NEHEMIAH 10 - Ngawm Bible

¹ Amasabelin min a ngantu cu ngamuktu bawi, Hakaliah i capa Nehemiah hi a; mahnung ten Zedekiah in, a min ngan hi. Min ngantu midangte cu a nuailam bangin na hi. Seraiah, Azariah, Jeremiah, Pashhur, Amariah, Malkhijah, Hattush, Shebaniah, Malluk, Harim, Meremoth, Obadiah, Daniel, Ginnethon, Baruch, Meshullam, Abijah, Mijamin, Maaziah, Bilgai le Shemaiah. Azaniah i capa Jeshua, Henadad hinnam pen Binnui, Kadmiel, Shebaniah, Hodiah, Kelita, Pelaiah, Hanan, Mika, Rehob, Hashabiah, Zakkur, Sherebiah, Shebaniah, Hodiah, Bani le Beninu. Parosh, Pahath, Moab, Elam, Zattu, Bani, Bunni, Azgad, Bebai, Adonijah, Bigvai, Adin, Ater, Hezekiah, Azzur, Hodiah, Hashum, Nebai, Magpiash, Meshullam, Hezir, Meshezabel, Zadok, Jaddua, Pelatiah, Hanan, Hasshub, Hoshea, Hananiah, Hasshub, Hallohesh, Pilha, Shobek, Rehum, Hashabnah, Maaseiah, Ahiah, Hanan, Anan, Malluk, Harim le Baanah.

Thiampite: Levi mite: Mipi hotute: Lungkimnak Laikhet

²⁸ Israel mi, thiampite, Levi mite, biakinn cingtute, biakinn lasatute, biakinn cingkhawitute le a dadang ten Pathian piakmi Daan zui in, ka ngamsung uh a um, miphun dangte tuah deidandunin, a dangno in ka um nung uhten, ka zi uhte, ka canu le capa uhte, thucing thei ka casuan uhte le,

²⁹ keimuh hotu ka unau uhte tuah munkhatno, khut lendunin, hi thutepnak ka siatsuah uh ahi tale tamsiatnak thuak tukin Moses khut pen Pathian i piakmi Daan zui in, ka Pathian uh i thukham hempoh cu ngai in, a daan le a thupiakmite ngalling zetin zui tuk ung hi tin, hi thutepnak cu bawl ung.

³⁰ Ka ngamsung uh a, ummi miphun dangte tuah huaidunnak bawl tukma ung.

³¹ Sabbath ni-in hihen, ni dang ni thiangtho ni-in hihen an le adang nate a zuak haw hei in lei tukma ung. Kum salih kum a kim sial ten ka leingam uh cu bung ngawlin mah kumin, leiba hempoh map tuk ung.

³² Kumsialin ka Pathian uh i Biakinn nadehnak tukin tangka cang khat i khen thum suah khenkhat pia leleng tuk ung.

³³ Ka Topa uh i Biakinn pen Pathian ka biaknak tuk uhin, cangho thiangtho, nisial an biakpiaknak a piakmi, nisial halkang biakpiaknak a piakmi nganhing, Sabbath ni, Ha Thak Puai le puai dadang a biakpiaknak thiangthote, biakpiaknak thiangthomi a dadang ca le Israel sualhah biakpiaknak tukin a kulmi hempoh pia tuk ung hi.

³⁴ Mipite, thiampite le Levi ten, Daan sung a, ummi bangbokin, Topa ka Pathian uh lakah halkang biakpiaknak ka bawl uhten a koi hinnamin, ituk ten thing cawi tuk tih theihciangnak tukin kumsialin aisan tuk ung.

³⁵ Kumsialin, ka an uh lak masabel le ka thingkung uh pen a ngah masabel cu Biakinn ah pia tuk ung.

³⁶ Daan sung a, um bangin Pathian Biakinn a, nadektu thiampi tei lakah, Pathian lak a, piak tukin ka capa uh upabel, khui catawntil, ka tuu uh le ka keel tei catawntil cu pia tuk ung.

³⁷ Pathian Biakinn ah le Biakinn nadektu thiampi tei lakah, kumsialin, ka cop masabel uh cang tuah bawlmi canghovam le sabit, olif thau le a dang ka neih uhmi thingngah a phunkim pia tuk ung. Lo ka bun uhmi pen, seh sawm seh khat a khontu Levi mitei lakah ka khua le ngamsung uh pen a suakmi an khen sawm khenkhat cu pia tuk ung.

³⁸ Aaron casuan thiampite cu seh sawm seh khat a khon haw ten Levi tei lakah tel bok haw tuk a, Levi ten a khon sa haw mi hempoh sung pen seh sawm seh khat cu Biakinn nadehnak tukin, Biakinn an koihnak khanah koih haw tuk hi.

³⁹ An, sabittui le olif thau a piak haw mite cu Israel mi le Levi ten biakinn kuang a koihnak haw khan, Biakinn nadektu thiampite, Biakinn cingtute le Biakinn lasatu tei umnak khanah koih haw tuk hi. Ka Pathian uh i Biakinn cu kinmawh ngawlin umthong tukma ung hi.