MIKAH 7 - Ngawm Bible

Israel Tei Nungcang Phatngawlnak

¹ Poizet thong hi! Ngilkial zetin thingkung humah thingngah zei in, imah amu ngawltu le sabit kung humah sabit ngah zei in, a tawk ngawltu bang ing. Theipi ngah a ukzet le sabit ngah hempoh cu thawi khawng zo haw hi.

² Hi ngam sungah midik le Pathian muangtu pa khat hei um haw ma. Mithahnak hun tuk bek ngak haw hi. Pa khat le pa khat mualphodun tukin pangdun leng haw hi.

³ Thilpha ngawl bawlnak lamah muantakzet ngeh haw hi. Bawi upa le thukhentu ten nawhthuh ngen haw hi. Thil tithei papi ten a deihmi haw hilhin, mahten thilpha ngawl cu son ten duaduam haw hi.

⁴ Amuh tei nel a, miphabel le mikombelte cu a man nei ngawlmi hampa lak a, po kiak bang haw tuk hi. Profet mangin Pathian in, ngallinnak thu a hilh zo bangin a mihingte a dantatnak tuk hun cu heng tuk toh hi.

⁵ Na inn nelte hei muansan pahsun, na ngualcamte muang pahsun. Na zi lak a, na son tukmi vang cingcai in hi.

⁶ Mahtibang hunin, capa ten a pa haw cu misil bangin ngaisung haw tuk a, canu ten a nute langpang haw tuk hi. Mo ten a teknu haw tuah haudun haw tuk a, a kuakua hei in, a ngal cu amu innkua hi haw tuk hi.

⁷ Mahnaven kei cu Topa ngak tung; Keimah pantu Pathian cu ngak tung hi. Ka Pathian in keimah thei tuk hi.

Topa In Nunpatnak Hunpih

⁸ A ngal uhten oh humah ancim a tihnak haw tuk imah umma hi. Bah zo hung, mahnaven tholeh tuk hung. Khuathim sungah um hung, mahnaven Topa in khuavak pia tuk hi.

⁹ Topa i humah a sual zo uh hangin a thinuknak thuak tuk hung hi. Mahnaven a tawpnak ten amah in humhim tuk a, eimu hum a, thuman ngawl a bawltute cu diknak tuah khensakleh tuk hi. Vaknak sungah amah in tulpihleh tuk a, patnak cu muleh tuk hung hi.

¹⁰ a ngal uhten, “Na Topa Pathian uh ilai ah him?” tin nautat litu ten mu haw tuk a, zakca zetin um haw tuk hi. A ngal uhte sung haw tuk a, lamtuanin cinciak bangin tanpek a hih haw cu mu tuk hung hi.

¹¹ Jerusalem mipite, na khuapi uh saklehnak hun heng awn toh hi. Mah hun ten na ngam uh cu tam zetin zaltik sesem tung hi.

¹² Na mihingte khua hempoh pen na nelah pinleh haw tuk hi: nisuahnak lam Assiria ngam pen, hanglam Izipt ngam, lam khawlazet tuipi hum le mual sangpi mun pen pinleh haw tuk hi.

¹³ Mahnaven lei ngamte cu a umtu mihing tei sualnak le phatngawlnak hangin ngamkhingah suak tuk hi.

Topa In Israel Hehpih

¹⁴ Topa, na tenmi na mihingte hi tuu bangin cing in hi. A elkim haw a, ngamte cu ngamphazet hi haw in, amu umnak cu ngamkhing hi a, mahlai munah amuhte bek um haw hi. Ngam phatnak Bashan le Gillead ah hawhlehin ni dang laihin, a um haw bangin an khamin, umleh haw hen.

¹⁵ Topa aw, Izipt ngam pen na puitul laih a, na bawl bangin keimu ca in nalamdang bawlleh pohin hi.

¹⁶ Miphun dang ten mahmi cu amuh haw ten, izahta mi ngil ahi haw hei in, amthong haw tuk hi. Thasia in, a kamcip haw tuk a, a benghup haw tuk hi.

¹⁷ Leivul lakah ngul bang vakin, a ngalnannak mun haw pen cantawtokin taitul haw tuk hi. Launak tuah keimu Topa Pathian nelah kik haw tuk hi.

¹⁸ Topa aw, nangmah bang Pathian kuamah umma hi. A tang calam na mihingte cu a sualnak haw ngaidam ci. Kumkhua in, na thinuk ma ci; a khomi na itnak cu amu humah hengtik leleng ci.

¹⁹ Atu hei in, kohtei humah hehpihnak neileh tuk ci. Keimu sualnak cu na ke nuai ah tanpekin, tuipi taw lamah vawk sak tuk ci.

²⁰ Ni dang laih a, ka pu le pa tei lak a, na thutiamsa bangin Abraham casuan, na mihing Israel tei nelah muantak na hihnak le a khomi na itnak cu langtik leleng tuk ci.