NEHEMIAH 11 - Ngawm Bible

Jerusalem Ah A Umte

¹ Hotute cu Jerusalem khuapi ah um haw; mipi sung pen innkua sawm sungah pa khat cu Jerusalem ah um tukin aisan haw in, a dang hempoh cu khuasung le khuano sungah um haw hi.

² Jerusalem khua sungah um tung hi tin lungkim zetin, a ti theitute cu mipi ten pak ngangai haw hi.

³ Israel mipi thiampite, Levi mite, Biakinn satute le Solomon i umlawh tei casuante cu khua dang le khuano sung, amu leingam tekah um haw hi. Judah peng sung pen Jerusalem a um upa minthang deuhte cu a nuailamte haw hi. Uzziah i capa le Zekhariah i tupa Athaiah. A pupa dangte cu Amariah, Shefatiah le Mahalalel hi a, Judah i capa Perez i casuante haw hi.

Judah hinnam sung pen Jerusalem a umte:

⁵ Baruch i capa le Kolhozeh i tu Maaseiah. A pupa dangte cu Hazaiah, Adaiah, Joiarib le Zekhariah hi haw a, Judah i capa Shelah i casuante haw hi.

⁶ Perez casuan sung pen mi minthang za li sawm luk le liat cu Jerusalem ah um haw hi. Meshullam i capa le Joed i tu Sallu. A pupa dangte cu Pedaiah, Kolaiah, Maaseiah, Ithiel le Jeshaiah haw hi.

Benjamin hinnam sung pen Jerusalem a umte:

⁸ Sallu i sangngam Gabbai le Sallai. A venghawng haw in Benjamin innkua sung pen za kuah le sawm nih le liatte cu Jerusalem ah um haw hi.

⁹ Zikhri i capa Joel cu a hotu haw hi, Hassenuah i capa Judah cu Jerusalem khuasung a upabel sangtu hi. Joiarib i capa Jedaiah le Jakhin hi.

Jerusalem a um Thiampite:

¹¹ Hilkiah i capa le Meshullam i tu Seraiah. A pupa dangte cu Zadok, Meraioth, le Thiampi Sang Ahitub haw hi. Ahitub cu Biakinn zotu upa hi.

¹² A venghawng haw in, a hinnam sung haw pen za liat le sawm nih le pa nih cu Biakinn a, nadektu haw hi. Jehoram i capa le Pelaliah i tu Adaiah. A pupa dangte cu Amzi, Zekhariah, Pashhur le Malkhijah haw hi.

¹³ A venghawng haw in, a hinnam sung haw pen za nih sawm li le pa nih cu innkua hotu haw hi. Azarel i capa le Ahzai i tupa Amashsai. A pupa dangte cu Meshillemoth le Immer haw hi.

¹⁴ A hinnam sung haw pen za le sawm nih le liat cu ngalkap minthangzet haw hi. A hinnam sung a, upa Zabdiel cu a hotu haw hi, amah hi Haggedolim i capa hi. Hasshub i capa le Azrikam i tu Shemaiah. A pupa dangte cu Hashabiah le Bunni haw hi.

Jerusalem a um Levi mite:

¹⁶ Biakinn pualam a, nadeh neitu Levi mi minthang Shabbethai le Jozabad.

¹⁷ Mika i capa le Asaf casuan Zabdi i tusin Matteniah lungdam thungetnak la a sak haw ten Matteniah cu la puitu hi. Matteniah bawmtu cu Bakbukiah hi. Shammua i capa le Jeduthun casuan Galal i tupa Abda.

¹⁸ A venghawng haw in Jerusalem khua thiang sungah Levi mi za nih le sawm liat le pa li um haw hi. Akkub, Talmon le a innkuate za le sawm salih le pa nih.

Biakinn cingtute:

²⁰ Adang Israel mite, thiampi le Levi mi dangte cu Judah ngamsung khuapi le khuano sungah amu leingam tekah um haw hi.

²¹ Biakinn nadektute cu Jerusalem khua Ofel vengah um haw in, a hotu haw cu Ziha le Gishpa haw hi.

²² Jerusalem a um Levi tei hotu cu Bani i capa le Hashabiah i tu Uzzi hi. A pupa dangte cu Matteniah le Mica hi a, Asaf hinnam haw hi. Asaf hinnamte cu Biakinn khawm ten la satu haw hi.

²³ Hinkhat nung hinkhat nisialin, Biakinn ah lasa tukin kumpipa i thupiakmi hi.

²⁴ Judah phun, Zerah hinnam, Meshezabel i capa Pethahiah cu Persia kumpi zungah Israel tei palai hi.

Khuapi Dadang A Umte

²⁵ Mi tampi cu a lobunnak haw el a, khua ah um haw hi. Judah mite cu Kiriath Arba khua, Dibon le Jekabzeel khua le a elkim a khuanote ah um haw hi.

²⁶ Jeshua khua, Moladah khua, Bethpelet khua le

²⁷ Hazarshual khuate ah um haw in, Beersheba khua le a elkim khuanote ah um haw hi.

²⁸ Ziglag khua, Mekonah khua le a elkim khuano ah um haw hi.

²⁹ Enrimmon khua, Zorah khua, Jarmuth khua

³⁰ Zanoah khua, Adullam khua le a elkim khuano ah um haw hi. Lakhish khua le a el a lo a bunnak mun, Azekah le a el a khuanote ah um haw hi. Jerusalem khua el Hinnom Munlawn tianin, khua tihkimah um haw hi.

³¹ Benjamin hinnamte cu Geba khua, Mikmash khua, Ai khua, Bethel khua le a elkim khuano ah le

³² Anathoth khua, Nob khua, Ananiah khua,

³³ Hazor khua, Ramah khua, Gittaim khua

³⁴ Hadid khua, Zeboiim khua, Neballat khua,

³⁵ Lod khua, Ono khua le khutzung thiam Munlawnah um haw hi.

³⁶ Judah ngamsung a, ummi Levi mi khenkhatte cu Benjamin mite tuah munkhatah umtik haw hi.