MIKAH 4 - Ngawm Bible

Topa In Lemdaihnak Tuah Uk

¹ Mailam hun ten Topa i Biakinn dinnak mual cu mual hempoh lak pen a sangbel tuk hi.

² A miphun ten, “Topa i mualhum Israel tei Pathian i Biakinn ah hawh ten nung. Dehtik a nuammi cu cung tuk hung a, ama ca a tensami lampi ah hawh tuk hung,” tin ti haw tuk hi. Topa i thuzilhnak cu Jerusalem pen hungin, Zion pen a mihing tei nelah hilh hi.

³ Amah cu a khua la le a nai miphun thawmngengzet tei lak pen thukhen tuk hi. A ngalnam haw cu lobunnak tumanin seek haw tuk a, a ceipi haw cu thingkang talhnak namin bawl haw tuk hi. Miphun pa khat le pa khat dodunleh haw tukma toh hi. Ngal dodun dan hei cung haw tukma toh hi.

⁴ A kuakua hei in hihen lungmuang zetin um haw tuk hi, a sabit huan haw le a theipi kung haw lakah kuamah in thinsutik haw tukma toh hi. A sangbel Topa in hilh hi.

⁵ Miphun hempohin amu pathian bia in, a thuzui tek haw; Mahnaven kohin Topa ka Pathian uh bia in, kumkhua in, a thu zui tuk ung.

Ngalmatnak Pen Israel Kikleh Tuk

⁶ Topa in, “Ka bawlsia mite cu munkhatah ka khop khawmnak hun le ngalmatnak mun pen nuncim a thuaktute ka sam khawmnak hun cu heng tuk ti hi.

⁷ Ke bai haw a, inn pen ngam khawlapi ah um haw hi. Mahnaven a thakin dinpihleh tung a, miphun ngengpi in cang haw tuk hi. Zion mual pen mah hun pepanin, a kumkhua tiang keimah in uk tung,” ti hi.

⁸ Nang, Jerusalem, Pathian in tuucing bangin a mihingte a cinkhawinak mun, nangmah cu na ukmi ngamsung pen khuapibelah cangleh tuk ci.

⁹ Ita ngingzet kap li nge cim? Numei nauhing tuk bangin na thuak lih? Kumpi na neih ngawl toh hang maw? Thu kuppihtu na neih ngawl toh hang maw?

¹⁰ Zion canute, nauhing kuan bangin cantawtokin tau li un. Itahim titale hi khuapi pen tulin, hampa lakah um tuk uh ci a, Babilon ah na hawh uh kul tuk hi. Mahnaven mahlai mun pen a patsuahmi hi tuk uh ci a, Topa in, na ngal tei khut sung pepan tuk hi.

¹¹ Miphun tampi ten nangmah do tukin tang khawm haw hi. Amuh ten, “Jerusalem cu siatsuah khawng haw tuk hi. Buaksehin, cang khawng tahen,” tin ti haw hi.

¹² Mahnaven hi mipi ten Topa i lungmu sungah i um him tih thei haw ma hi. Cang cu cil tukin a koih khawm haw bangin Topa in, a muhte dantat tukin a khon khawm khawng lam thei haw ma hi.

¹³ Topa in, “Jerusalem mite, hawh unna, na ngal uhte cu dantat un. Thik ki le daal ketin neimi khuicang bangin na tha uh ngiltik tung. Mi tampi cu ngawizan tuk ci a, thi nai suakin, a ngah haw mi hauhnakte cu lei buppi i Topa keima nelah pia tuk uh ci,” ti hi.