

²¹ Ngal nehtu Jerusalem ten Zion Mualah kai haw tuk a, Esau Mual uktu in cang haw tuk hi. Mah ngamah Topa amah cu Kumpi in um tuk hi.”