MATTHAI 5 - Ngawm Bible

Mualhum Thuzilhnak ( )

¹ Jesuh in, mi tampi amuh ten mual humah kaito in, khungsuk a, a nungzuitute a elah hung haw hi.

² Mahten thuzilh pan hi.

Thupha Muicu Ngahte

³ “Hawvang lamah thanem ung tih a theitute cu, thupha muicu ngahte haw hi. Itahim titale vancung Uknak cu amu sungah um hi.

⁴ Khawngai in, a tau lite cu thupha muicu ngahte haw hi. Itahim titale Pathian in hehnem tuk hi.

⁵ Mi niamkhiatte cu thupha muicu ngahte haw hi. Itahim titale Pathian i tepsa leihum lo le lam co haw tuk hi.

⁶ Pathian deihnak bawl tukin ngilkial dangdum bangin, a dum a kialte cu thupha muicu ngahte haw hi. Itahim titale Pathian i lungkimnak ngah khawng haw tuk hi.

⁷ Mi hehpih theite cu thupha muicu ngahte haw hi. Itahim titale Pathian i hehpihnak co bok haw tuk hi.

⁸ Lungmu thiangte cu thupha muicu ngahte haw hi. Itahim titale Pathian mu haw tuk hi.

⁹ Lemdaihnak a bawltute cu, thupha muicu ngahte haw hi. Itahim titale Pathian i cate tin sam co haw tuk hi.

¹⁰ Pathian deihnak bawl hangin bawlsiatnak a thuaktute cu thupha muicu ngahte haw hi. Itahim titale vancung ngam cu amuta hi.

¹¹ “Keima nungzui na hih uh hangin miten zawnsakin, bawlsiatnak le a phunkimin sual a nawn haw tale thupha muicu ngahmi hi uh ci.”

¹² Na thuakman uh cu nohtei ca tukin vancungah laksawng ngengpi koihsa in um, a hih hangin lungdam thatui in, um un. Nangmu laihngawl a profette vang cu mahti bang bokin bawlsiatnak thuak zo haw toh hi.

Ci le Khuavak

¹³ “Note cu hi leihum i ci hi uh ci. Mahnaven ci cu a alnak a bo tale, al lehtik theih ma toh hi. Nemcuamnak a neih ngawl toh hangin vawk tuk le sihpek tuk bek hi toh hi.

¹⁴ “Nohte cu hi leihum i khuavak hi uh ci. Mualhum a ummi khua cu sel theih ma hi.

¹⁵ Mei inn a vak ceng ten kuamah in kho khuh awng haw ma hi. Meivak koihnak mun a sannakah vak haw a, innsung a ummi hempoh tei ca in vak khawng hi.

¹⁶ Mahtibang bokin na vaknak uh cu mitei mai ah vaktik saw unna, thilpha na bawl uhmi amuh haw ten van a ummi na Pa uh thangphat haw tuk hi.

Daan Thuzilhnak

¹⁷ “Moses Daan le profet tei thuzilhmite siatsuah tukin hung hi,” tin ngaisung pahsuh un. Mahte siatsuah tukin hung hi ngawlin a hilh haw mi kimtik tukin hung hi saw ing.

¹⁸ Thungai in hilh ing, lei le van a umsung hempoh cu Daan sung a, a neubel hei pai tuk ma hi, ihempoh a kimkhawng laih ngawl sung cu pa khatno hei pai thong tukma hi.

¹⁹ Mah hangin kuakua hei hihen thukham sung a thupi ngawlbel pa khatno hei zui ngawlin le midangte vang zui tuk ngawlin a zilhtu ahi tale amah cu vancung ngamah a nautabel hi tuk hi. Mahnaven Daante zui in, midangte vang zuibok tukin a zilh tale amah cu vancung ngamah a ngengbel hi tuk hi.

²⁰ Thungai in hilh ing, na dikcangnak uh cu Daan zilhtute le Farasi mite sangin na pha saw uh ma tale vancung ngamah tum thei tukma uh ci.

Thinuknak Thuzilhnak

²¹ “Ni dang laihin, ‘Mithat pahsun, mi a thattu cu thukhennak thuak tuk hi,’ tin, a tih haw cu thei zo uh ci.

²² Mahnaven kei in, a unau humah a thu um ngawl pi in, a thinuktu cu thukhennak thuak tuk hi; a kuakua hei hi tahen a unau imah simsial ngawltu cu thukhentu mai ah hawhpih hi tuk a, a unau cu ‘Imah nei cuamnak nei ngawl!’ tin tamsia in, a titu cu hellah heng tuk tih lauhuai hi.

²³ Mah hangin biaklandawhah zehsa Pathian nelah na piak tuk uhten na unau pa kha khat na humah thinuknak nei tih na thei tale,

²⁴ biaklandawh mai ah na zehsa cu koih hih inna, manlang zetin, na unau pa i lakah hawhin, lemdaihnak bawl tukin hawhleh inna, na zehsa cu Pathian nelah pia in hi.

