NAHUM 3 - Ngawm Bible

¹ Hi khuapi cu bo zo hi. Mizolnak le mi thahnak tuah a dimmi khuapi, mitei na lonsakmi le laksakmi tuah a dim mi khuapi.

² Ngai un, a ngolh vah thawm haw le a lengke nging thawm, a cipuh ke kal thawm le a cipuhleng tai ngingte cu!

³ Cipuh ngalkap ten simtum haw, a ngalnamte al zawzokin, a ceipi haw de zawzok hi. Miluang cu a thuahin thuah hi. Sialcelh ngawlin miluang tam hi! Miluang humah mihingte lum li haw hi.

⁴ Numei pha ngawl Nineveh cu dantatnak thuak hi. Diangin, iangneizet hi. Mahnaven a iangneihmi cu ngu nei in, mi tampi zolin, salah mang hi.

⁵ A sangbel Topa in, “Nineveh aw, nangmah dantat tung hi. Na puante duk khawng tung a, miphun tampi ten mu haw tuk hi. Na zahcak mualphonak cu mu haw tuk hi.

⁶ Nautatnak tuah zo tung. Mi tei ningdelhmi in bawl tung a, miten lamdangsa in, zo haw tuk hi.

⁷ A mutu hempoh ten canzok haw tuk a, ‘Nineveh sia khawng zo si, akua i hehpihnakno bek tawk tuk nen tim? Akua pohin tohpih haw tuk nan tim?’ tin ti haw tuk hi.”

⁸ Nineveh, Izipt khuapi Thebes sangin pha saw cuang cim? Thebes cu kulhtian bangin mi humhimtu Nail ngunpi nei hi. Nail ngunpi cu a ca in, a sihsan khualnak mun hi.

⁹ Amah in Ethiopia le Izipt ngam ukin, a ngilnak cu bo ni um ngawlin, Libia vangin dinpih hi.

¹⁰ Thebes mite vang salah manin, kaih tawk haw hi. Lampi kawi hempoh ah a khanglaite vat hum haw hi. A mi upa le a bawi deuhte cu thikkhau khihin, kai haw a, a mantu ten lengkektik khawng haw hi.

¹¹ Nineveh, nang vang zukham misil suak bokin, imah thei ngawlin lum tuk ci. Nang vang na ngal tei khut sung pen suakca tum bok tuk ci.

¹² Na ngalnannak munte cu a ngah min zetmi theikung bang hi haw tuk hi. Theikung cu hing inna, a ngah cu na kam sungah caksuk tuk hi.

¹³ Na ngalkapte cu numei bang haw a; na ngal tei mai ah, na ngam cu kuamah bawmtu nei ngawlin um hi. Na kongka khahnak ngolhte cu mei in kang khawng tuk hi.

¹⁴ Ngal ten umcip haw tuk a hih hangin tuicawi ham un. Na ngalpannak mun uhte kho zetin bawl un. Ukkhe bawl tukin taklei cil ham unna, ukkhe ahnak tuk kuang vang bawlham un.

¹⁵ Izahta in, na bawlham li hei in, mei in kangtum leleng tuk a, ngal tei khutin thi leleng tuk ci. Khaaumawng tei eih tummi ankung bangin bo khawng leleng tuk uh ci. Khaaumawngte bangin pungzet ci.

¹⁶ Sumbawltu hei van a, aksi sangin tam saw nei ci. Mahnaven atu cu um haw ma toh hi, a ha haw phalhin, a leng khawngmi khaaumawng bangin pai thong khawng zo haw hi.

¹⁷ Na bawi upate cu khawsik hun ten pang humah a kopmi khaaumawng bang haw hi. Mahnaven ni a suah ten leng khawng haw in, ilai hawh hum tih kuamah in thei haw ma hi.

¹⁸ Assiria kumpipa, na ngam uktute thi zo haw in, na miphun upate cu kumkhua in hihbu zo haw hi. Na mihingte mualhumah vakvai khawng haw in, innah a pui kiklehtu tuk kuamah umma hi.

¹⁹ Na liamma cu dam theihnak a um ngawl hangin na meima cu dam awng tukma hi. Siatsuahnak na tawh tuk a theitu hempohin, lungdamin baibeng haw tuk hi. Hehpihnak nei ngawlin mi na bawlsiatnak pen a suakcatu akua um hum?