MATTHAI 1 - Ngawm Bible

Jesuh Khrih i Puzung

¹ Abraham le David casuan Jesuh Khrih i puzung tangthu cu hi bangin hi.

² Abraham i ca Isaak, Isaak i ca Jakob, Jakob i ca Judah le a suahpih unau panote haw hi.

³ Judah i ca Perez le Zerah (a nu haw Tamar hi), Perez i ca Hezron, Hezron i ca Ram hi.

⁴ Ram i ca Amminadab, Amminadab i ca Nahshon, Nahshon i ca Salmon,

⁵ Salmon i ca Boaz (a nu cu Rahab hi), Boaz i ca Obed (a nu Ruth hi), Obed i ca cu Jesse hi. Jesse i ca cu David Kumpipa hi.

⁶ David khan pen Israel mite Babilon ngamah sal a tan haw tian a pu le pate cu a nuailam bangin hi. David i ca Solomon (a nu cu Uriah zi hi),

⁷ Solomon i ca Rehoboam, Rehoboam i ca Abijah, Abijah i ca Asa,

⁸ Asa i ca Jehoshafat, Jehoshafat i ca Joram, Joram i ca Uzziah,

⁹ Uzziah i ca Jotham, Jotham i ca Ahaz, Ahaz i ca Hezekiah,

¹⁰ Hezekiah i ca Manasseh, Manasseh i ca Amon, Amon i ca Josiah hi.

¹¹ Josiah i ca Jeconiah le a unaupihte hi.

¹² Babilon saltannak pen Jesuh hin tian a pu le pate cu a nuailam bangin hi. Jeconiah i ca Shealtial, Shealtial i ca Zerubbabel,

¹³ Zerubbabel i ca Abiud, Abiud i ca Eliakim, Eliakim i ca Azor,

¹⁴ Azor i ca Zadok, Zadok i ca Akhim, Akhim i ca Eliud,

¹⁵ Eliud i ca Eleazar, Eleazar i ca Matthan, Matthan i ca Jakob,

¹⁶ Jakob i ca Jesuh hingtu Mary i pasal Josef hi.

¹⁷ Mah hangin Abraham khan pen David khan tian, khang sawm le khang li hi. David khan pen Babilon tei sal a tan haw tian khang sawm le khang li, Babilon tei sal a tan haw pepan Khrih i hin tian khang sawm le khang li hi.

Jesuh Khrih Hinnak

¹⁸ Jesuh Khrih i hinnak cu hi bangin hi. A nu Mary cu Josef in hamin, a huaidun haw deuh laih ngawlin Hawvang Thiangtho ca nei tung tih thei hi.

¹⁹ Josef cu midik le mipha a hih ten Mary i zahcak tuk deih ngawlin kuamah i theih ngawlno in zamsan tukin ngaisung hi.

²⁰ Mahnaven hi bangin a ngaihsut laihtakin, Topa i vancungmi pa khat cu a mangah langin hitih hin hilh hi. “David casuan Josef aw, Mary sung a ummi nau cu Hawvang Thiangtho i neihtikmi a hih hangin zi tukin lau pahsun.

²¹ Amah in capa hing tuk a, a min Jesuh tin sa tuk ci, itahim titale a miphun tei sualnak pen a nun haw pan tuk hi,” tin ti hi.

²² Topa in profet hum tawnin, a hilh hamsa bangin a kim theihnak tukin na hi. Mah thute cu;

²³ “Khanglai himin ca pai tuk a, capa hing tuk hi, a min cu Immanuel tin sam haw tuk hi,” tin a hilhsami a kimnak tukin hi bangin a piangmi hi. Immanuel tihmi cu, “Pathian eimu lakah um,” tihnak hi.

²⁴ Josef cu a khatlawh ten Topa i vancungmi tei hilhnak bangin Mary cu huai hi.

²⁵ Mahnaven capa a hin tian zaupih ma hi. Capa hingin, a min cu Jesuh ti in sa haw hi.