NEHEMIAH 12 - Ngawm Bible

Thiampi le Levi Mite

¹ Babilon saltannak pen Shealtiel i capa Zerubbabel le Thiampi Sang Joshua tuah a kikmi thiampi le Levi mite cu a nuailamte haw hi. Seraiah, Jeremiah, Ezra, Amariah, Malluk, Hattush, Shekaniah, Rehum, Meremoth, Iddo, Ginnethoi, Abijah, Mijamin, Maadiah, Bilgah, Shemaiah, Joiarib, Jedaiah, Sallu, Amok, Hilkiah le Jedaiah. Hite cu Joshua san a unau thiampi tei lak pen hotu hi haw hi. Lungdamnak la a sak haw ten a nuailam mite hi la puitu haw hi: Jeshua, Binnui, Kadmiel, Sherebiah, Judah le Matteniah.

Thiampite: Levi mite:

⁹ Bakbukiah le Unno cu a unau haw Levi mite tuah lalem dondunin, a satu haw hi.

Thiampi Sang Joshua Casuante

¹⁰ Joshua cu Joiakim i pa hi. Joiakim cu Eliashib i pa hi. Eliashib cu Joiada i pa hi.

¹¹ Joiada cu Jonathan i pa hi. Jonathan cu Jaddua i pa hi.

Thiampi Hinnam Hotute

^12-21 Thiampi Sang Joiakim khanin, a nuailamte hi thiampi hinnam tei hotute haw hi. Seraiah hinnam pen Meraiah, Jeremiah hinnam pen Hananiah, Ezra hinnam pen Meshullam, Amariah hinnam pen Jehohanan, Mallukhi hinnam pen Jonathan, Shebaniah hinnam pen Josef, Harim hinnam pen Adna, Meraioth hinnam pen Helkai, Iddo hinnam pen Zekhariah, Ginnethan hinnam pen Meshullam, Abijah hinnam pen Zikhri, Miniamin hinnam pen, Moadiah hinnam pen Piltai, Bilgah hinnam pen Shammua, Shemaiah hinnam pen Jehonathan, Joiarib hinnam pen Mattenai, Jedaiah hinnam pen Uzzi, Sallai hinnam pen Kallai, Amok hinnam pen Eber, Hilkiah hinnam pen Hashabiah, Jedaiah hinnam pen Nethanel na hi haw hi.

Thiampi le Levi Innkuate

²² Thiampi Sang Eliashib, Joiada, Johanan le Jaddua tei khanin, Levi mi innkuate le thiampi innkua tei hotu cazin cu phano in koih haw hi. Cazin cu Darias in Persia kumpi a deh tian Khang Tangthu Laibu sungah sialsiah haw hi.

²³ Levi mi innkua hotu tei cazin cu Eliashib i tu Johanan khan tian Khang Tangthu Laibu sungah sialsiah haw hi.

Biakinn Nadeh Sepmi

²⁴ Levi mite cu Hashabiah, Sherebiah, Jeshua, Binnui le Kadmiel tei ho in, bu tamzet khen haw hi. Pathian i mihing, kumpi David i thupiaknak bangin tum khatah bu nih, bu nih dondunin, Pathian thangphatin, Pathian nelah lungdamnak thu hilh haw hi.

²⁵ Biakinn kongka tei el na koihnak innte cingtu cu a nuailamte haw hi. Matteniah, Bakbukiah, Obadiah, Meshullam, Talmon le Akkub.

²⁶ Hite cu Joshua capa le Jehozadak i tu Joiakim khan le ngamuktu bawi Nehemiah khan le Daan theizettu le thiampi Ezra khan a umte hi haw hi.

Khuapi Kulhtian Pathian Lakah Ap Haw

²⁷ Jerusalem khuapi kulhtian cu Pathian lakah a ap haw ten daal, daakkop, tingtang le phaidaak tumin, mi hempohin lungdamnak lasa in, lungdam thatui zetin, a tel khawng ten theih hawnak tukin Levi mite cu a umnak tihkim haw pen Jerusalem ah sam khawng haw hi.

²⁸ Levi mi lasatute cu a umnak mun haw pen le Jerusalem elkim Netofah elkim khuate,

²⁹ Bethgilgal, Geba le Azmaveth khua pen tul khawm haw hi.

³⁰ Thiampi le Levi ten amu thianthoh biakpiaknak tuk le mipi ca biakpiaknak kongkate le khuapi kulhtian thiantiknak biakpiaknakte cu bawl haw hi.

