MANGMUHNAK 5 - Ngawm Bible

Laizial le Tuuno

¹ Kumpi khunnak humah a khungmi in, a taklam khutah laizial pa khat a cawi khi mu ing. Mah laizial cu a sunglam le a pawlamin ngatmi hi a, tacik salih tuah khetmi hi.

² Mahten a ngil zetmi vancungmi pa khat ka muhmi in, aw ngingzet tuah “A kuakaw tacik khetmi duukin, hi laizialpi hong ngamtu tuk?” tin au hi.

³ Mahnaven laizialpi hongin, a sung a zo theitu vancungah hei hihen, leihumah hei hihen, leinuai ah hei hihen kuamah umma hi.

⁴ Mahtin laizialpi hongtu tuk a takmi kuamah um haw ma tih ka muhten nase zetin kap ing.

⁵ Mahten upa pa khatin, “Kap pahsun; zo inna! Judah hin sung pen a hungmi Kiosa tin sammi, David i casuan mi sunglawi tin sammi cu nehtu hi zo a, tacik salih cu botkekin laizialpi cu hong tuk,” ti hi.

⁶ Tuuno pa khat cu kumpi khunnak laizangah dingin sahang pa li le upa ten a kawnin, kiilin mu ing. Tuuno cu thahsa a thi mi bang hi. Ki salih le mit salih nei hi, mahmi mit salih cu leihum khua hempoh ah hahmi Pathian i hawvang salihte hi haw hi.

⁷ Tuuno cu hawhin, kumpi khunnak humah a khungtu pa i taklam khutah laizialpi cu la hi.

⁸ Mahtin a lak ceng bek ten Tuuno mai ah sahang pa li le upa sawm nih le pa lite cu kunin, bok haw hi. Tingtang pa khat le pak namtui tuah a dimmi sui pakan kuang pa khat tek cawi haw hi; mah pak namtui cu Pathian mihing tei thungetnak hi.

⁹ La thak hi tin sa haw hi. “Nangmah cu laizial latu tukin le tacik duktu tukin tak ci. Itahim titale thahnak thuak zo ci a, na thihnak thawmin phun le nam hempoh le awn namkim ten za in, mi tampi Pathian nelah henpih ci.

¹⁰ Ka Pathian uh i nadektu tukin thiampi, kumpi hin le namah, amuh cu bawl zo ci, amuh ten leihumah uk haw tuk hi,” tin sa haw hi.

¹¹ Ka zohleh ten vancungmi a thawng a za tei thawm za ing. Amuhte cu kumpi khunnak le sahang pa li le upa tei kimkotah ding haw in,

¹² nging zetin hi bangin lasa haw hi. “Thahnak a thuak tuuno cu huham, hauhsaknak, ngilnak, minthannak, sunloih pahcoihnak le thangphatnak ngah tak hi.”

¹³ Mahten vanhumah hei hihen, leihum le leinuai ah hei hihen, tuipi sung ummi hei hihen, lei le vanhaang nuai a um nunnak nei hempoh tei lasak aw hi tin za ing. “Kumpi khunnak hum a khungtu Tuuno lakah thangphatnak le upatnak, pahcoihnak le ngilnak cu a kumkhua in um tahen.”

¹⁴ Sahang pa li ten, “Amen,” tin, a don celh haw ten upa ten lu kunin, Pathian bia haw hi.