²⁵ “Mi pa kha khatin, sual thukhen tukin zungah a hawhpih tale, zung na hen uh laihngawl, hun a umlaih khin, amah tuah lemdaihnak bawlin hi. Zungah a henpih nungten thukhentu pa in palik lakah hen leleu in, thawngah khiak hi tuk ci.

²⁶ Ciangkohin hilh ing, a cawhnak haw tangka na kuan khawng laklawh thawng sungah um tuk ci.

Nupa Sualnak Thuzilhnak

²⁷ “Nupa sualnak bawl pahsuh un, tin, a tihmek hawza zo uh hi.

²⁸ Mahnaven kei in: hazawlnak mit tuah numei a zotu cu a lungmu in, mah nu tuah sual zo, tin hilh ing.

²⁹ Mah hangin na mit taklamin, a sualtik tale khek inna, vawkin hi. Na pumpi venghawngin hellah na cak tuk sangin, na taksa khen pa kha khat na sun cu nangma ca in pha saw hi.

³⁰ Na khut taklamin, a sualtik tale talh inna, vawkin hi. Na pumpi venghawngin hellah na hen tuk sangin na khut ke pa kha khat na talh cu nangma ca in pha saw hi.

Zi Maaknak Thuzilhnak

³¹ “Kua hei hi tahen, a zi a ma tale maaknak lai ken hen, tihmi za zo toh uh ci.

³² Mahnaven kei in, mi pa khatin, a zi cu pano dang tuah a sualnak haw thu sial ngawl, ama tale, a zi cu pasal a neih ten nupa sualnak bawltu cangtik hi. Mah hangin mahpa cu misual hi. Mah a maakmi a puitu pa vang cu nupa sualnak bawltu ah cangtik bok hi.

Thutiamnak Thuzilhnak

³³ “Ni dang laihin, ‘Na thutep uhmi pelhtik pahsuh un, Topa i lakah thu na tep uhmi cu deksuak un,’ a tih lih haw cu za zo toh uh ci.

³⁴ Mahnaven kei in, hi bangin hilh ing, thutepnak na bawl uh tale ituk mahten awn sia mang pahsuh un hi. Vancung min salin thutiam bawl pahsuh un. Itahim titale Pathian i khunnak hi.

³⁵ Leipi min sal hei in thutiam bawl pahsuh un, Itahim titale Pathian ke ngaknak hi. Jerusalem min sal hei in thutiam bawl pahsuh un. Itahim titale kumpi minthang tei umnak khuapi hi.

³⁶ Na lu uh sal hei in thutiam bawl pahsuh un. Itahim titale na luhum uh a samzang khatno hei hangtik thei ma uh ci, a ngo hei ngotik thei ma uh ci.

³⁷ Mah hi; mahma, tih bek ti un; mah sial ngawl cu mipha ngawl, khawhuai lak pen a tulmi haw hi.

Phu Lak Thuzilhnak

³⁸ “Mit ai-in mit, ha ai-in ha, tin, a tihmi haw cu za zo toh uh ci.

³⁹ Mahnaven kei in hi bangin hilh ing. A bawlsiatu pa i humah phuba la pahsuh un; mi pa kha khatin, na taklam bek a beng tale na veilam bek vang dawh bet vanglakin hi.

⁴⁰ Mahten pa kha khatin, na angki sungta laksak nuamin, thukhennak zung tianah a hen tale na angki humta tianin, pia vanglakin hi.

⁴¹ Nangmah uktu ngalkap pa kha khatin, a van puaksak tukin peng khat bang a cial tale peng nih tian puaksakin hi.

⁴² Mi pa kha khatin, thil pa kha khat a ngen tale pia in; na thil leicawi nuam tei lakah leicawitikin hi.

Ngalte Itnak

⁴³ “Na ngualcam it inna, na ngalte hua in,” tih cu za zo toh uh ci.

⁴⁴ Mahnaven kei in, hi bangin hilh ing, na ngalte it inna, a bawlsiatu tei ca in thunget sak un.

⁴⁵ Mahten vancung a um na Pa uh i cate hi tuk uh ci. Itahim titale Pathian in mipha le pha ngawl humah a bangtenno ni suaktikin, thilpha a bawltu le thilsia a bawltu tei humah bangtenno in nguahzutik hi.

⁴⁶ Nangmuh ittute bek na it uh tale i laksawng kaw na ngah tuk uh! Siahkhontu hei in mahtih bang cu bawlbok haw hi.

⁴⁷ Na ngualcam pha bek na otpih uh tale a valin, na bawl uhmi i um cuang kaw? Pathian bia ngawlte hei in mahtih bang cu bawlbok haw hi.

⁴⁸ Vancung a na Pa uh a cangkim bangin cangkim bok un hi.