NEHEMIAH 9 - Ngawm Bible

Mipi Ten Sual Phuang Haw

¹ Mah ha, ni sawm nih le ni li ni-in, Israel mite cu munkhatah tawkdun khawmin, a sualsihnak haw langtiknakin, ancang haw; thangkhau puan silhin, a lu hawah leivul theh haw hi.

² Ngamdang mite tuah cokheldun ngawlin a dang vilvelno in, um haw hi. Ding haw in, amuh sualnak le a pu le pa tei sualnak cu phuang haw hi.

³ Nazi pa thum sung Topa a Pathian haw i Daan a sialmi haw cu ngai in, mah ceng nazi pa thum cu a sual haw phuangin, Topa Pathian cu bia haw hi.

⁴ Levi tei ca in taitan dawhin, mah humah Jeshua, Bani, Kadmiel, Shebaniah, Bunni, Sherebiah, Bani le Chenani ding haw a, nging zetin, Topa a Pathian min sam haw hi.

⁵ Levi mi Jeshua, Kadmiel, Bani, Hashabneiah, Sherebiah, Hodiah, Shebaniah le Pethahiah ten biaksamnakin, hi bangin ti haw hi. “Ding unna, Topa, na Pathian uh cu thangphat un, Kumkhua pen kumkhua tian amah cu thangphat un, A min sunglawi cu mi hempohin thangphat un, Mihing thangphatnak cu cangkim ma hi, mi hempohin thangphat un,” ti haw hi.

Sualsihnak Thunget

⁶ Israel mipi ten hi bangin thungen haw hi: Topa aw, nangmah bek Topa hi ci, Van le aksite nangma bawl hi. Nangmah in lei le tuipi le a sungum mi hempoh bawl khawngin, nunnak pia khawng ci. Vanah a ummi hempoh ten nangmah cu kunin bia haw hi.

⁷ Topa Pathian, nangmah in Abram teng ci. Babilon ngam Ur khua pen sam ci; A min cu Abraham in thek ci,

⁸ Muantakin, na muh hangin, Amah tuah thutepnak bawl ci. Kanaan ngam pia tukin thutiam ci. Hit mi, Amor mi, Perez mite, Jebus mi le Girgash mitei ngam cu a casuan tei umnak ngam tuk hi ti ci. Na thutepmi bangin kimtik ci a, muantakmi na hih hangin hi.

⁹ Izipt ngam a, ka pu le pa tei a thuakdan haw mu ci, Tuipi San pen bopnak a nget haw za ci;

¹⁰ Faro dodalin thasiahhuai nalamdang bawl ci, A khutnuai bawi le a ngam mite dodalin, Na mihingte a bawlsiat leita haw hangin, nangmah in neh ci, atu hei in, na minthang hi.

¹¹ Tuipi satcatin, na mihing tei lampi bawlsak ci, Leiko humah pui in, a hiltute cu tui cawkpi sung a, suangtum a nim bangin, tuipi thuk sungah caak haw hi.

¹² Sunlamin, meingo tuah lamhuai ci, Zanlamin, a lampi haw cu mei alh vak tuah det ci,

¹³ Sinai Mual humah van pen na tolhsuk ten, mahlai ah na mihing tei nelah awn ci,

¹⁴ Sabbath ni thiangthotik tukin zilh ci, Na sila Moses lak pen na daante pia ci.

¹⁵ A ngilkial haw ten van pen cangho khiasuk ci, Adangdum haw ten suangpi sung pen, a in haw tuk tui tultik ci. A hennak haw tuk ngam cu luahtum tukin hilh ci, A lak hawah pia tukin na tepsa mi ngam cu.

¹⁶ Mahnaven ka pu le pa uhte cu tuangkhawngin, a lungmu haw khohzet hi. Na thupiakmi zui nuam haw ma hi.

¹⁷ Na thu zui nuam ngawlin na bawlmi nate phawkngil khawng haw, Na lamdang na bawl mite cu cingleh haw ma toh. A uangthuannak haw tuah hotu teng haw hi, Izipt saltannakah kihpihleh tukin hi. Mahnaven nang cu mi ngaidamtu, thangaitu Pathian hi ci, Hehpihnak le itnak nei ci, thinsauzet ci. Na hehpihnak cu ngeng ngangai hi, nung hek tuk phal ma ci.

¹⁸ Khuicang lim bangin pathian milim bawl haw hi. Izipt ngam pen ohte suahtu Pathian hi, ti haw hi. Topa iti zahin kaw nang a zawnsak haw!

¹⁹ Mahnaven phillawnah lawl ma ci, Na hehpihnak a ngeng hangin Meingo le mei alh cu laleh phal ma ci, sun le zanin, a lampi laktute haw hi.

²⁰ Na phatnak hangin a bawl haw tuk hilh ci, Manna tuah cawmin, a in haw tuk tui pia ci.

