MANGMUHNAK 15 - Ngawm Bible

Vancungmi le Bawlsiatnak Dawlbel

¹ Mahten vanah a dang a lamdangzet muhnak ngengsih, dangsa sihmi mu lehleu ing. Vancungmi salih ten a lauhuai bawlsiatnak natsia nam salih hunpih haw; mah natsia cu dawlbel bawlsiatnak hi. Itahim titale Pathian thinuknak dawlbel a langnak hi.

² Mahten ka zo le mei alh tuah a tok helmi thalang tuipi mu ing. Mahbek sial ngawlin sahang le a zuk hihen, a min haw nambat tuah sialsiah mipa i humah a nehtute vang mu ing. Mah nehnak neitute cu thalang tuipi bulah dingin Pathian piakmi tingtang cawi haw hi.

³ Pathian i nadektu Moses le Tuuno i la hi tin sa haw hi. “Topa, Cungnungbel Pathian, na thil bawlmi hi izahta in thasiah huai kaw! Minam hempoh tei kumpi bawi, na lampi cu izahin, a dik le a manmi hi haw him?

⁴ Topa nangmah kihca ngawltu kua heng a um tuk? Na thawmngeng dan phuang tuk a, eltu akua um tuk him? Nangmah bek a thiangthomi hi ci. Minam hempoh na lakah hungin bia haw tuk hi. Itahim titale a dikmi na thil bawlmi cu mi hempohin mu zo haw hi,” tin sa haw hi.

⁵ Mahceng ten vancungah biakinn honmi mu ing a, Pathian umnak puanbuk thiangtho vang mu ing.

⁶ A lauhuai zetmi bawlsiatnak salih hunpihtu vancungmi salih cu mah biakinn sung pen tul haw hi; mahte cu puan ngo silhin, sui awm kilhnak tuah a awm haw cu kilh haw hi.

⁷ Mahten nganhing pa li lak pen pa khatin, kumkhua pen kumkhua tian a nungmi Pathian i thinuknak tuah a dimmi sui khuathai salih cu vancungmi salih tei lakah pia hi.

⁸ Mah Biakinn cu Pathian huham le sunloihnak meikhu tuah dimin, vancungmi salih tei hunpihmi a lauhuai bawlsiatnak salihte bo ciang khawng laih ngawl sung cu kuamah in biakinn sungah tum thei haw ma hi.