MANGMUHNAK 12 - Ngawm Bible

Numei Nu le Ngulpi

¹ Mahten van pen thasiahhuai ngangai mi muhnak pa khat lang hi. Numei pa khat na umin, a vansilhmi cu ni hi a; hade khi a ke nuai ah koihin, aksi sawm le pa nih tuah bawlmi kumpi lukhu cu a lu ah khu hi.

² Mah nu cu nauhing kuan na hi a, naukei natin tauli hi.

³ Mahten vanah a dang muhnak pa khat lang lehleu hi. Ngulpi san ngengzet, lu salih le ki sawm khat neimi lang hi. A lu pa khat humah kumpi lukhu pa khat tek khu hi.

⁴ A mei tuah aksi khen thum khenkhat lei ah vatkulh khawng hi. Numei nu i mai ah dingin nau a hin bek ten eih sak tukin ngak leng hi.

⁵ Mahten numei nu in miphun hempoh thikngolh tuah a uktu tuk capa hing hi. Mahnaven nauno cu la in, Pathian le a kumpi khunnak lamah taipih haw hi.

⁶ Numei nu cu Pathian in mun a bawlsaksa mi hampa lakah ni thawng khat le za nih le sawm luk sung phano a tuamlawm haw tukin tai hi.

⁷ Mahten vanah ngaldonak um hi. Mikhael le vancungmi ten ngulpi cu do haw hi; ngulpi le a vancungmite vangin do bok haw hi.

⁸ Mahnaven ngulpi cu a sun hangin a vancungmite tuah vancungah um thei haw ma toh hi.

⁹ Ngulpi ngengpi, tanglaih ngulpi, Dawi ahimata Satan tin sammi, lei buppi zoltu cu van pen vawksukin um zo a, a vancungmite vang amah tuah um haw hi.

¹⁰ Mahten vancung pen aw nging zetin hitin aumi za ing hi, “Pathian i nunpatnak cu heng zo hi. Pathian in kumpi bawi a hihnak huham langtik zo hi. Khrih in, a thuneihnak langtik zo hi. Itahim titale Pathian mai ah dingin sun le zanin, a unaupih uhte sualnawntu cu vancung pen vawk hi zo hi.

¹¹ A unaupih uhten Tuuno thisan le thudik a phuan haw mi i thawmin, nehnak ngah zo haw hi. A nunnak haw vang piak phal haw a, thih vang ngam haw hi.

¹² Mah hangin van le a sung a um hempoh ten na lung uh dam un. Mahnaven lei le tuipi ca in izah lauhuai him! Itahim titale khawhuai cu nohtei lakah hengsuk zo in, hun tam a neih ngawllam a theih hangin a thinuk mahtak hi.”

¹³ Ngulpi in leihumah khiaksuk tawk ing tih a theihbek ten capa hingtu numei nu khi hil paih hi.

¹⁴ Mahnaven numei nu cu ama ca in mun bawlsa hampa lakah a len theihnak tukin muvanlai ngengzet i ha pa nih pia haw hi. Mahlai munah kum thum le alang sung ngulpi i siatsuah theih tuk ngawlin cingkhawi haw tuk hi.

¹⁵ Mahten numei nu cu tui in tai hen tin ngulpi in, a kam pen tui tultik hi.

¹⁶ Mahnaven numei nu bawm tukin leipi in, a kam kau in, ngulpi kam pen a tulmi tui cu thon khawng hi.

¹⁷ Ngulpi cu numei nu i humah a thinuk leita in, numei i casuante, Pathian thukham zuitu le Jesuh i phuanmi thutak muangkhotute langpang tukin tul lehleu hi.

¹⁸ Mahten ngulpi cu tuipi mawkah ding hi.