NAHUM 1 - Ngawm Bible

¹ Nineveh khua thu tuah pehdunin, Elkosh khua mi Nahumin muhnak a neihmi cu hi bangin hi.

Nineveh Humah Topa i Thinuknak

² Topa in amah dodaltute zo thong ma hi. Amah langpangtute cu dantatin, a thinuknak tuah lulleh hi.

³ Topa cu baihno in, a thinuk ma hi, mahnaven a huham nasezet hi. Misualte dantat ngawlin luattik hihim tukma hi. Simpei le huihpi sungah a lampi umin, meingo cu a keciahnak pen a khu tomi leivul khu hi.

⁴ Tuipi cu thupia in kangtik hi, luitui hempoh vang ko khawng hi. Bashan ngam le Karmel mualte ko khawng haw hi. Lebanon mualhum a, paakte vang thim khawng haw hi.

⁵ Mualsangzette a mai pen hing haw in, mualniamte cim khawng haw hi. A mai pen leipi le a hum a ummi mihingte cu canin, hing tawtok haw hi.

⁶ A thinuknak mai ah akua kaw a ding thei tuk? A thinuk pulhang laihtak cu akua in thuak thei tuk him? A thinuknak cu tuisa bangin buak hi. A mai ah suangte hei leivulah cang khawng haw hi.

⁷ Topa cu mipha hi. Haksatnak hun ten a mipi tei ca in himnak phabel hi. A nelah humhimnak a zeitu cu hehpihin suahcaknak ngah haw hi.

⁸ A ngalte cu tuipi khang bangin siatsuahin, a dodaltute cu thihnak khuathim sungah khesuk khawng hi.

⁹ Topa suam tukin i bawl tum li uh cim? Amah in nangmuh siatsuah khawng tuk hi. Kuamah in vei nih tian do ngam haw tukma hi.

¹⁰ Ling le so a kang bangin kang khawng tuk uh ci.

¹¹ Nineveh khuapi aw, nangmu lakah misual pa khat, Topa dodaltu le thusia pawitu um hi.

¹² Topa in Israel mi nelah, “Assiria mi ngil zetin le tamzet haw tuk naven siatsuah tawkin, bo khawng haw tuk hi. Ka mihingte aw, nangmuh bawlsia zo toh ing a, bawlsialeh tukma toh ing.

¹³ A nemsuktu kolhak cu ek tuah tung a, kenciptu thik taicin cu satcat khawng tung,” ti hi.

¹⁴ Assiria ca in Topa thupiakmi cu hi tin hi, “Na min dawntu tukin casuan neileh tukma toh ci. Na pathian biakinn a milim le zukte cu vatkeh khawng tung. Na khanmual tuk cu atu-in bawlsak ham tung, nungca tukin tak ma toh ci” tin ti hi.

¹⁵ Mualhumah thuthangpha le lemdaihnak a henpihtu i ke khi zo ten un! A nehnak tuk thuthan hi! Judah mipite na bawl tukmi puai cu bawlin, na thutiammi cu kimtikin hi. Mipha ngawl ten nehleh haw tukma toh hi. Amuhte cu siatsuah khawngmi hi zo haw hi.