NUNGZUITU 24 - Ngawm Bible

Paul Cu Judah Ten Sonsia Haw

¹ Ni nga nungten Thiampi Sang Ananias cu upa khenkhatte le thukhentu Tertullas tuah Sisaria ah hawh haw hi. Ngamuktu bawi Felix mai ah hungin, Paul a sonsiat haw thu cu hilh haw hi.

² Paul cu samin, thukhentu Tertullas in Paul i sualnak a notnak thu cu a nuailam bangin hilh hi: “Ngamuktu bawipa, cihnak tuah lam na pui hangin huncan ngeipi sung lemdaihnak ngah ung a, ka ngam uh phatnak tukin le lep kul mite cu lep hi zo hi.

³ Mah ka muh uhten lungdam zetin sang ung hi.

⁴ Na hun tam leita laksak kawn ung tih ka lau hangin ka hilhnuam uhmi khi a com theibel hilh tuk ung, hehpihnakin ngai zazalin hi.

⁵ Hi pa hi buainak pia thei pa le lauhuai zetmi hi tin mu ung hi. Leihum mun tihkim Judah mite buaitik lelengin, Nazarenes a tihmi haw sung pen amah cu lamhuaitu hi.

⁶ Ka Biakinn uh nawngkaitik tukin a um laihtakin man ung hi. Mahten keimu Daan bangin a thu sonnuam ung hi;

⁷ Mahnaven ngal bawipa Lisias hungin lonsak lo hi.

⁸ Mah nungten Lisias in, Paul i sualthu son nuamte cu nangma lakah hawh haw hen tin thupia hi. Nangmah in hi pa hi thu na dong ahin ama lak pen sual ka not uh mite hi nangmah loli in thei tuk ci,” ti hi.

⁹ Mahtin a hilhmi cu Judah miten bawmin, a hilhmi hi a venghawngin man khawng hi tin ti haw hi.

Felix Mai Ah A Sihsannak Son

¹⁰ Ngamuktu bawi in, Paul cu thusonin hi, tin a khutzap hi, mahten ngamuktu bawipa i lakah Paul in, “Nangmah cu hi ngam sungah kum ngeipi thusontu le nadektu tih cu thei ing, atu na mai ah ka sihsan khualnak thu son theihnak thu ka ngah hangin lungdamzet ing.

¹¹ Jerusalem ah Pathian bia tukin ka hawhnak hi ni sawm le ni nih sangin tam saw ma laih tih cu thei tuk ci.

¹² Biakinn sung pen kuamah tuah hei in thu dondun awng ma ung tih cu Judah mite vangin thei khawng haw hi. A pumkhawm inn hawah le khuapi sung mun dadangah hei in hihen, mipi ka tokpilnak mu hihim haw tukma hi.

¹³ Mahten atu na mai a, sual a notmi haw hei hi man tatak hi tih hei in lak thei bokma hi.

¹⁴ Bawl ngai loli ing, tin na mai ah ka tihnuammi cu hi bangin hi. Ka pu le pa tei Pathian bia ing a, mahtin ka biaknakah Lampi ka tih uhmi cu zui ing hi; amuh ten mah Lampi cu man ma hi tin ti haw hi. Mahnaven Moses Daan sungah ngatmi hempoh le profet tei ngatmi laibu sung a ummi hempoh vang a venghawngin ka upmi na hi khawng hi.

¹⁵ Amuh bang bokin keimah vang cu Pathian nelah muansannak nei bok ing. Mah muansannak cu mi hempoh ten mipha hihen, pha ngawl hihen, thihnak pen tholeh haw tuk tihmi hi.

¹⁶ Mahten Pathian mai le mihing tei mai ah lungmu thiang nei tukin ka zuam theihzahin zuam leleng ing.

¹⁷ “Kum ngeipi sung Jerusalem khua ka henleh ngawl hangin ka miphun bopnak tuk tangka pia tukin le biakpiaknak bawl tukin Jerusalem ah hawh ing.

¹⁸ A daan bangin thianthohnak ka bawl ceng ten a hum a, ka hilhmite ka bawl lih laihtakin Biakinn sungah keimah cu mu haw hi. Mahlai takin, ka lakah mipi cu um haw ma hi; buainak vang umma hi.

¹⁹ Mahnaven mahlai ah Asia ngam pen a hungmi Judah mi khenkhat um haw hi. Mahmi ten ka humah lungkim ngawlnak a nei haw tale na mai loli ah amuh hungin, a mawhsiatnak haw cu a hilh bok haw tukmi hi.

²⁰ Mah ahimata hilai ah a ummi ten khonsil upa tei mai ah ka din laihin ka sualnak amuh haw mi son haw hen.

²¹ Amu mai a ka din laihin thil pa khat bek ka son nuammi cu; ‘Mithite tholeh haw tuk tin ka up hangin tusunin ka sualnak thuson haw hi,’ tin hilh hi.”

²² Mahten Felix cu mah Lampi thu a phano in, a zatu a hih hangin a thu sonmi haw cu cawltikin, “Ngalbawipa Filias hen ten na thu uh sonleh tung,” ti hi.

²³ Paul cingtu ngalbawipa lakah, “Paul hi phano in cing unna, dawmno luattik deuhin, a kul le sapmite cu a ngualcam ten pia haw hen,” ti hi.

²⁴ Ni dawm ngei nungten Felix cu a zi Drusilla tuah hung haw hi. Drusilla cu Judah mi hi. Paul cu a sam ten Paul in, Jesuh Khrih upnak thu khi hilhmi cu ngai haw hi.

²⁵ Mahnaven Paul in, a phatnak thu, mah le mah supnak thu le a heng tukmi thukhennak thu a hilh ten Felix cu a thinsu in, “Atu-in kikleh hihin hi. Hun ka neih ten samleh tung,” ti hi.

²⁶ Felix cu Paul in sum pialeh tin ngaihsut kuhnak nei hi. Mah hangin Paul cu sam lelemin thusonpih mek hi.

²⁷ Kum nih lawi ten ngamuktu Felix i nadeh cu Porsius Festas in thek hi. Judah mitei lak pen maipha a ngah nuam hangin Felix in Paul cu suah ngawlin thawnginn sungah zam hi.