MIPUM SIALNAK 1 - Ngawm Bible

Mipum Sialnak Masabel

¹ Israel mite Izipt ngam pen a tul nung haw kum nihnak, a ha nihnak ni masabel ni-in, Sinai Phillawn a, ummi Pathian umnak Puanbuk sungah Topa in, Moses lakah thu hilh hi.

² “Nangmah le Aaron in Israel mite cu a hinnam tek le a innkua tek haw in mipum na sial un hi.

³ Kum sawm nih le a humlam pano, ngalkap a dek thei tuk hempoh cu a min cazin la un.

⁴ A bawmtu tukin hinnam khat pen a puitu haw tek zawm un.”

⁵ Mah a puitute cu a nuailam bangin hi. Reuben hinnam pen Sledure capa Elizur.

⁶ Simeon hinnam sung pen Zurishaddai capa Shelumiel.

⁷ Judah hinnam sung pen Amminadab capa Nahshon.

⁸ Issakhar hinnam sung pen Zuar capa Nethanel.

⁹ Zebulun hinnam sung pen Helon capa Eliab.

¹⁰ Josef capate, Efraim hinnam sung pen Ammihud capa Elishama le Manasseh hinnam sung pen Pedahzur capa Gamaliel.

¹¹ Benjamin hinnam sung pen Gideon i capa Abidan.

¹² Dan hinnam sung pen Ammishaddai capa Ahiezer.

¹³ Asher hinnam sung pen Okran capa Pagiel.

¹⁴ Gad hinnam sung pen Deuel capa Eliasaf.

¹⁵ Naftali hinnam sung pen Enan capa Ahira haw hi.

¹⁶ Hite hi mipi sung pen a ten haw, amu hin tek pen Israel hinnam i puitute haw hi.

¹⁷ Moses le Aaron ten a hum a, puitu sawm le pa nih cu

¹⁸ ha nihnak, ni masabel ni-in, kum sawm nih humlam siah, a innkua a innkua le a hinnam tekin munkhatah hulawmin sam khawm hi.

¹⁹ Topa i thupiak bangin, Sinai Phillawnah mipi tei mipum cazin la khawng hi.

^20-46 Kum sawm nih hum siah pano hempoh cu a innkua, innkua le a hinnam tek haw in ngaldo tukin a hawh thei tuk cu Jakob i capa upabel Reuben casuan pepan mipum cazin cu a nuailam bangin la hi. Reuben hinnam pen thawng sawm li thawng luk le za nga. Simeon hinnam pen thawng sawm nga thawng kuah le za thum. Gad hinnam pen thawng sawm li le thawng nga le za luk le sawm nga. Judah hinnam pen thawng sawm salih thawng li le za luk. Issakhar hinnam pen thawng sawm nga le thawng li le za li. Zebulun hinnam pen thawng sawm nga le thawng salih le za li. Efraim hinnam pen thawng sawm li le za nga. Manasseh hinnam pen thawng sawm thum le thawng nih le za nih. Benjamin hinnam pen thawng sawm thum le thawng nga le za li. Dan hinnam pen thawng sawm luk le thawng nih le za salih. Asher hinnam pen thawng sawm li le thawng khat le za nga. Naftali hinnam pen thawng sawm nga le thawng thum le za li haw hi. Kum sawm nih hum siah Israel mipi a innkua, innkua le a hinnam tek sung haw pen ngaldo thei tuk pano a venghawngin thawng za luk, thawng thum le za nga le sawm nga kim haw hi.

⁴⁷ Levi mite cu mipum sialnakah hindang tuah sialcih haw ma hi.

⁴⁸ Itahim titale Topa in Moses lakah,

⁴⁹ “Israel mite ngaldo tukin mipum na sial ten Levi hinnam cu sialkha pahsun tih a hilh zo hangin hi.

⁵⁰ Mah a hih ten Levi mite cu Puanbuk le a sung a, ummi na kemtu in koihin hi. Amuh ten Puanbuk le a na hempoh pua in, dek haw tuk a, Puanbuk elkimah ngiahbuk sam pepel haw tuk hi.

⁵¹ Ngiahbuk na thawn uhten levi miten Puanbuk cu phe haw tuk a, a sakleh hun ten vang amuh lengin saleh haw tuk hi. Akua hei hihen mah Puanbuk elah a hung haw tale thah hi tuk hi.

⁵² Israel miten a hon ahonin ngiahbuk sa haw tuk a, amu hinnam tekin amu alan nuaiah sa haw tuk hi.

⁵³ Mahnaven Israel mihon tei humah ka thinuknak a hen ngawlnak tukin Levi miten Puanbuk sa haw tuk a, amuh bekin Puanbuk cingkem haw tuk hi.”

⁵⁴ Mah hangin Israel miten Topa i thupiak bangin bawl khawng haw hi.