³¹ Judah mi hotute cu kulhtian humah kaitikin, Pathian nelah lungdam thuhilh thahin, khuapi kimtu tukin bu ngengzet bu nihah khen ing. Bu khat cu kulhtian humah taklam pen Buak Kongka lamah hawh haw hi.

³² Lasatu tei nung pen Hoshaiah hawhin, amah cu Judah mi hotu khenkhat ten zui haw hi.

^33-35 Mah tei nung pen a nuailam a, thiampi ten pengkul tumthahin zui haw hi. Masabelin Azariah, Ezra, Meshullam, Judah, Benjamin, Shemaiah le Jeremiah haw hi. A zomtu in Jonathan i capa le Shemaiah i tu Zekhariah hi. (A pu le pate cu Matteniah, Mikaiah le Zakhur haw hi, Asaf hinnam haw hi.)

³⁶ Zekhariah cu a hinpih unaute: Shemaiah, Azarel, Milalai, Gilalai, Maai, Nathanel, Judah le Hanani ten zui in, a venghawng haw in, Pathian mihing kumpi David i tummi awnmawi bang cu cawi tek haw hi. Hite cu a hawh haw ten laithiamsang Ezra in lamhuai hi.

³⁷ Ciktui Kongka a hen haw ten David khuapi hawhnak kailawn kai in, David kumpi inn a kal haw ten khuapi nisuahnak lam Tui Kongka kulhtianah hengleh haw hi.

³⁸ Lungdam thuhilhtu bu dang pa khat cu kulhtian hum veilamah hawhin, keimah le mi khenkhat ten zui ung. Hawhngutin, Meikhu tulnak Tausangpi tihmi kalin, Pang Zalzet tihmi mun heng ung.

³⁹ Mahlai pen Efraim kongka, Jeshanah kongka, Ngasa kongka, Hananel taitan le Za khat taitan kalin, Tuu kongka ka hen nung uhten Ngalvil kongka ah tawptik ung hi.

⁴⁰ A bu nih haw in, Pathian thangphat thahin, Biakinn el heng haw hi. Ka lak a hawhmi hotute sialngawl,

⁴¹ pengkul tumthahin, thiampi Eliakim, Maaseiah, Miniamin, Mikaiah, Elioenai, Zekhariah le Hananiah tel bok haw hi.

⁴² Lasatute ah Jezrahiah ho in, Maaseiah, Shemaiah, Eleazar, Uzzi, Jehohanan, Malkhijah, Elam le Ezer tel haw in, a aw neih tawp haw tuah lasa haw hi.

⁴³ Mah ni-in, biakpiaknak tampi bawlin lungdamnak tuah dim haw hi, itahim titale Pathian in lungdamzet tukin bawl hi. Mah lungdamnak puai ah numei le naupangte vang tel haw in, a thawmnging haw cu khawlapi tian thang hi.

Biakinn Ca Tuk Piakmite

⁴⁴ Mah laihin, a an haw masabel a lak hun le a thingngah haw kumsialin, a ngah masabelte, seh sawm seh khat le a dadang Biakinn ca tukin a piakmi tei koihnak innte cingtu tukin mihing koih haw hi. Hi a koih haw miten na koihnak inn a cin haw hum pen, Daan sung a, um bangin thiampi le Levi tei ca in, a piak haw mite cu khuapi el a, ummi lo pen kai khawm haw hi. Judah mi hempoh cu thiampi le Levi tei humah lungdamzet haw hi.

⁴⁵ Itahim titale Pathian thupiakmi bangin bawl haw in, komzetno in thianthoh biakpiaknak vang bawl haw hi. Biakinn lasatute le biakinn cingtute vangin kumpi David le a capa Solomon i thupiakmi bangin, a nadeh haw cu komno in dek haw hi.

⁴⁶ Tanglaih kumpi David le la thiam Asaf khan laih pepan lasatute cu thangphatnak la a sak haw ten le Pathian lak a, lungdam thu a hilhmi hotu hi leleng haw hi.

⁴⁷ Zerubbabel khan le Nehemiah khan hei ah Biakinn lasatute le Biakinn cingtu tei pumcawmnak tukin Israel miten nisialin, sumpi pia leleng haw hi. Mipi ten biakpiaknak thiangtho cu Levi tei lakah pia in, Levi ten a piak haw tuk zah cu Aaron i casuan thiampite pia bok haw hi.