MIKAH 5 - Ngawm Bible

¹ Jerusalem mite, na ngalkap uhte munkhatah khawm un! Ngal ten kil khawng zo haw hi; Israel puitu cu a biang pen thik ngolh tuah vat haw tuk hi.

Bethlehem Pen Pathian Thutiam Uktu

² Topa in, “Bethlehem Efrathat, nang cu Judah peng sung pen khua neubel pa khat hi navecin na sung pen Israel uktu suaktik tung hi. A pianpatnak cu tanglaih cawng pepan zo tin,” ti hi.

³ Topa in, ca neitu tuk nu in, capa a hin laih ngawl sung cu a ngal tei khut sungah a mihingte zamsan tuk hi. Mahceng ten a unau ngalmatnak mun a umtute tuah khawmdunleh haw tuk hi.

⁴ Amah a hun ten Topa i ngilnak le Topa Pathian i huham tuah a miphunte cu uk tuk hi. Leihum mi hempohin, a thawm ngengnak amuh haw hangin a mihingte cu himdam zetin um haw tuk a,

⁵ lemdaihnak henpih tuk hi. Assiria miten a ngam uh do in, a ngalpannak mun uh a hen haw ten amuhte do tukin a puitu uh sung pen mi ngilbelte hah tuk hung.

Patsuahnak le Dantatnak

⁶ A hiamnam haw tuah Assiria ngam Nimrod i ngam cu do in, neh haw tuk hi. Assiria ten a ngam uh a do haw ten amuh ten pan haw tuk hi.

⁷ Israel mi a tangcalam cu miphun tampi ca in Topa i khiaksukmi daita bang hi haw tuk hi; thingkung dawnno ca in nguah masabel bang hi haw tuk hi. Mihing muang ngawlin Pathian bek muang haw tuk hi.

⁸ Israel mi khenkhat cu miphun tampi lakah tang haw tuk a, tupi sung le ngan tatnak phul lakah an zei in, a vak limi kiosa bang haw tuk hi. Kiosa cu tuu hon lakah tum a, manin, botkek khawng hi. Patsuah theihnak tuk umma.

⁹ Mahti bangin Israel miten a ngalte cu nehin, siatsuah khawng tuk hi.

¹⁰ Topa in, “Mah ni ten na cipuh uhte laksak tung a, na cipuh leng uhte siatsuah khawng tung.

¹¹ Na khuapi uhte siatsuah khawng tung a, na ngalpannak uh kulhtiante sukaih khawng tung hi.

¹² Na mitzial thiamte vawk khawng tung a, na mipol uhte vang pa khat hei khawih tuk mang hi.

¹³ Na milim uh le na biak lih uhmi suangphutte siatsuah khawng tung. Nangmuh bawlcawmmi cu ituk mahten bia toh pahsuh un.

¹⁴ Na ngamsung a, Asherah milimte le na khua uhte cu siatsuah khawng tung.

¹⁵ Ka thu a zui ngawltu miphun hempoh cu ka thinukin, a hum hawah phuba la tung hi.”