MIPUM SIALNAK 2 - Ngawm Bible

A Hinnam Tenin Um Haw

¹ Topa Pathian in Moses le Aaron lakah a nuailam bangin thupia hi.

² Israel miten a ngiahbuk a sah haw ten, kuakua hei in amu hinnam tenah le amu alan nuai tenah um haw hen. A ngiahbuk haw cu Topa i umnak Puanbuk elkimah sa haw tuk hi, tin ti hi.

^3-9 Nisuahnak lamah Judah i alan nuaiah a nuailam bangin a hotu tek tuah ahon, ahonin um haw hen. Judah hinnam pen Amminadab capa Nahshon i puimi, thawng sawm salih le thawng li le za luk haw hi. Issakhar hinnam pen Zuar capa Nethanel i pui mite cu thawng sawm nga le thawng li le za li haw hi. Zebulun hinnam pen Helon capa Eliab i pui mite cu thawng sawm nga le thawng salih le za li haw hi. A venghawngin thawng za khat le thawng sawm liat le thawng luk le za li haw hi. Judah alan nuai a, ummi cu masabelin hawh haw hen hi.

^10-16 Hanglam a, Reuben i alan nuaiah a nuailam bangin a mi puitu tek tuah ahon, ahonin um haw hen hi. Reuben hin pen Shedure capa Elizur puimi, thawng sawm li thawng luk le za nga haw hi. Simeon hinnam pen Zurishaddai capa Shelumiel puinakin, thawng sawm nga le thawng kua le za thum haw hi. Gad hinnam pen Deuel capa Eliasaf puinakin, thawng sawm li le thawng nga le za luk le sawm nga haw hi. A venghawng haw in thawng za khat le thawng sawm nga le thawng khat le za li le sawm nga haw hi. Reuben alan nuai a, ummi cu a pa nihnakin hawh haw hen hi.

¹⁷ a masa hon nih le a nung a, hon nih tei laklawhah Puanbuk a puatu Levi mite hawh haw tuk hi. Mahtin bangin ahon, ahonin, a hawhtu Israel mite cu amu alan nuaiah, a camnak haw a, umdan bang lengin a hawh haw tuk hi.

^18-24 Nitumnak lamah Efraim i alan nuaiah a nuailam bangin amuh puitu tek tuah ahon, ahonin um haw hen hi. Efraim hinnam pen Ammihud capa Elishama ho in, thawng sawm li le za nga haw hi. Manasseh hinnam pen Pedahzur capa Gamaliel ho in, thawng sawm thum le thawng nih le za nih haw hi. Benjamin hinnam pen Gideon i capa Abidan ho in, thawng sawm thum le thawng nga le za li haw hi. A venghawng haw in thawng za khat le thawng liat le za khat haw hi. Efraim alan nuai a ummi cu a pa thumnakin hawh haw tuk hi.

^25-31 Saklam pen Dan i alan nuaiah a nuai lam bangin amu puitu tek tuah ahon ahonin um haw hen hi: Dan hinnam pen Ammishaddai capa Ahiezer ho in, thawng sawm luk le thawng nih le za salih haw hi. Asher hinnam pen Okhran capa Pagiel ho in, thawng sawm li le thawng khat le za nga haw hi. Naftali hinnam pen Enan capa Ahira ho in, thawng sawm nga le thawng thum le za li haw hi. A venghawng haw in thawng za khat thawng sawm nga thawng sa lih le za luk haw hi. Dan i alan nuai umte cu nungdawlbelin hawh haw hen hi.

³² Ahon, ahonin pui mi Israel mite cu a venghawngin, thawng za luk le thawng thum le za nga le sawm nga haw hi.

³³ Mahnaven Moses lakah, Topa i thupiak bangin Israel tei lak pen Levi hin cu sialcih hi haw ma hi.

³⁴ Mah hangin Topa in Moses lakah thu a piakmi bangin Israel miten bawl khawng haw hi. A ngiah haw hei ten amu alan nuai tenah camin, a hawh haw hei ten amu hinnam tenin hawh haw hi.