NUNGZUITU 26 - Ngawm Bible

Agrippa Mai Ah Paul In Thuhilh

¹ Agrippa in Paul i lakah, “Na thu cu hilh thei ci,” ti hi. Paul in, a khut tungto in, a sihsan khualnak thu cu hi bangin son hi.

² Kumpi Agrippa! Judah mitei sual a notnak haw thu ah tuni in nangma mai ah son theihnak hun ka ngah hangin mi bawngphazet ing tin ngaisung ing.

³ Judah mitei daan hempoh le thu a eldunnak haw thu a thei khawngtu na hih hangin mi bawngpha in ka ngaihsut cuangnak hi. Thinsauno in ngai hihzalin hi tin hehpih kun ing.

⁴ “Judah mi hempoh ten ka nuncan cu ka naupang laih pepanin thei khawng haw hi. Ka nundan cu a masabelin keima ngamah, mahten Jerusalem ah, a venghawng haw in thei khawng haw hi.

⁵ Ka thu le la cu a son nuam haw tale son haw hen, a theih haw mi poh hi. A pattung pepan kei cu keimu biaknak lam pen a khohkhah zetmi Farasi mi sungtel ing.

⁶ Tuni hilai ah keima thu son tukin ka dinnak hei hi Pathian in, ka pu le pa tei lakah thutepnak a bawlmi khi muansannak ka neihnak hangin hi.

⁷ Mahtin muansannak ka neihmi cu ka miphun uh phun sawm le phun nih ten Pathian khi sun le zan a biak haw laihin muansannak a neih haw lelengmi khi hi. Kumpipa aw, mah muansannak hangin Judah miten ka sual thu a sonnakbel haw hi.

⁸ Hilai ah a hungmite, Pathian in mithi tholehtik tih hi ita um thei ngawl uh cim?

⁹ Nazareth mi Jesuh i thu cu ka do theih zahin do tung, tin keimah loli in ka ngaihsut awngmi hi.

¹⁰ Mahmi cu Jerusalem pen ka bawl lih awngmi hi. Thiampi upa tei lak pen thuneihnak ngahin, Pathian i mihingte tampi thawngah khia ing. Thah tukin a thu haw soncat a hih haw ten lungkim pihnakin ka khut tung li bok ing.

¹¹ Vei tampi cu Pumkhawm inn loli pen bawlsia tikin, a upnak haw tawpsan hawleh tin ka zuam theihzahin zuam ing. A hum hawah ka thinuk leita hangin amuh bawlsia tukin ngamdang khua tianin heng awng ing.

Paul In A Lungtheknak Thu Son

¹² “Amuh bawlsia nuam loli in thiampi upa tei lak pen thuneihnak la in, Damaskas khua ah hawh ing.

¹³ Mah na hi a, Kumpipa aw, Damaskas lampi ah ka hawh lih laihtakin, ni sangin a al saw mi tuah van pen kapsukin, keimah le ka hawhpih mitei elkim cu detsuk hi.

¹⁴ Ka venghawng uhin lum ung a, Hebru awnin aw pa khat ka zakmi in, ‘Saul, Saul! itakaw kei na bawlsiat lih? Khuicangin, a neitu i ngolh a saih ten amah a nattik saw bangin nangmah natik saw ci,’ ti hi.

¹⁵ ‘Akua nge cim, Topa?’ tin dong ing. Mahten Topa in, ‘Na bawlsiat lihmi Jesuh ing,’ ti hi.

¹⁶ Tho inna, na ke tuah dingin hi. Ka sila tukin ka ten nuam hangin na lakah lang ing. Tuni in, keimah na muhnak le mailam ten ka lak tukmite khi midang tei lakah hilhin hi.

¹⁷ Nangmah cu Israel mi le Gentail mitei lakah kuat tung a, amu khut sung pen pansuak tung hi.

¹⁸ A mit haw haktik tuk ci a, khuathimnak sung pen khuavaknakah Satan huham sung pen Pathian i lakah kiklehtik tuk ci. Mahten keimah a upatnak haw i hangin a sualnak haw cu ngaihdam hi haw tuk a, Pathian i mihing tenmi sungah tel bok haw tuk,” ti hi.

Paul In A Nadehnak Hilh

¹⁹ “Mahti bang a hih hangin, Kumpi Agrippa aw, van pen muhnak ka neihmi i thu cu el thei mang hi.

²⁰ Amasabelin Damaskas khua ah, mahten Jerusalem khua ah, mah nungten Judah ngamsung hempoh le Gentail mitei lakah vang hawhin, na sualnak uhte sik unna, Pathian nelah kikleh un hi; mahten sual na sihlehnak uh khi na nunzia uhin langtik un, tin hilh pepel ing.

²¹ Mahtin ka tihnak hangin Judah ten Biakinn sung pen manin, thah tuk tianin bawl haw hi.

²² Mahnaven tuni tianah Pathian bopnak tuah atu-in, na venghawng tei mai ah ka muhmi thu cu hilh ing. Ka hilhmi thu hi Moses in hihen, profet ten hihen, a piang tukmi a hilhham haw mi hi.

²³ Mahtin a hilh haw mi cu ihim titale a vakmi nunpatnak thu cu Judah mi le Gentail mitei lakah than tukin Khrih in thuaknak tawk tuk a, mah nungten thihnak pen a nunglehtu masabel hi tuk hi, tih khi,” ti hi.

²⁴ Paul in, ama hihnak thu le la a hilh ceng ten Festas in, “Paul, silzet sisi! Na cun tamnakin siltik zo hei!” tin auto hi.

²⁵ Mahten Paul in, “Bawipa Festas, sil mang hi. Thutak hilh ing hi!

²⁶ Maw kumpi Agrippa, nangma lakah ngalpha zetin awn ing; itahim titale nang cu hi thu hempoh hi a thei khawngtu hi ci. Pa khatno hei phawkngil ngawlin sialsiah khawngbel tuk ci, tin muang ing; itahim titale hitih bangin ka hilhmite hi kuamah i theih ngawlmi, a ningnawi ah selthong mite kha haw ma hi.

²⁷ Kumpi Agrippa aw, profette um cim? Um ci, tih thei ing!” tin ti hi.

²⁸ Agrippa in Paul cu, “Hih hun comno sungin Khristian ah suaktik nang ngei, tin maw na ngaihsut?” tin ti hi.

²⁹ Paul in, “Hun comno sung le hun saupi sung hihen, ka khut a thik taicin sialngawl, tuni nangmah le hilai a, ka thu a ngaitu hempoh, na venghawng uhin keimah bang hi thei le uh ci, tih hi ka thungetnak,” ti hi.

³⁰ Mahten kumpipa cu ngamuktu bawipa Bernis le midangte tuah dingto in,

³¹ a hawh nung haw ten pa khat le pa khat, “Hi pa hi thah tuk takin le thawngta tuk tak ngai in sualnak a bawlmi umma hi,” tin tidun li haw hi.

³² Mahten Agrippa in Festas lakah, “Rom kumpi lakah thu a khen sawlawn mata ahin, hi pa hi hah theihmi,” ti hi.