MANGMUHNAK 20 - Ngawm Bible

Kum Thawng Khat

¹ Mahten vancung pen vancungmi pa khat tolhin, a khutah taw nei ngawl khukpi honnak tawhcang le a ngit zetmi thik taicin khau cawi mu ing.

² Mah vancungmi in tanglaih a ngulpi, Dawi mangpa a himata Satan cu manin, thik taicin khau tuah khih a, taw nei ngawl khukpi sungah kum thawng khat sung khia hi.

³ Kum thawng khat a kim laklawh kuamah zol toh pahsuh hen tin mah khuk sungah tawhkalhin tacik khen cih hi. Samkhat sung hahleh hi tuk laih hi.

⁴ Kumpi khunnakte le a hum a khungtu, thukhen theihnak a hum haw a piakmite mu ing. Jesuh i phuanmi thutak le Pathian thu a phuan haw hang thah thuaktu tei hawvang mu ing. Mah mite in sahang bia haw ma hi; a milim vang bia haw ma hi. Sahang melciknak cu a baan hawah hei hihen, a cal hawah hei hihen nei haw ma hi. Nungleh haw in, kumpi bawi bangin Khrih tuah kum thawng khat sung uk haw hi.

⁵ (Adang mithi cu kum thawng khat a kim laklawh thokik haw ma hi). Hi mi hi, thihnak pen thawhkiknak amasabel hi.

⁶ Hi bangin mithi thawhkiknak masabelin, a teltu cu mi lungdam le thupha co mite haw hi. Vei nih thihnakin, a hum hawah thu neileh ma toh hi. Pathian le Khrih tei thiampi dekin amuhte tuah kum thawng khat sung uk haw tuk hi.

Satan In Lel

⁷ Kum thawng khat nungten Satan cu a thawngtaknak pen suah hi tuk a,

⁸ leihum hempoh ah lengkekin, a ummi minamte zol tukin hawh tuk hi; Mah minamte cu Gog le Magog tihmi haw hi. Ngaldo tukin Satan in munkhatah khawmkhawm tuk a, tuipi el a philnel zah haw tuk hi.

⁹ Leihum hempoh ah dimin, Pathian mihing tei umnak mun le a deih zetmi khuapi cu kilcih haw hi. Mahnaven van pen mei alh caksukin, kang hum khawng hi.

¹⁰ Mahten amuhte zoltu Satan cu sahang le profet manngawl a vawknak haw tuiting bangin a tingmi meipi le kaat mei sungah vawk haw hi. Mahlai ah sun le zan haksa le bawlsia in um cimit haw tuk hi.

Thukhennak Dawlbel

¹¹ Mahten a ngengpi kumpi khunnak ngo le a hum a khungtu mu ing. Lei le van ten kumpi khunnak hum khungtu i umnak pen taisan khawng haw in, amuhte cu mah munah umleh haw ma toh hi.

¹² Mahceng ten a thi sate a neu a ngengin, kumpi khunnak mai ah a din haw mu ing. Laibu kau haw in; mahceng ten a dang laibu pa khat, nunnak laibu tihmi kau lehleu haw hi. Mithi sate cu mah laibu sungah khum sa mi a nadehnak haw bangin a thu haw khenin um hi.

¹³ Mahten tuipi in, a sung a ummi, mithite suahtul hi. Thihnak le mithi khuate vangin a khahcih haw mi mithite suah bok haw hi. A venghawng haw a nadehnak haw bangin a thu haw khenin um hi.

¹⁴ Mahten Thihnak le Mithi khua cu tuiting bangin a tingmi meipi sungah khiaksuk hi haw hi. (Mah tuiting bangmi meipi cu vei nih thihnak khi hi).

¹⁵ Akua hei hihen nunnak laibu sung a, min ngan ahi ngawl hempoh cu tuiting bangmi meipi sungah vawk na hi haw hi.