MIKAH 1 - Ngawm Bible

¹ Jotham, Ahaz le Hezekiah ten Judah kumpi a deh sung haw in, Moresheth khua mi Mikah nelah Topa i awn heng hi. Samaria le Jerusalem tei thu la tuah pehdunin Topa in Mikah nelah phuang hi.

² Ngai hem un, leihum miphun hempoh ten thei un! Cungnungbel Topa in nangmuh siat hi. Ngai un! Vancung a biakinn sung pen thu hilh.

³ Topa cu a mun thiangtho pen tolhsuk tuk hi. Muallekte siksuk thahin tolh tuk hi.

⁴ Mualte cu meipi sung a, khuainun bangin zung haw tuk hi. Munlawnte hei pokkeh haw tuk a, mualhum pen tui a luang bangin, hawkluam sungah luang haw tuk hi.

⁵ Hih thute cu kim tuk hi. Itahim titale Israel miphunte cu sualin, Pathian a langpang haw hang hi. Israel sualnak hi akua nawn tuk hung him? A khuapibel haw Samaria nawt hi tuk hi. Judah ngam sungah milim biaknak um a hih ten kua sual nawn tuk hung him? Amah Jerusalem hi toh hi.

⁶ Mah hangin Topa in, “Samaria cu phul lak a, buak vawknak le sabit kung cinnak munah cangtik tung. Khuapi kulhtiante cu hawkluam sungah caksuktik khawng tung a, khua tawphah suangphumte cu langtik khawng tung hi.

⁷ A tha ngaihzet haw mi milimte cu vatkeh khawng tung a, biakinn ah numei pha ngawl a piak haw mi na hempoh cu mei ah haltum khawng tung hi. A milim haw cu buaksehin cang khawng haw tuk hi. Samaria in, hi thil sualte hi numei pha ngawl a dehman tuah ngah naven atu-in, a ngal ten mahte cu numei pha ngawl dehmanin pia kikleh haw tuk,” ti hi.

⁸ Mikah in, “Hiti bang a hih hangin kei cu kapin tau tung hi. Ka khawngaih theihtiknakin, ka ke thacang le pumpi thacangin vak kawkawi tung hi. Cingne bangin ham tung a, kalauk vano bangin ham tung hi.

⁹ Samaria i meima cu damtikleh theih ma toh hi; Judah vang mahti bang bok kekin thuak tuk hi. Siatsuahnak cu ka mihing tei umnak Jerusalem i kongka ah heng zo,” ti hi.

Ngal Ten Jerusalem Zuan Haw

¹⁰ Ngal a sundan uh hi, Gath khua a, na ngal uhte hilh pahsuh un, a kah lih uh hi mu haw pahsuh hen. Beth Leaphrah khua mite, na thasiat uh cu leivulah bualin, langtik un.

¹¹ Shafir khua mite, thacang le zahcakhuai zetin salah hawh un. Zaanan khua umte cu a khua haw pen vaktul ngam haw ma hi. Betherel khua mite a thasiatnak na theih uhten mahlai munah belhnak umma hi tih thei un.

¹² Topa in haksatnak cu Jerusalem khua el tiang a hentik zo hangin Maroth khua mite cu bopnak ngah tukin ngakhelzet haw hi.

¹³ Noh Lakhish a umte na cipuhte cu a leng tuah kencih un. Noh ten Israel i sualnak cu cungin Jerusalem sualtik uh ci.

¹⁴ Judah miphunte Moresheth Gath khua cu mangpha tin zamsan un. Akzib khua in Israel kumpi tei nelah bopnak imah pia thei ma hi.

¹⁵ Mereshah miphunte, na ngal uhten na khua uh la haw tuk a, Topa in, na ngal tei khut sungah nangmah pia tuk hi. Israel puitute hawhin, Adullam suanghol sungah ngelh haw tuk hi.

¹⁶ Judah miphunte, na cano uhte na ngaih uh hangin thasia in, na sam uh met un. Itahim titale na cate uh cu salah kai in, ngamdangah a hawhpih haw tuk hangin na lu uh cu langta lu bangin metkolh khawng un.