²¹ Kum sawm li sung phillawnah, A kulmi hempoh haw pia khawng ci, A puansilh haw sia awng ma hi, A ke haw na in bum awng ma hi.

²² Ngam tampi le miphun tampi nehtik ci. A ngam elkim a, ngamte cu Sihon i ukmi Heshbon ngam neh haw, Og kumpi a dehnak Bashan ngam vang.

²³ Van aksi zahin canau pia ci, A pu le pa tei lak a, na tepsami, a luahtum haw tukmi ngam cu nehtikin luahtumtik ci.

²⁴ Kanaan ngam cu la in, neh khawng ci, Na mitei lakah a deih haw mi bawl theihnak huham pia ci. Kanaan ngam kumpite le a mihing tei humah.

²⁵ Na mihing ten kulhtian khuapi la haw, Ngampha le tuikhuk cawh sate, Sum le pai tuah a dimmi inn vang, Olif kung, thingngah kung le sabit huan tuah. A duhzah haw ei in thau haw, Na piakmi thilpha humah nunnopzet haw hi.

²⁶ Mah bang hi napi in, na mihingte cu ngaltho haw hi. Na thu zui nuam haw ma, na daan piakmi nunghek haw hi. Na thuzilhtu profet that haw in, Ngallinnak piatu le na lakah kikleh tukin thu hilhtute a zotsaknak dan haw nase ngangai hi.

²⁷ Mah hangin a ngal tei khut sungah hengtik ci, Amuh ten ukin, bawlsia haw hi. A lung haw a bing ten na bopnak deihin sam haw a, van pen a aunak aw haw cu za ci, Na mi hehpihnak a ngeng hangin, A ngal tei khut sung haw pen pan tukin hi. A lak hawah hotute hah ci.

²⁸ Lemdaihnak a neih haw ten, sual lehleu haw hi, A ngal tei khut sungah hengtikleh ci. Mahnaven a sualnak haw sikkikin nunnak a nget haw ten, Na hehpihnak a ngeng hangin hi. Van pen za in, a vei sialceng ngawlin panleh ci.

²⁹ Na thupiakmi zui tukin ngallinnak pia ci, pualthau in, na daan cu lawl haw hi; Na Daan zui cu nunnak lampi hi leng naven? Thinlian le lungmu ngawngtawhin zui nuam haw ma hi.

³⁰ Kum khat nung kum khat thincualin ngallinnak pia ci, Na profet ten hilh li haw naven, Na mihingte cu bengbul haw hi. Mah hangin na mihingte cu miphun dang ten uk haw hi.

³¹ Mahnaven na hehpihnak a ngeng hangin, lawlthong ngawlin le siatsuah khawng ma ci; Nang cu hehpihnak neitu Pathian hi ci!

³² “Maw Pathian aw, Ihempoh tithei Pathian, A lauhuaimi le ihempoh bawl theitu Pathian; Na thutepmi cu cangkim zetin kimtik khawng ci. Assiria kumpi tei a bawlsiat pen pan, Tuni tian ka thuak uhmi hi, Thu neuno in ngaihsut sak zal pahsun. Ka kumpi uhte le ka hotu uhte, Ka thiampi uhte le ka profet uhte, Ka pu le pa uhte le ka mipi tei thuakmi, Hi tizah ka thuak uhmi hi hu theihsak zalin hi.

³³ Keimuh na bawlsiat mekmi hi dik hi, bawlsiat thuak taak ung. Nang cu muantak hi ci, keimuh sual ung hi.

³⁴ Ka pu le pa uhte ka kumpi uhte pepanin, Ka hotu uhte le ka thiampi uhten, na Daan cu zui haw ma hi. Na thupiakmi le na ngallin piakmi cu, Ngai nuam hihim haw ma.

³⁵ Na muicu piakmi hangin, kumpi in, na mite uk hi. Na piakmi ngam zalzet le ngampha sung a um haw laihin, sualnak sung pen kikleh ngawlin nangma nadek haw ma.

³⁶ Atu-in, na piakmi ngamsung le Ei le intuk a piatu hi ngam pha sungah salin suakta ung.

³⁷ Ka ngamsung uh pen a suakmi hempoh cu, kumpi lakah hawh khawng hi; Ka sual uh hangin ka hum uh a, na koihmi bawi lakah keimah hihen, ka ngan uhte hei hihen, a nuanuamin bawl haw hi, ka lung uh bing hi,” tin ti haw hi.

Lungkimnak Lai Ngan Haw

³⁸ Ka hum uhah a piang mite hangin Israel miten atu-in, lai nganin, lungkimnak laikhet bawl ung a, ka hotu uhte, ka Levi mi uhte le ka thiampi uhten a humah a min haw khen haw hi.