NAHUM 2 - Ngawm Bible

Nineveh Caksuknak

¹ Nineveh aw, nangmah do in, a siatsuahtu tuk pa heng zo hi. Lampi phano in cing unna, na puan uhte khim zetin silh un. Na huham uh suah khawng un.

² (Siatsuahtu ten a nate lonsakin, a siatsuah khawng haw hei in Topa in, Judah le Israel sunloihnak cu pia kikleh tuk hi.)

³ A ngal tei lumphaw cu a san hi. A ngalkapte cu puansan thuam haw in; a cipuhlengte cu ngal do tukin tim a tuah haw ten mei alh de bangin de hi. A cipuh haw cu a dawkin, dawk haw hi.

⁴ Cipuhleng mawngtute cu ngak zo ngawlin, lampi ngengpi humah dawk kawkawi haw; mipi khopnak munlawnah kik kawkawi in, dawk haw hi. Mei-alh de bang haw a, khuaphelep bangin de zawzok haw hi.

⁵ A tuam a tenmi ngalbawite sam haw hi. A nawtdunnak haw pen bah thathah haw hi. Khuapi kulhtian humah tai haw in, ngal tei kulhtian a suknak haw cu, a khaktu manlangin bawl haw hi.

⁶ Ngun mawklam a, kongkhahte cu siatsuah khawng sa zo hi. Kumpipa i inn cu lauthawngnak tuah dim hi.

⁷ Kumpinu man haw in, a sal ten khulo kap bangin kah haw hi; thasia in, a awm cumdun li haw hi.

⁸ Ngun tuipi a datnak cimin, tui a pah bangin, Nineveh khuapi sung pen mihing pahtul luluih haw hi. “Tai pahsuh un, tai pahsuh un,” tin au haw hi. Mahnaven kuamah kik nuam cuang haw ma hi.

⁹ A Sui le ngunte lonsak khawng unna, hi khuapi cu na manpha tuah dim hi.

¹⁰ Nineveh cu siatsuah khawng sa zo hi. Zamsanmi le ngamko in cang zo hi! A tha haw bo in, a mai haw dalkhawng hi.

¹¹ Atu-in khuapi cu ilai ah him? Kiosa kua tuah a bangve mi khuapi, pawpino cawmnak mun, kiosa cangpi le kiosa pinu tei hawhnak mun, pawpino tei himnak khuapi cu ilai ah um him?

¹² Kiosa cangin sa manin, a zi le ca tei ca tukin petin bawhkek sak khawng hi. Akua sung cu bawhkek sami cik tuah dim hi.

¹³ Topa in, “Keimah cu nangma ngal ing. Na cipuhleng uhte halkang khawng tung. Ngal tei khutah na ngalkap uhte thi haw tuk hi. Midang nel pen na lak uhmi cu na nel uh pen laksakleh khawng tung. Na palai tei ngetmi cu kuamah in za haw tukma toh,” ti hi.