MANGMUHNAK 11 - Ngawm Bible

Theihpihtu Pa Nih

¹ Thil tehnak phaikung bang pa khat ka lakah pia in, hitin hilh haw hi, “Hawh inna, Pathian biakinn le biaklandawh khi tehin hi: mahten biakinn sung a Pathian a biatute khi sialin hi.

² Mahnaven biakinn tual cu teh pahsun, itahim titale Gentail tei lakah piak hi zo a, amuh ten ha sawm li le ha nih sung khuapi thiang cu cilpekin siatsuah khawng haw tuk hi.

³ A theihpihtu ka tetti pa nih, thangkhau puan silhin hawhtik tung, amuh ten Pathian thuthang cu ni thawng khat le ni za nih le ni sawm luk sung hilh haw tuk,” ti hi.

⁴ Mahmi ka tetti pa nihte cu leihum bawi mai ah a dingtu olif thingkung pa nih le mei inn pa nih hi haw hi.

⁵ Amuh siatsuah a tumtute cu, amuh tei kam sung pen a tulmi mei tuah a ngalte cu siatsuah tuk hi; mahten amuh siatsuah tumtute thah hi haw tuk hi.

⁶ Van khah theihnak thunei haw in, Pathian thu a phuan sung haw cu van pen nguahzu tukma hi. Tui hum hei ah thunei haw in, ciktuite khi thisan suaktik haw hi. Leipi hi a nuam hun haw poh ten pulhnat a phunkim hengtik theihnak thunei haw hi.

⁷ A thuhilh haw mi a celh haw ten taw nei ngawl khuk sung pen a tulmi sahangin do tuk hi. Mah sahangin nehin, that tuk hi.

⁸ A luangte cu a Topa haw thinglamteh hum a, a thahnak haw khuapi lampi ah zamsan haw tuk hi. Mah khuapi i melciknak min cu Sodom ahimata Izipt hi.

⁹ Mi namkim, awn namkim le ngam hempoh ten a luang haw cu ni thum le alang sung zo haw tuk a, a vui tuk vang kham haw tuk hi.

¹⁰ Hi profet pa nih tei thihnak hangin leihum mihingte cu lungdam haw tuk hi. Lungdamnak puai bawl haw tuk a, pa khat le pa khat laksawng piadun haw tuk hi; itahim titale hi profet pa nihte hangin leihum miten haksatnak tampi thuak haw hi.

¹¹ Mahnaven ni thum le alang ceng ten Pathian lak pen nunnak haihawh cu hungin amuh tei sungah tumin, amuhte cu ding haw hi; amutu hempoh ten lau in, mulling khawng haw hi.

¹² Mah profet pa nih ten van pen, “Hilai ah hungto un,” tin aw ngingzet za haw hi. A ngal tei mitmuh cilcelin amuhte cu meingo tuah vancungah kai haw hi.

¹³ Mah hun lai takin nase zetin hiinhing a, khuapi i khen sawm khenkhat sia khawngin, mihing thawng salih thi haw hi. Midangte cu lau le thinsu in um haw a, Pathian i thawm ngengnak thangphat haw hi.

¹⁴ Lauhuai pa nihnak cu bo hi, mahnaven a pa thumnak vang a ngei ngawlin heng tuk hi.

Pengkul Salihnak

¹⁵ Mahten a salihnak vancungmi in, a pengkul cu tum hi; van pen aw nging zetin hi bangin ti hi, “Leihumpi uk theihnak tuk huham cu ohtei Topa le Khrih i khut sungah um zo in kumkhua pen kumkhua tian aman uk tuk hi,” tin hilh haw hi.

¹⁶ Mahten kumpi khunnak humah a khungtu upa sawm nih le pa li ten Pathian mai ah kunin, Pathian cu bia haw hi.

¹⁷ Amuh ten hi bangin ti haw hi, “Cungnungbel Topa Pathian, atu ah hei umin, ni dang laih pen a um zo mi! A nase zetmi na huham langtikin, na uknak taw pan zo na hih hangin na min thangphat ung.

¹⁸ Na thinuknak hun hengin mithite thukhennak hun a kim ten Pathian umngawlte thinuknak tuah dim haw hi. Na sila profet le nangmah upattu na mihing a neu a ngeng ti ngawlin laksawng a ngahnak hun heng hi. Leihum a siatsuahtute na siatsuahnak hun heng zo hi,” tin ti haw hi.

¹⁹ Vancung a ummi Pathian biakinn hong haw a, thukham kuang cu muh theih tukin um hi. Khuaphelep zawzokin, vanthum dudum a, hiinhingin nial nguah nase zetin zusuk hi.