NUNGZUITU 18 - Ngawm Bible

Korin Khua Ah

¹ Mahnung ten Paul cu Athen pen tulin Korin khua ah heng hi.

² Mahlai ah Pontius ngam pen a suakmi Judah mi Aquila tawk hi. Aquila cu a zi Priscilla tuah Italy pen a taimi haw hi. Itahim titale Rom kumpi Klaudias in Judah mi hempoh cu Rom khua pen a hawlvawk hangin tai haw hi. Paul cu a inn hawah lengin,

³ Aquila le Priscilla cu puanbuk khui in pumcawmmi hi haw hangin Paul vang cu amuhte tuah puanbuk bawlin pumcawm bok hi.

⁴ Sabbath nisialin Pumkhawm innah Judah mi le Grik mite a lungmu haw ciangtik tukin thu sonkhawm mek haw hi.

⁵ Mesidonia pen Silas le Timote tei hen ten Paul cu a hun neihmi hempoh cu thusonnakah mangin, Jesuh cu Khrih tatak hi tin Judah mitei lakah hilh het hi.

⁶ Amuh ten Paul i thu cu elin awnkam sia tuah a don haw hangin Paul in, a lungkim ngawlnak a laknakin a puan hum a leivul thiingta zamin, “Na phathong uh tale cu nangmu sual hi tuk hi. Kei mawhsiat pahsuh un! Tu pepan Gentail mitei lakah hawh tung,” ti hi.

⁷ Mahten tulin Titias Jastas a tih haw pa i innah um hi; Titias Jastas cu Pathian biatu a hih hangin a inn cu pumkhawm inn elno ah um hi.

⁸ Pumkhawm inn uktu upabel Krispas vang cu a innkua tuah Topa i thu ummite haw hi; mahten Korin khua a, mi tampi vangin Pathian thu cu zain, a up haw hangin tuiphum haw hi.

⁹ Zan khat cu Paul in muhnak nei a, mahlai sung pen, “Paul, lau pahsun! Hilh li pohin, thasia him pahsun.

¹⁰ Nangma lakah um ing. Kuamah in haksatnak pia thei haw tukma hi, itahim titale hi khuasung a, mi tampi cu ka mihingte haw hi,” ti hi.

¹¹ Mah hangin Paul cu kum khat le alang sung umin, mipi lakah Pathian thu hilh leleng hi.

¹² Gallio in Akhaia ngamuktu Rom mangki a deh laihin, Judah mite tawkdun khawm haw a, Paul cu manin zungah henpih haw hi.

¹³ “Hi pa in mipi tei lakah, Pathian biakdan tuah a kalhdunmi zilh hi,” tin ti haw hi.

¹⁴ Paul i ot tuk kek ten Gallio in Judah mitei lakah, “Thil sual ahimata thilpha ngawl pa kha khat bawlnak i hangin ahi tale Judah mite nangmu humah thinsau zetin um tung.

¹⁵ Mahnaven atu-in, na biaknak uh i awnkam, min le na daan uhte hangin nangmuhno soncat un! Mahti bang thu ah thukhentu hi thei tuk mang,” tin ti in,

¹⁶ a zung sung pen Judah mite hawlvawk khawng hi.

¹⁷ Pumkhawm inn uktu Sosthenes cu man khawngin zung mai loli pen vat haw hi. Mahnaven Gallio in thupi sa kha ma hi.

Antiok Khua Ah Kikleh

¹⁸ Paul cu Korin khua a thu umtute tuah ni tampi sung a um ceng haw ten Priscilla le Aquila tuah Siria ah hawh haw hi. Kenkhria pen hawmkuang tuah a hawh haw laih ngawlin thutiamnak a bawl zo bangin Paul in, a sam met hi.

¹⁹ Efesa khua a hen haw ten Aquila le Priscilla cu zam hi. Pumkhawm innah tumin, Judah mite tuah thu siamkhawm haw hi.

²⁰ Ngeideuh um tukin kun haw naven a lungkim ma hi.

²¹ A tul tuk ten, “Pathian in lem a titale nangmu lakah hungleh tung,” tin thucahta in, Efesa pen hawmkuang khungin hawh hi.

²² Sisaria a hen ten Jerusalem khua ah letvawkin, mahlai a pawlpite otpih vawk thahin Antiok ah hawhleh hi.

²³ Mahlai ah tawkfang sung a um nungten thawn lehin Galatia le Frizia ngamah zin kawi in thu umtu hempoh thazaang caktik hi.

Efesa le Korin Ah Apollos Heng

²⁴ Mah hun laihin, Alexandria pen a suakmi Judah mi Apollos a tih haw, Efesa khua ah heng hi. Amah cu thuson thiam zetin Lai Thiangtho vang theizet hi.

²⁵ Topa i Lampi thu ah zilhsa mi hi a, lungthozet le man cikcekin Jesuh i thu le la cu sonin zilh hi. Mahnaven a theihmi cu Johan i zilhmi tuiphumnak thu bek hi.

²⁶ Pumkhawm innah ngalpha zetin thuzilhin, a thuzilhmi cu Priscilla le Aquila ten a zak haw ten amu innah samin, Pathian i Lampi thu khi ciang saw deuhin hilh haw hi.

²⁷ Apollos cu Akhaia ngamah hawh a tum hangin Efesa khua a thu umtu ten bawmin, Akhaia khua a thu umtu tei lakah Apollos a caam theihnak tukin lai ngatsak haw hi. Akhaia khua a hen ten Pathian hehpihnak hangin umtu tei ca in bawmtu pha zetin cang hi.

²⁸ Itahim titale mi thu eldan thiam zetin Jesuh cu Khrih tatak hi, tin Lai Thiangtho sungta la in sonciangtik hi. Mahten mipi tei mai ah thu nialdunin Judah mite khi neh thei leleng hi.